Génesis 34

Dinata fuerzashqan

1Leapa wawanmi karqan Dina. Paymi saylächo taq jipashkunawan yanasa kayashpan watukaq aywarqan. 2Heveo runa Hamorpa surinmi Siquem karqan. Hamor karqan saycho taq runakunapa autoridäninmi. Siquemqa Dinata rikaykur pasaypa munapashpanmi fuerzarqan. 3Nirkurnami Siquemqa Dina kuyananpaq imaykanöpapis shonqunman yaykuyta tïrarqan. 4Saymi papänin Hamorta Siquem nirqan: <<Papä, say jipashta warmïpaq ashipaykalämay>>.

5Jacob musyarqanmi surin Dinata Siquem fuerzashqanta. Sayno kaptinpis surinkuna uywankunawan jirkacho kayaptinmi paykuna kutiyämushqanyaq upälakurqan. 6Sayyaqmi Siquempa papänin Hamor aywarqan Jacobwan parlananpaq. 7Jacobpa surinkuna jalqapita kutiykurmi paninta Siquem fuerzashqanta musyaykur fiyupa rabyanäyarqan. Sayno fuerzashqan pasaypa penqaypaqmi karqan. Sayta manami imaypis ruranmansu karqan.

8Saymi paykunawan parlar Hamor nirqan: <<Surï Siquemmi panikipaq pasaypa löcutash puriykan. Saymi shamushkä surïwan panikita täsinansipaq. 9Saynöpami compädrita rurar juk ayllunölana kashunpaq. Saymi surïkunapis qamkunapa warmi surikikunawan majasakäyanqa y qamkunapapis noqakunapawan majasakäyanqa. 10Kaylachöna täkushun. Kay nacioncho munashqaykita maynintapis täyänaykipaq akrakuyay. Saynöpis ima negociutapis rurayay. Chakratapis kikikikunapaqna rantiyay>>.

11Saynölami Siquempis Dinapa papänintawan turinkunata nirqan: <<Taytakuna, panikita awniykayälämay. Awniyämaptikiqa imatapis munayashqaykitami qoyäshayki. 12Panikita awniyämaptikiqa costumbri kashqanpita masta manayämaptikipis kamaripäyäshaykimi. Imaykanöpapis noqa munä panikita awniyämänaykitami>>.

13Sayno niptinmi paninta fuerzashqanpita Jacobpa surinkuna fiyupa rabyash kar Siquemtawan papänin Hamorta awniq tukuyarqan. 14Saymi niyarqan: <<Noqakuna manami panïta awnikuyämansu señalaküni runamanqa. Señalaküni runa mashaq karqa penqaypaqmi kanqa. 15Noqakuna señalakush kayashqäno qamkunapis lapan olqukuna señalakuyaptikiqa panïta awnikuyäshaykimi. 16Señalakuyaptikiqa surikikunata warmi surïkunawanmi täsishun. Saynölami warmi surikikunawan surïkunatapis täsishun. Saynöpami lapansipis say ayllunöla kashun. 17Niyashqäno mana señalakuyaptikiqa panïta pushakurkurmi aywakuyäshaq>>.

18Sayno niyaptinmi Hamorwan surin Siquem paykuna niyashqanno señalakuyänanpaq awniyarqan. 19Saypita aywakurmi Dinata kuyashpan Siquem jukla cuerpunta señalakurqan. Pay karqan papäninpa aylluncho mas respitädu maqtami. 20Saypitami papänin Hamorwan aywayarqan marka yaykuna punkuman. Saychömi runakunata niyarqan: 21<<Jacob ayllu runakuna ali runami kayan. Paykuna kaycho täyänanpaq jirkansikunapis chakransikunapis jäkuykanmi. Sayno kaykaptinqa kaycho täkuyashpan ima negociutapis rurayäsun. Saynöpami warmi surinkunawan surinsikunata täsishun. Paykunapis warmi surinsikunata surinkunawanmi täsiyanqa. 22Isanqa say ayllunöla kanansipaq paykuna munayan señalakush kayashqanno noqansipis olqu kaqkuna señalakunansitami. 23Paykuna niyashqanta awnishqaqa noqansiwanmi kaycho täyanqa. Saynöpami lapan imaykankunapis uywankunapis noqansipana kanqa>>.

24Sayno niptinmi saycho shuntakaq runakuna awniyarqan Hamorwan Siquem niyashqanta. Saymi lapan olqukuna cuerpunta señalakuyarqan.

25Saypita kimsa junaqtami markaman yaykuyarqan Dinapa turinkuna Simeónwan Leví. Cuerpunta señalakuyashqanpita nanaywan kayaptinmi ichipäyänanpaq valorninkuna karqansu. Sayno kaykaqtami espädawan lapanta wanusir ushaykuyarqan. 26Saynölami Hamortawan surin Siquemtapis espädawan wanusiyarqan. Nirkurnami Siquempa wayinpita Dinata pushakurkur aywakuyarqan.

27Saypitami Jacobpa wakin kaq surinkunapis markaman yaykuyashpan tariyarqan lapan runakuna wanush jitaraykäyaqta. Paninta fuerzashqanpita rabyash karmi say markacho tariyashqan kaqtaqa imaykantapis apakuyarqan. 28Saynöpis apakuyarqan uyshakunata, cabrakunata, wäkakunata, ashnukunata y imaykatapis markacho y chakracho tariyashqan kaqtaqa. 29Wayikunacho imaykatapis tariyashqanta lapanta aparmi wamrakunatapis warmikunatapis prësu apakuyarqan.

30Sayno rurayashqanta musyaykurmi Simeóntawan Levíta Jacob nirqan: <<¿Imaykamantaq jitarpayämashkanki? Wanusiyashqaykita musyaykurqa cananeo runakunawan ferezeo runakuna fiyupami chikiyämanqa. Paykuna wilanakur shayämushpanmi lapansita wanusir ushamäshun. Ashmayninsi runakunapis paykunata ichipänansipaq walkalami kaykäyan>>.

31Niptinmi paykuna niyarqan: <<Sayno kaptinqa ¿imayka prostitüta warmitanöchi panïta pay saripakunqa?>>

Currently Selected:

Génesis 34: qvhB

Highlight

Copy

Compare