Éxodo 27

Broncipita altarta rurasinanpaq tantiyasishqan

Éxodo 38.1-7

1<<Saynöpis acacia qerupita cuadrädu altarta rurasinki. Say altarpa anchuyninpis larguyninpis ishkay metru ishkay chunka pisqa centïmetru (2.25) kanqa. Altuyninnami kanqa juk metru ishkay chunka pisqa centïmetru (1.25). 2Chuskun esquïnankunacho waqratano rurasinki. Say waqrakuna altarwan say piëzala kayanqa. Altarpa jananta y rurinta bronciwan enchapasinki. 3Altarpa lapan manëjunkunapis broncipitami kayanqa. Say manëjukuna kayanqa uchpa shuntakuna, tenäzakuna, trinchikuna, tazonkuna y kanalakuna. 4Saynöla rejïllantapis broncipita rurasinki. Nirkur rejïllapa chuskun esquïnanman broncipita rurash arguëllakunata tanasinki. 5Say rejïllata altar rurinman churasinki. Sayno churasiptikimi altar pulancho sakraranqa. 6Saynöpis acaciapita ishkay largu qerukunata rurarkasir bronciwan enchapasinki. 7Say qerukunatana altarpa ishkanlächo kaykaq arguëllankunapa päsasinki saypita wintuyänanpaq. 8Say altarta tablapita rurasinki sapanaynaqta. Lapanta rurasinki jirka puntacho rikasishqätanöla.

Sagrädu Toldupa patiunta rurasinanpaq tantiyasishqan

Éxodo 38.9-20

9<<Sagrädu Tolduqa patiuyuq kanqa. Say patiuta jiruruypa saparänanpaq cortïnata awasinki llanula puskash lïnu jïlupita. Sur kaqläpami larguynin kanqa chusku chunka pisqa (45) metru. 10Cortïna waqiränanpaq ishkay chunka (20) jorconkunata broncipita rurasinki. Jorconkunapa jawiräkunantapis broncipita ishkay chunkata rurasinki. Cortïna sararäkunan ganchukunatapis arguëllakunatapis qellaypita rurasinki. 11Norti kaqläpapis patiupa cortïnan chusku chunka pisqa (45) metrumi kanqa. Jorconninkunatapis jawiräkunantapis broncipita ishkay chunkata (20) rurasinki. Ganchunkunatapis arguëllankunatapis qellaypita rurasinki.

12<<Inti jeqanan kaqläpa cortïnapa larguynin kanqa ishkay chunka ishkay metru pulan (22.5). Say larguynin kanqa jukaq esquïnapita jukaq esquïnayaq. Jorconninkunatapis jawiräkunantapis chunkata rurasinki.

13<<Inti jeqamunan kaqläpapis cortïnapa larguynin kanqa ishkay chunka ishkay metru pulan (22.5). 14Sayläpami punku kanqa. Punkupita isuq kaqläpa kanqa qanchis metru cortïna. Say cortïnata sararänanpaq kimsa jorconkunata cada ünunta jawiräkunanman ichisinki. 15Saynöla punkupita aluq kaqlämanpis qanchis metru cortïnata churasinki. Say cortïnata sararänanpaq kimsa jorconkunata cada ünunta jawiräkunanman ichisinki.

16<<Patiuman yaykuna punkupaq rurasinki esqun metru largu cortïnata. Sayta awasinki azul, granäti y puka milwa jïlukunapita y llanula puskash lïnu jïlupitapis. Say cortïnata shumaq bordasinki. Cortïnata sararänanpaq chusku jorconkunata cada ünunta jawiräkunanman ichisinki. 17Patiucho kaykaq lapan jorconkuna qellaypita rurash arguëllayuq y ganchuyuq kayanqa. Say jorconkunapa jawiräkunanpis broncipita kanqa. 18Tinkunansi Sagrädu Toldupa patiun kanqa chusku chunka pisqa (45) metru largu. Anchuyninna kanqa ishkay chunka ishkay metru pulan (22.5). Altuyninnami kanqa ishkay metru ishkay chunka pisqa centïmetru (2.25). Cortïnanta rurasinki llanula puskash lïnu jïlupita. Jorconkuna jawiräkunan broncipita kanqa. 19Sagrädu Toldupa lapan manëjunkunapis broncipita kayanqa. Saynölami Sagrädu Tolduta ichisir watanaykipaq ruri kaq y waqta kaq estäcankunapis broncipita kayanqa.

Candelabrupaq aceitita rurayänanpaq tantiyasishqan

Levítico 24.1-3

20<<Israel runakunata ninki olïvupita aceitita rurarkur apayämunanpaq. Say aceiti kanqa candelabru imaypis rataränanpaqmi. 21Say candelabrutami Tinkunansi Tolducho warati nawpächo rataränanpaq cada tardi Aarón y surinkuna sarisiyanqa. Sayno rataranqa Pactu Babulta saparaq cortïna waqtanchömi. Say nishqäkunaqa imayyaqpis leymi qamkunapaq y qamkunapita miraqkunapaqpis kanqa.

Currently Selected:

Éxodo 27: qvhB

Highlight

Copy

Compare