Popular Bible Verses from Génesis 49

Share

Judá ayllulapitami reykuna imaypis kayanqa. Manami pipis munayyuq rey kayninta qechunqasu. Sayno kanqa lapanpaq munayyuq kaq rey chämushqanyaqmi. Say reytami maysay nación runakunapis cäsukuyanqa.

<<Josépita miraqkunaqa yaku kuchuncho winamuq jachanömi kayanqa. Paykunaqa tampiyparaq wayuq jachanömi kayanqa. Loqluyparaq winar tapia jananpapis päsaq jachanömi kayanqa. Paykunatami pasaypa chikir flëchankunawan atacayanqa. Saynölami imaypis rabyanäsiyanqa.

Sayno kaptinpis Josépita miraqkunapa rikrankuna selläma kalpayuqmi kayanqa. Flëchananpaq flëchakunantapis chachakmi aptaräyanqa. Sayno kalpayuq kayanqa lapanpaq munayyuq Tayta Dios yanapaptinmi. Paymi Israel runakunata misir munayninwan imapitapis sapan. Yärakushqä Tayta Dios yanapaykuläshunki. Lapanpaq munayyuq Tayta Dios jana pasapita pasa bendicionninta churaykalämusun. Pasa rurinpita yakutapis pashtaykasilämusun. Wamraykikunapis uywaykikunapis aska kayänanpaq bendicionninta churaykalämusun.

<<Judá, qampita miraqkunatami isanqa lapan Israel mayinkuna kuyayanqa. Chikiqninkunataqa munayninmanmi churayanqa. Lapan Israel mayinkunapis respitarmi puntanman qonqurpakuyanqa. Sarishqan uywata mikukurkuq malta leonnömi kaykanki, hïju. Uywata sarinanpaq pasaman qonqurpakuykur cäzaraykaq leonnömi kaykanki. Mansaypaq kaptiki ¿piraq ichiklatapis wajupaykushunkiman?

Rubén, qammi kanki qechpa surï. Maqtalaraq kaykarmi qamta surïkurqä. Lapan wawqikikunapis respitayäshushkankimi. Paykunapita mas munayyuqmi kashkanki. Aläpa cargash mayuta pipis sapayta mana kamäpakushqannömi qamtapis jusalikuyta munaptiki pipis sapayta puëdishunkisu. Concubïna warmïwan punushpaykimi seqaypa penqayman churamashkanki. Saymi qechpa kay derëchuykita perdishkanki.