Éxodo 2

Moisés yurishqan

1Say wisanmi Leví trïbu runa majasakarqan Leví trïbu warmiwan. 2Saypita warmin qeshyaq rikakuptinmi wawan yurirqan olqu. Kuyaylapaq kaptinmi kimsa killa maman pakaräsikurqan.#Hech. 7.20; Heb. 11.23. 3Saypita masta pakaräsiyta manana puëdirnami ututupita canastata awaykur breawan lashtaparkurqan. Canastaman wamrata winarkurnami Nilo mayu kuchun ututukuna chawpinman churaykurqan. 4Churaykurnami itipa paninta nirqan karulapita rikaykänanpaq.

5Saypita mas rätulantanami Faraónpa warmi surin mayuman armakuq aywarqan. Ashmayninkuna mayu kuchunpa rikachakur puriyashqanyaqmi rikarqan ututu chawpincho canasta aynaykaqta. Saymi juk ashmayninta kacharqan canastata jorqamunanpaq. 6Jorqarkamuptinnami canastata kichar iti wamra waqaykaqta tarirqan. Saymi Faraónpa warmi surin wamrata kuyapar nirqan: <<Kayqa hebreo runapa wamranmi kanqa>>.

7Saymi itipa paninna Faraónpa warmi surinta nirqan: <<¿Alisuraq kanman kay wamrata ashmapäshunaykipaq hebrea warmita qayamuptï?>>

8Niptinmi nirqan: <<¡Jukla pushamuy, ari!>>

Niptinmi itipa mamanta say wamra pushamurqan.

9Maman chaykuptinmi Faraónpa surin nirqan: <<Kay itita ashmapaykalämay. Ashmapämashqaykipita pägaläshaykimi>>.

Sayno niptinmi itita ashmapänanpaq apakurqan.

10Shaksharkuptinnami Faraónpa surinta entregaykurqan. Paynami kikinpa wawanno kananpaq legitimakurqan.#Hech. 7.21. <<Yakupitami jorqukushkä>> nirmi jutisirqan Moisés#2.10 Moisés ninanqa jorqush ninanmi. jutin kananpaq.

Egiptupita Moisés qeshpishqan

11Saypita Moisés poqukarkurnami juk junaqcho aywarqan hebreo mayinkunaman watukaq. Saychömi rikarqan paykuna fiyupa nakar aruykäyaqta. Saynöpis rikarqan juk Egipto runa hebreo runata maqaykaqta. 12Saymi Moisés intërupa rikachakur pitapis mana rikashpan Egipto runata wanurasirqan. Nirkurmi aqusha rurinman pampaykurqan.

13Waraynin junaq Moisés yapay aywarnami ishkay hebreo runakuna kikinpura pelyaykäyaqta tarirqan. Saymi maqaq kaqta nirqan: <<Hebreo mayiki kaykaptin ¿imanirtaq maqaykanki?>>

14Saymi nirqan: <<Qamta ¿pitaq churashushkanki noqakunapa mandamaqnï y jueznï kanaykipaq? ¿Egipto runata wanusishqaykinöku noqatapis wanusimayta munaykanki?>>#Hech. 7.23-28, 35.

Sayno niptinmi Moisés fiyupa mansakäkurqan. Saymi yarpachakur nirqan: <<Egipto runata wanusishqä musyakaykannami ïllu>>.

15Egipto runata wanusishqanta Faraón musyaykurmi Moisésta wanusinanpaq ashisirqan. Saymi Moisés qeshpir Madiánpa aywakurqan.#Hech. 7.29; Heb. 11.27. Chaykurmi pözu nawpanman jamaykurqan.

Madiáncho Moisés tashqan

16Madiánchömi Reuel jutiyuq runa tarqan.#2.16 Reuel karqan Moiséspa suedrunmi (Éxo. 2.21). Paytami Jetro niyarqanpis (Éxo. 3.1; 18.1) y Hobab niyarqanpis (Jue. 4.11). Pay karqan madianita runakunapa cüranmi. Paypa jipash surinkuna qanchisnintinmi kayarqan. Pözu nawpancho Moisés jamaraykaptinmi say qanchis jipashkuna chäyarqan papäninpa uyshankunatawan cabrankunata yakusiq. 17Wakin misikuqkuna pözuman chaykurmi say jipashkunata qarquyarqan. Qarquykaqta rikarmi jipashkunapa favornin sharkushpan uyshankunata y cabrankunata Moisés yakusirqan.

18Jipashkuna rasla kutiyaptinmi papänin tapurqan: <<Kanan junaqqa ¿imanirtaq rasla kutirayämushkanki?>>

19Saymi wilayarqan: <<Wakin misikuqkuna pözupita qarqaykäyämaptinmi juk Egipto runa favornïkuna sharkur yanapäyämash. Nirkurmi uyshansikunata y cabransikunata yakusish>>.

20Saymi surinkunata nirqan: <<¿Maychötaq say runa kaykan? ¿Imanirtaq japalanta kachariykayämushkanki? ¡Ayway qayamuy mikunanpaq!>>

21Reuelpa wayinman chaykurmi paykuna kaqcho täkunanpaq Moisés awnirqan. Saycho taptinmi Reuelqa surin Séforawan Moisésta täsirqan. 22Saypitanami Séfora qeshyakurqan olqu wamrata. Say itipa jutintami Moisés churaparqan Gersón#2.22 Gersón ninanqa jäpa ninanmi. jutin kananpaq. Say jutita churaparqan <<kay markacho jäpa runami kä>> nishpanmi.

23Saypita aska wata päsarkuptinnami Egipto nacionpa mandaqnin rey wanurqan. Israel runakunaqa ashmay kar jinalami fiyupa nakaykäyarqan. Saymi lakikuyashpan jorquykunanpaq Tayta Diosta manakuyarqan. 24Sayno manakuyashqanta Tayta Dios wiyarqan. Saymi Abrahamwan, Isaacwan y Jacobwan pactu rurashqanta yarpashpan paykunata kuyaparqan#Gén. 15.13-14.. 25Saynöpis Israel runakuna fiyupa nakaykäyashqantami rikarqan.

Currently Selected:

Éxodo 2: qvhB

Highlight

Copy

Compare