Génesis 49
49
Surinkuna y paykunapita miraqkuna imano kayänanpaq kashqantapis Jacob nishqan
1Saypitanami lapan surinkunata qayaykur Jacob nirqan: <<Nawpäman lapayki witiyämuy. Waray warantin imano kayänaykipaq kashqantami kanan niyäshayki.
2<<Lapayki witimur nishqäta wiyayämay.
3Rubén, qammi kanki qechpa surï.
Maqtalaraq kaykarmi qamta surïkurqä.
Lapan wawqikikunapis respitayäshushkankimi.
Paykunapita mas munayyuqmi kashkanki.
4Aläpa cargash mayuta pipis sapayta mana kamäpakushqannömi qamtapis jusalikuyta munaptiki pipis sapayta puëdishunkisu.
Concubïna warmïwan punushpaykimi seqaypa penqayman churamashkanki.#Gén. 35.22.
Saymi qechpa kay derëchuykita perdishkanki.
5<<Simeónwan Levíqa oqa pakirishqami kaykäyan.
Paykuna cuchillunkunawanmi runakunata ushakäsiyash.
6Seqaypa rabyarmi runakunata wanusiyash.#Gén. 34.24-30.
Asikuyänan kashlami törukunapa ankunkunatapis kachariykasiyaq.
Saymi paykuna shuntakäyashqancho shuntakaytapis munäsu.
7Paykuna rabyayashqanqa pasaypa mana alimi kash.
Paykunapita miraqkunatami destinaykä Israel nacioncho shilakash täyänanpaq.
8<<Judá, qampita miraqkunatami isanqa lapan Israel mayinkuna kuyayanqa.
Chikiqninkunataqa munayninmanmi churayanqa.
Lapan Israel mayinkunapis respitarmi puntanman qonqurpakuyanqa.
9Sarishqan uywata mikukurkuq malta leonnömi kaykanki, hïju.
Uywata sarinanpaq pasaman qonqurpakuykur cäzaraykaq leonnömi kaykanki.
Mansaypaq kaptiki ¿piraq ichiklatapis wajupaykushunkiman?#Núm. 24.9; Apoc. 5.5.
10Judá ayllulapitami reykuna imaypis kayanqa.
Manami pipis munayyuq rey kayninta qechunqasu.
Sayno kanqa lapanpaq munayyuq kaq rey chämushqanyaqmi.
Say reytami maysay nación runakunapis cäsukuyanqa.
11Say wisanmi üvapis tampiyparaq wayunqa.
Saymi üva jachalamanna ashnunkunatapis watayanqa.
Vïnupis mödananta taqshananpaq saysika yakunöraqmi kanqa.
12Saysika üva kaptinmi runakunapa nawinkunapis vïnupita mas yanaraq kanqa.
Saysika lichi kaptinmi kirunkunapis lichipita mas yuraqraq kanqa.
13<<Zabulónpita miraqkunaqa lamar kuchunkunachömi täyanqa.
Büquikuna chäkuyänan y yarqukuyänanchömi markankunapis kanqa.
Lindërunkunapis Sidónwan tinkuqyaqmi kanqa.#Deut. 33.18-19; Jos. 19.10-16.
14<<Isacarpita miraqkunaqa corralcho kaykaq kalpayuq ashnunömi kayanqa.
15Tashqan markankuna maypis täkuy munaymi kanqa.
Saymi qepita apayänanpaqpis waqtankunata kamapäyanqa.
Ashmay karpis kushishlami kawayanqa.
16<<Danpita miraqkunaqa wakin Israel trïbukunanömi trïbun kaq runakunata mandayanqa.
17Saynöpis näni nawpancho maya maya pakaraykaq culebranömi kayanqa.
Paykunaqa cawallupa chakinta picar loqaraqta#49.17 Wakin runakunaqa muntaraqta niyan. jitasiqnömi kayanqa.
18 Tayta Dios, salvaykamänaykipaq ¡qamlamanmi yärakamü!
19<<Gadpita miraqkunatami saysika soldädukuna wajupäyanqa.
Jina kaqtami kikinkunata qatikachäyanqa.
20<<Aserpita miraqkuna täyashqancho askami mikuypis kanqa.
Saymi rey mikushqanno imaypis ali alilata mikuyanqa.
21<<Neftalípita miraqkunaqa luychunöpis munashqanpa purikuqmi kayanqa.
Kuyaylapaq malwankunata qeshpisiq luychunömi kayanqa.
22<<Josépita miraqkunaqa yaku kuchuncho winamuq jachanömi kayanqa.
Paykunaqa tampiyparaq wayuq jachanömi kayanqa.
Loqluyparaq winar tapia jananpapis päsaq jachanömi kayanqa.
23Paykunatami pasaypa chikir flëchankunawan atacayanqa.
Saynölami imaypis rabyanäsiyanqa.
24Sayno kaptinpis Josépita miraqkunapa rikrankuna selläma kalpayuqmi kayanqa.
Flëchananpaq flëchakunantapis chachakmi aptaräyanqa.
Sayno kalpayuq kayanqa lapanpaq munayyuq Tayta Dios yanapaptinmi.
Paymi Israel runakunata misir munayninwan imapitapis sapan.
25Yärakushqä Tayta Dios yanapaykuläshunki.
Lapanpaq munayyuq Tayta Dios jana pasapita pasa bendicionninta churaykalämusun.
Pasa rurinpita yakutapis pashtaykasilämusun.
Wamraykikunapis uywaykikunapis aska kayänanpaq bendicionninta churaykalämusun.
26Papänï bendicionninta qomashqanpita masmi qamta bendicionnïta qoykä.
Kay bendicionqa jirkakuna mana ushakaq kashqannömi qampaq y qampita miraqkunapaq imaypis kanqa.
Qamtami wawqikikunapita Tayta Dios akrashushkanki.#Deut. 33.13-17.
27<<Benjamínpita miraqkunaqa mansariypaq löbunömi kayanqa.
Sarishqan uywata saka sakala mikuqnömi kayanqa.
Tardipanami soldädu mayinkunata aypunqa>>.
28Sayno nirmi surinkunata Jacob bendicionta qorqan. Chunka ishkay surinkunapita miraqkunami Israel runakunapa chunka ishkay trïbunkuna kaykäyan.
Jacob wanushqan
29Saypitami surinkunata Jacob nirqan: <<Unay ayllükuna kaqman aywakunäpaqnami kaykä. Wanukuptï taytäwan awilü pamparashqanman apaykamar pampaykayämanki. Paykuna pamparaykäyan heteo runa Efrónpa chakrancho kaykaq machaychömi. 30Say machay Canaáncho kaykaq Mamripa wak simpan Macpelachömi kaykan. Say machayta chakrantinta Efrón runapitami awilü Abraham rantirqan ayllunkunawan saycho pampakuyänanpaq.#Gén. 23.1-20. 31Saychömi pamparaykan awilü Abraham, awilä Sara, papänï Isaac#Gén. 25.9-10; 35.27-29. y mamä Rebecapis. Warmï Leatapis saymanmi pamparqä. 32Say machaytaqa chakrantinta heteo runakunapitami awilü rantirqan>>.
33Surinkunata sayno yäsirkurmi Jacob cämanman chachaykur päsarpurqan.#Hech. 7.15.
Currently Selected:
Génesis 49: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
