Éxodo 36

1Saymi Bezaleel, Aholiab y wakin yachaq tantiyaq runakunapis Tayta Dios nimashqansino Tinkuna Sagrädu Tolduta sharkasiyanqa. Paykunatami Tayta Dios habilidäta qosh Tinkuna Sagrädu Tolduta y manëjunkunata#Éxo. 35.4-19. rurayänanpaq>>.

Sagrädu Tolduta rurayänanpaq pusuy pusuy apayashqan

2Aruyta qalaykuyänanpaqmi Bezaleelta, Aholiabta y wakin yachaq tantiyaq runakunatapis Moisés qayarqan. Paykunaqa aruyänanpaq listumi kaykäyarqan. 3Tinkuna Sagrädu Tolduta rurayänanpaqmi Israel runakuna apayashqan ofrendakunata paykunata Moisés entregarqan. Say jananmanmi Israel runakuna voluntäninpita cada tuta mas ofrendakunata apayarqan. 4Saymi aruykashqanta kachaykur Tinkuna Sagrädu Tolducho aruqkuna 5Moisésta wilaq aywar niyarqan: <<Tayta Dios nimashqansino Tinkuna Sagrädu Tolduta sharkasinansipaq pusuqpaqnami runakuna apayämush>>.

6Saymi runakunata intëru campamentupa Moisés wilakasirqan: <<Tinkuna Sagrädu Tolduta sharkasinansipaq amana masta imatapis apayämuynasu>> nir.

Sayno wilakasiptinmi runakuna manana apayarqannasu. 7Lapanta rurayänanpaqpis pusuy pusuynami karqan.

Sagrädu Tolduta rurayashqan

Éxodo 26.1-37

8 Sagrädu Toldupaqmi mas habilidäyuq runakuna chunka bayëtata awayarqan llanula puskash lïnu jïlupita y azul, granäti y puka milwa jïlukunapitapis. Say bayëtakunamanmi querubinkunata bordayarqan. 9Say chunka bayëtakunaqa say tamäñulami kayarqan. Cada bayëtapa larguyninmi karqan chunka ishkay metru pulannin (12.5). Anchuyninnami karqan ishkay metru.

10Pisqa bayëtakunata larguynin kaqpa jirayarqan juklaylanöla kananpaqmi. Saynölami jirayarqan pisqa kaq bayëtakunatapis. 11Nirkurnami say ishkan jirayashqan bayëtakunapa larguynin kaq kuchunman azul jïlukunata pataparkur ojalnin kananpaq churayarqan. 12Pisqa chunkatami (50) rurayarqan jukaq bayëtapa kuchunpaq y pisqa chunkatanami rurayarqan jukaq bayëtapa kuchunpaq. Saynöpami ishkan bayëtakunapa ojalninkuna frenti frenti shequräyänanpaq kayarqan. 13Ojalninkunapita shequyänanpaq qoripitami rurayarqan pisqa chunka ganchukunata. Say ganchukunawan ishkan jirayashqan bayëtakunata shequyaptinmi juk toldulana karqan.

14Say jananman qatayänanpaqnami cabrapa aqsanpita chunka juk bayëtakunata awayarqan. 15Say bayëtakunaqa lapanpis say tamäñulami kayarqan. Cada bayëtapa larguynin karqan chunka kimsa metru pulanmi (13.5). Anchuyninnami karqan ishkay metru. 16Nirkurnami pisqa bayëtakunata larguynin kaqpa jirayarqan juklaylano kananpaq. Saynölami soqta kaqkunatapis larguynin kaqpa jirayarqan juklaylano kananpaq. 17Saynöpis ojalkunata jïlupita rurarkurmi say jirayashqan bayëtakuna tinkunanpaq kaq kuchunman churayarqan. Pisqa chunka (50) ojalkunatami churayarqan jukaq jirayashqan bayëtapa kuchunman y pisqa chunkatanami jukaq bayëtapa kuchunman churayarqan. 18Say ojalkunapita shequnanpaqmi broncipita rurayarqan pisqa chunka ganchukunata. Saywan shequyaptinmi juk bayëtanölana karqan.

