Habacuc 2
2
1<<Rikachakuna törricho marka täpaq runa maya mayala kashqannömi noqapis maya mayala shuyaraykä manakushqäta Tayta Dios contestamänanta>>.
Habacuc yapay manakushqanta Tayta Dios contestashqan
2Saymi Tayta Dios nimarqan:
<<Pipis mana pantaypa liyinanpaq taksha tablaman revelashqäta shumaq qelqay.
3Say revelashqäqa tiempun chämuptinraqmi cumplinqa.
Jukla mana cumpliptinpis mana ajayaypa shuyaray.
Imay karpis kamakanqami.
Höran chämuptinqa lapanpis nishqänömi kanqa.#Heb. 10.37; 2Ped. 3.8-10.
4<<Say runakunaqa orgullösu karmi kalpalankunaman atiënikuykäyan.
Paykunaqa mana alikunatami rurayan.
Munashqäno kawaq runaqa noqaman yärakamarmi kawanqa>>.#Rom. 1.17; Gál. 3.11; Heb. 10.38.
Alquysakuq runakunata Tayta Dios ushakäsinanpaq nishqan
5Orgullösu runakunaqa imaykayuqpis kayta munarmi#2.5 Wakin hebreo copiakunachöqa aläpa vïnuta upyar ninmi. jamaytapis tariyansu.
Rïcu kayman chaykurpis ali kawayta manami tariyansu.
Munayyuq kayta munarmi ayakunata sepultüra chaskiypa chaskishqanno runakunata ushaypa ushaykäyan.
Saymi juk markata juk markata atacar vinciykäyan.
6Say vinciyashqan runakunami vinciqninkunata manakaqman churayashpan niyanqa:
<<¡Shuyaykuyay hïju! ¡Qamkunaqa runakunapa imaykantapis qechu qechurkurmi pasaypa rïcuyaykäyanki!
¡Imayyaqraq suwakuylapa rïcuyäyanki!
7Nakasiyashqayki runakuna wanusiyäshunaykipaq elaqpita chäyämuptinmi mansakaywan pasaypa suksukyäyanki.
Lapan imaykitapis apakurmi qarapächulata kachaykuyäshunki.
8Aska markakunapa imaykantapis apakuyashqaykipitami saysika soldädukuna shamur qamkunapatapis imaykaykikunata apakuyanqa.
Sayno rurayäshunki nacionnïman shamuykur may markachöpis wanusiyashqaykipita y mana alikunata rurayashqaykipitami.
9<<¡Shuyaykuyay hïju! Qamkunaqa runapa imaykankunatapis rïcuyäyänayki kashqami suwapaykäyanki.
Sayno rïcuyar yarpaykäyanki imapis mana päsayäshunaykipaq kashqantami.
10Kuyapäkuyniynaq kayashqaykipitami qamkuna y aylluykikunapis penqaycho rikakuyankipaq.
Aska markakunata ushakäsiyashqaykipitami kikikikunatapis ushakäsiyäshunkipaq.
11Lutanta rurayashqaykitami wayipa perqankunacho kaykaq rumikunapis y terrädukunapis shimpiyäshunkipaq.
12<<¡Shuyaykuyay hïju! Qamkunaqa runakunata wanusir imaykankunatapis apakuyashlaykiwanmi markaykikunata sharkasiyashkanki.#Miq. 3.10.
13Sayno kayashqaykipitami lapanta mandaq Tayta Dios lapan sharkasiyashqaykita ninawan ushakäsinqa.
Ushakäsiptinmi lapan aruyashqaykipis waläla kanqa.
14Lamarcho yaku junta kashqannömi Tayta Diosta reqiqkunapis kay pasacho junta kayanqa.#Isa. 11.9.
15<<¡Shuyaykuyay hïju! Qamkunaqa vecïnuyki markakunata vincir penqaymanmi churayanki.
Qarapächu kaykaqta rikananpaq runa mayinta shinkäsiqnömi kaykäyanki.
16Sayno rurayashqaykipitami respitädu kayänaykipa trukan penqaycho kayankipaq.
Tayta Diospa castïgun winaraykaq cöpapita upuyaptikimi kikikikunatapis qarapachayäshunkipaq.
Kanan munayyuq karpis waray warantinqa kuyapaypaqmi kayankipaq.#Jer. 25.15-29; Eze. 23.32-34.
17Líbanuman aywaykur jachakunata ushar saycho taq uywakunatapis wanusiyashqaykipitami kikikikunatapis Tayta Dios mana kuyapaypa wanusiyäshunkipaq.
Runakunata may markachöpis wanusiyashqaykipitami pasaypa nakayankipaq.
18<<Qeruta laqlaykur rurayashqan ïdulukuna ¿imapaqraq välin?
Runakunata engañanalanpaq kaykaptinqa ¿imapaqraq välin metalkunata fundiykur ïdulukunata rurayashqan?
Shimin kaptinpis manami parlakuyansu.
¡Imanöparaq kikin ruraqpis sayman yärakunman!
19<<¡Shuyaykuyay hïju! Qamkunaqa qerupita rurayashqan ïdulutami <rikchay> nikäyanki.
Saynöpis rumipita rurayashqan ïdulutami <sharkuy> nikäyanki.
Say ïdulukuna manami imatapis musyasiyäshunkisu.
Qoriwan y qellaywan enchapashla karpis manami kawayansu.
20 Tayta Diosmi sagrädu isanqa templuncho kaykan.
Paypa nawpancho lapan runakuna maysaychöpis upälakuyäsun>>.#Sal. 11.4; Sof. 1.7.
Currently Selected:
Habacuc 2: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
