Éxodo 40

Sagrädu Tolduta ichisiyashqan

1Saypitanami Moisésta Tayta Dios nirqan: 2<<Wata qalaykunan killa punta kaq junaqcho Tinkunansi Sagrädu Tolduta ichisinki. 3Tinkunansi Toldu ruriman Pactu Babulta churaykur cortïnata churanki pipis waqtapita babulta mana rikananpaq. 4Mësatapis ruriman yaykaskasir manëjunkunata jananman shumaq churanki. Candelabrutapis yaykaykasir mechërukunata puntankunaman churanki. 5Inciensuwan qoshnisiyänanpaq qori altartapis churanki Pactu Babulta saparaq cortïna nawpanman. Sagrädu Tolduman yaykuna cortïnatapis churanki.

6<<Nirkurna sacrificiuta rupasina altartapis Tinkunansi Toldu yaykuna nawpanman churanki. 7Broncipita lavatoriutapis Tinkunansi Toldupita altarman aywana chawpinman jamaykasir sayman yakuta winanki. 8Sayta ruraykurna Tinkunansi Sagrädu Toldupa patiunta cortïnawan tumaypa sapanki. Sayman yaykuna punkuta saparänanpaq kaq cortïnatapis churanki.

9<<Lapanta kamakarkasirqa sagrädu aceitita winapanki Sagrädu Tolduman y lapan saycho kaykaqkunamanpis. Saynöpami lapanpis sagrädu kar noqapana kanqa. 10Saynöpis sagrädu aceitita winapanki sacrificiuta rupasina altarman y manëjunkunamanpis. Saynöpami say altar sagrädu kanqa. 11Jamanantinta lavatoriumanpis sagrädu aceitita winapanki. Saynöpami sagrädu kanqa.

12<<Saypitana Aarónta y surinkunata Tinkunansi Toldu patiuman pushaykur armakasinki. 13Nirkurna sagrädu mödanata Aarónta jatiparkur sagrädu aceitita umanman winapanki. Saynöpami noqata sirvimaq cürana kanqa. 14Saynöla Aarónpa surinkunatapis qayaykur tünicankunata jatipanki. 15Nirkur papäninpa umanman winapashqaykinöla surinkunatapis sagrädu aceitita winapanki. Saynöpanami paykuna y paykunapita miraqkunapis sirvimaq cürakuna imayyaqpis kayanqa>>.

16 Tayta Dios nishqannölami lapantapis Moisés rurarqan.

17Egiptupita yarqayämushqan wata cumplirkuptinmi mushuq wata qalaykunan killa punta kaq junaqcho Sagrädu Tolduta ichisiyarqan. 18Sagrädu Tolduta ichisinanpaqqa puntata jawiräkunantaraqmi Moisés churasirqan. Say jawiräkunanmannami marcukunata ichirkasir travesäñukunata churasirqan. Saynölami jorconkunatapis ichirkasir 19say jananman toldukunawan qatasirqan. Nirkur say jananmannami janay janay wakin toldukunawan qatasirqan. Tayta Dios nishqannölami lapan saykunata Moisés rurasirqan.

20Nirkurnami Israel runakunawan Tayta Dios rurashqan pactuta#Éxo. 34.28. babul rurinman churarqan. Babul wintukuna qerukunatapis arguëllankunapa päsarkasir sapananwan saparkurqan. 21Saypitanami Pactu Babulta aparqan Sagrädu Toldu ruriman. Sayman churaykurmi mana rikakänanpaq cortïnata churarqan. Moisésta Tayta Dios nishqannölami lapan saykunata rurarqan.

22Saypitanami Tinkuna Tolduman mësata aparqan Pactu Babulta saparaq cortïnapa jukaq lädunman churananpaq. Saytami churarqan norti kaqläman. 23Mësa jananmanmi tantatapis churarqan Tayta Diospa nawpancho kananpaq. Moisésta Tayta Dios nishqannölami lapan saykunata rurarqan.

24Candelabrutapis Tinkuna Toldu ruriman aparmi mësa nawpan sur kaqläman churarqan. 25Nirkurnami Tayta Diospa nawpancho rataränanpaq mechërukunaman aksita sarisirqan. Moisésta Tayta Dios nishqannölami lapan saykunata rurarqan.

26Qoripita rurashqan altartapis Tinkuna Tolduman apaykurmi saparaq cortïnapa jukaq lädunman churarqan. 27Nirkurnami say altarcho mushkuq inciensuwan qoshnisirqan. Moisésta Tayta Dios nishqannölami lapan saykunata rurarqan.

28Saypitanami Sagrädu Tolduman yaykuna punkuman cortïnata churarqan. 29Nirkurnami sacrificiuta rupasina altarta Moisés churarqan Tinkuna Toldu yaykunan nawpanman. Saychömi rupasina sacrificiuta y saki mikuy ofrendatapis rupasirqan. Moisésta Tayta Dios nishqannölami lapan saykunata rurarqan.

30Saypitanami lavatoriuta churarqan Tinkuna Toldupita altarman aywana chawpinman. Nirkurnami maylakuyänanpaq say lavatoriuman yakuta winasirqan. 31Say yakuwanmi Moisés, Aarón y Aarónpa surinkunapis makinkunata y chakinkunata maylakuyarqan. 32Moisésta Tayta Dios nishqannölami paykunaqa imaypis sayno maylakuyaq Tinkuna Tolduman yaykunanpaq y altarman aywananpaqpis.

33Nirkurnami Sagrädu Toldupa patiunta cortïnawan tumaypa sapasirqan. Sayman yaykuna punkuta saparänanpaq kaq cortïnatapis churasirqan. Saynömi Sagrädu Tolduta Moisés ichisiyta usharqan.

Tinkuna Tolduman Tayta Dios chashqan

Números 9.15-23

34Tinkuna Sagrädu Tolduta Moisés ichirkasiptinmi pukutay sapakurkuptin kikin Tayta Dios sayman charqan.#1Rey. 8.10-11; Isa. 6.4; Eze. 43.4-5; Apoc. 15.8. 35Pukutay sapakurkuptinmi Moisés yaykuyta kamäpakurqansu.

36Sagrädu Toldupita pukutay sharkuptinnami Israel runakuna toldunkunata shuntarkur aywayaq. 37Pukutay mana sharkuptinqa jinalanchömi täkuyaq. 38Junaqpanami Sagrädu Toldu janancho pukutay qenqiraq. Sakaypanami Sagrädu Toldu janancho nina rataraq. Saytaqa lapan Israel runakunami rikayarqan. Pukutaypis ninapis sayno karqan Israel runakuna sunyaq jirkapa purir Canaánman chäyashqanyaqmi.#Éxo. 13.21-22.

Currently Selected:

Éxodo 40: qvhB

Highlight

Copy

Compare