Génesis 46

Egiptuman Jacob aywashqan

1Lapan imaykantapis apakurkurmi Egiptupa Israel aywakurqan. Beersebaman chaykurmi papänin Isaac yärakushqan Tayta Diosta adorashpan sacrificiuta altarcho rupasirqan. 2Say sakaymi Israelta Tayta Dios revelar nirqan: <<¡Jacob, Jacob!>>

Saymi Jacob nirqan: <<¿Imalataq, Taytay?>>

3Saymi Tayta Dios nirqan: <<Noqa papäniki yärakushqan Diosmi kaykä. Ama mansariysu Egiptuman aywayta. Saychömi qampita miraqkunata noqa rikashaq askaman mirar juk nación rikakuyashqanyaq. 4Egiptuman aywaptikipis yanapäshaykimi. Wanuptikipis nawpaykichömi suriki José kaykanqa. Saypitapis qampita miraqkunata Egiptupita kikïmi jorqamushaq>>.

5Sayno niptin Beersebapita Egiptuman aywakurmi Faraón apasishqan carrëtakunaman surinkuna wisäsiyarqan papänin Jacobta, pishi wamrankunata y warminkunatapis. 6Canaáncho tarishqan kaqtaqa wäkankunatapis uyshankunatapis qatikurkur y lapan imaykankunatapis apakurkurmi Egiptupa aywakuyarqan.#Hech. 7.15. 7Saynöpami lapan surinkunawan y wilkankunawan Egiptuman Jacob chäyarqan.

8Egiptupa aywaq Israel runakuna kayarqan:

Jacobpa qechpa surin Rubén;

9Rubénpa surinkuna Hanoc, Falú, Hezrón y Carmi;

10Simeónpa surinkuna Jemuel, Jamín, Ohad, Jaquín, Zohar y Saúl (Saúl karqan cananea warmipa wawanmi);

11Levípa surinkuna Gersón, Coat y Merari;

12Judápa surinkuna Er, Onán, Sela, Fares y Zara (Erwan Onánqa Canaánlachönami wanuyarqan);

Farespa surinkuna Hezrónwan Hamul;

13Isacarpa surinkuna Tola, Fúa, Job y Simrón;

14Zabulónpa surinkuna Sered, Elón y Jahleel.

15Paykunami kayarqan Jacobpa warmin Leapa wawankuna y wilkankuna. Leapa olqu wawankunaqa lapanpis Padan-aramchömi yuriyarqan. Saynölami wawan Dinapis saycho yurirqan. Leapa wawankunawan wilkankuna kayarqan kimsa chunka kimsami (33) warmipis olqupis.

16Saynöpis Egiptuman aywayarqan Gadpa surinkuna Zifión, Hagui, Ezbón, Suni, Eri, Arodi y Areli;

17Aserpa surinkuna Imna, Isúa, Isúi y Bería (paykunapa paninmi karqan Sera);

Beríapa surinkuna Heberwan Malquiel.

18Paykunami kayarqan Zilpapa wawankuna y wilkankuna. Zilpa karqan Leapa ashmayninpaq taytan Labán qoykushqanmi. Zilpapa wawankuna y wilkankuna kayarqan chunka soqtami warmipis olqupis.

19Saynöpis Egiptuman aywayarqan Jacobpa warmin Raquelpa wawan José y Benjamín.

20Josépami warmin Asenatcho surinkuna kayarqan Manaséswan Efraín.#Gén. 41.50-52. Paykuna yuriyarqan Egiptuchömi. Asenat karqan On markacho taq cüra Potiferapa surinmi.

21Benjamínpa surinkunami kayarqan Bela, Bequer, Asbel, Gera, Naamán, Ehi, Ros, Mupim, Hupim y Ard.

22Paykunami kayarqan Jacobpa warmin Raquelpa wawankuna y wilkankuna. Paykuna chunka chuskumi kayarqan.

23Saynöpis Egiptuman aywayarqan Danpa surin Husim;

24Neftalípa surinkuna Jahzeel, Guni, Jezer y Silem.

25Paykunami kayarqan Bilhapa wamrankuna y wilkankuna. Bilha karqan Raquelpa ashmayninpaq taytan Labán qoykushqanmi. Say warmipa wawankuna y wilkankuna kayarqan qanchismi.

26Egiptuman Jacob chäyarqan surinkunawan wilkankunawan soqta chunka soqtami (66). Paykunawanmi surinkunapa warminkunapis aywayarqan. 27Josépa surin Egiptucho ishkaymi yuriyarqan. Paykunatawan yupaptin Egiptucho Israel runakuna kayarqan qanchis chunkanami (70).#46.27 Septuaginta niyashqan unay griego traduccionchöqa qanchis chunka pisqa (75) kashqantami nikan. Saynölami Hech. 7.14 nikan.

Gosénman Jacob chashqan

28Gosénman chaykarmi surin Judáta Jacob kacharqan Joséta wilananpaq <<papäninsiwan tinkuqshi aywanki>> nir.

Saypitanami Gosénman Jacob charqan. 29Josénami cawalluwan qarachana carrëtanta alistarkasir papäninwan tinkuq aywarqan. Papäninwan tinkuykurmi makalanakurkur waqapänakuyarqan. 30Saymi Joséta Israel nirqan: <<Kanan isanqa kawaykaqwan tinkushqächönaqa wanukushaqnapis>>.

31Saypita wawqinkunata y wakin ayllunkunatami José nirqan: <<Aywä Faraón kaqman chäyämushqaykita wilanäpaq. Paytami nishaq: <Canaánpitami papänïwan wawqïkuna y wakin ayllükunapis chäyämush. Paykuna shakayämush noqapa cercalächo täyänanpaqmi. 32Saymi uyshankunatawan cabrankunata y wäkankunata qatish chäyämush. Saynölami lapan imankunatapis apakayämush. Paykuna uywa ashmakuylatami yachayan>. 33Faraónta sayno wilaptïmi qamkunata qayaykur imacho aruyashqaykitapis tapuyäshuptiki 34niyanki: <Noqakuna unay ayllükunanöpis wamra kayashqäpita pasa uywa ashmaylatami yachayä>. Sayno wilayaptikimi uysha misiq runakunata Egipto runakuna melanäyaptin Gosén particho shuyni täyänaykipaq niyäshunki>>.

Currently Selected:

Génesis 46: qvhB

Highlight

Copy

Compare