19Say bayëtakuna jananpa qatayänanpaqmi rurayarqan pukaman tiñish uysha pirqashpita rurash tolduta. Say pirqashkuna jananmannami qatayarqan fïnu qarapita rurash tolduwan.

20Nirkurnami acacia qerupita marcukunata rurarkur derëchu ichisiyarqan. 21Cada marcupa altuyninmi karqan chusku metru pulan. Anchuyninnami karqan soqta chunka pisqa (65) centïmetru. 22Marcupura laqaränanpaqmi cada marcupa chakincho ishkay espïgata rurayarqan. Saynölami lapan marcukunatapis rurayarqan. 23Ishkay chunka (20) marcukunata rurayarqan sur kaqläman ichisiyänanpaq. 24Say marcukuna ichiyänanpaq rurayarqan qellaypita chusku chunka (40) jawiräkunanta. Cada marcupa ishkay espïgan kaptinmi cada marcupa ishkay jawiräkunanpis karqan. 25Saynölami ishkay chunka (20) marcukunata rurayarqan norti kaqläman ichisiyänanpaqpis. 26Saykuna ichiräyänanpaqpis qellaypitami chusku chunka (40) jawiräkunanta rurayarqan. Saynöpami cada marcupaq ishkay jawiräkunan karqan.

27Soqta marcukunata rurayarqan inti jeqanan kaqläpa ichisiyänanpaqmi. 28Qepan kaq esquïnankunapaqpis ishkay marcukunata rurayarqan. 29Say marcukunami esquïnacho tinkuq marcukunaman shumaq laqararqan. Jana kaq esquïnachömi juk arguëllawan shequrarqan. Ishkan esquïnanchöpis marcukunata saynölami ichisiyarqan. 30Saymi puwaq marcukuna saylächo kayarqan. Cada marcupami qellaypita rurash ishkay jawiräkunan karqan. Saynöpami saylächo chunka soqta jawiräkunan karqan.

31Sagrädu Toldupa jukaq lädun marcukunata sakraränanpaqmi acacia qerupita pisqa travesäñukunata rurayarqan. 32Saynölami jukaqläpaqpis pisqa travesäñukunata rurayarqan. Sagrädu Toldu qepanpaqpis pisqa mas travesäñukunatami rurayarqan. Say karqan inti jeqanan kaqläpami. 33Chawpi kaq travesäñuqa juk kuchunpita jukaq kuchunyaqmi ichiraq marcukunapa päsararqan. 34Say marcukunata y travesäñukunatapis qoriwanmi enchapayarqan. Travesäñukuna päsayänanpaqqa qoripitami arguëllankunata rurayarqan.

35Nirkurnami cortïnata awayarqan azul, granäti y puka milwa jïlukunapita y llanula puskash lïnu jïlupitapis. Saymanmi ishkay querubinkunata shumaq bordayarqan. 36Say cortïnatanami qoripita rurash ganchukunawan shequyarqan acacia qerupita rurash chusku jorconkunaman. Say jorconkuna qoriwan enchapashqami kayarqan. Jorconkunapa jawiräkuyänan qellaypita rurashqami karqan.

37Saypitami juk cortïnata awayarqan tolduman yaykuna punkupaq. Sayta awayarqan azul, granäti y puka milwa jïlukunapita y llanula puskash lïnu jïlupitapis. Say cortïna kuyaylapaq kananpaqmi shumaq bordayarqan. 38Cortïna waqiränanpaqmi pisqa jorconkunata ganchuntinta rurayarqan. Say jorconkunapa puntantapis arguëllankunatapis qoriwanmi enchapayarqan. Saynöpis jorconkuna ichiräyänanpaqmi pisqa jawiräkunanta broncipita fundiyarqan.

Currently Selected:

Éxodo 36: qvhB

Highlight

Copy

Compare