2 Corintios 3

Corintucho taq wawqi panikuna recomendación cartano kayashqan

1Sayno niptï ama yarpäyaysu chaskikayämänayki raykula parlayashqäta. Saynöpis ama yarpäyaysu chaskikayämänaykipaq recomendación cartataraq nistäyashqäta. Wakin runakuna recomendación cartata purisiyaptinpis qamkuna chaskikayämänaykipaqqa manami nistäyäsu. Saynöpis juk markaman chäyaptï chaskikayämänanpaq manami qamkunapita recomendación cartata nistäyäsu. 2Saypa trukanqa kikikikunami shonqükunacho qelqaraykaq recomendación cartä kaykäyanki. Say cartataqa pïmaypis liyiyanmi.#3.2 Sayno nirmi Pablo nirqan: Recomendación cartä mana kaptinpis wilakuyashqäpita Jesucristuta chaskikuyashqaykita musyarmi pïmaypis tantiyayan apóstol kashqäta. 3Saynöpami runakuna tantiyayan wilakuyashqäta chaskikur Jesucristo qelqashqan carta kayashqaykita. Say cartataqa manami tintawansu qelqash, sinöqa imayyaqpis kawaq Tayta Diospa Espïritunwanmi. Saynöpis manami parara rumichösu#Éxo. 24.12. qelqash, sinöqa shonquykikunachömi.#Jer. 31.33; Eze. 11.19; 36.26.

4Sayno kaykäyashqaykita musyayä Jesucristo salvamashqanpita Tayta Diosman yärakurmi. 5Wilakuyänäpaq manami yachaq kayashqämansu atiënikuyä, sinöqa Tayta Diosmanmi. 6Paymi yanapäyäman mushuq pactupita#Jer. 31.31. wilakuyänäpaq. Say mushuq pactuqa manami leykunapa munaynincho kawanansipaqsu nikämansi, saypa trukanqa Espíritu Santu tantiyasimashqansino kawanansipaqmi. Leykunapa munaynincho kawarqa wanushnömi kawansi.#Rom. 7.1-6. Espíritu Santupa munaynincho kawarmi isanqa mana ushakaq kawayta tarinsi.

Moisés qelqashqan leykunapitapis Jesucristupa wilakuynin mas ali kashqan

7Parara rumicho qelqaraykaq leykuna runakunata salvananpaq mana kaykaptinpis say leykunata Israel runakunaman Moisés chäsiptin qaqlan fiyupami chipipirqan.#Éxo. 34.29. Say chipipishqan elaqaqla kaykarpis fiyupami chipipirqan. Saymi Moiséspa qaqlanta rikayta kamäpakuyarqansu. 8Moisés apamushqan leykunapis sayno kushikuypaq kaykaptinqa ¿manaku Espíritu Santu apamushqan wilakuy mas kushikuypaq kaykan? 9Mana salvakunansipaq kaykarpis say leykuna ali kaykaptinqa salvamänansipaq kaq wilakuy mas alimi kaykan. 10Say leykuna Espíritu Santu apamushqan wilakuyman manami tinkunsu. 11Saymi ushakänanpaq kaq leykuna kushikuypaq kaptinpis Jesucristupa mana ushakaq wilakuynin mas kushikuypaq kaykan.

12Sayta musyarmi mana mansariypa wilakuyä. 13Manami Moisésnösu Diospa wilakuyninta wilakuyä. Payqa qaqlanta vëluwan sapakurqan chipipiynin elaqaykashqanta Israel runakuna mana rikayänanpaqmi.#Éxo. 34.33. Saynöpami leykuna ushakänanpaq kashqanta mana tantiyayarqansu.

14Moiséspa qaqlan saparashqannömi Israel runakunapa yarpayninkunapis saparaykaqno kaykan. Saymi punta kaq pactuta liyir kananyaqpis tantiyayansu päsaqla kashqanta. Jesucristuta chaskikurraqmi shumaqna tantiyakuyanqa. 15Moisés qelqashqan leykunata liyirpis manami kananyaqpis tantiyayansu. 16Señorninsita chaskikurmi isanqa tantiyakuyanqana.

17Señorninsiqa Espíritu Santumi kaykan. Señorninsipa Espïritunta chaskikurmi librina kaykansi. 18Librina karmi Señorninsita rikaqno kaykansi. Saymi runakuna rikamashpansi kikin Señorninsita rikaqno kaykäyan. Saynöpis Señorninsiqa Espíritu karmi waran waran yanapaykämansi kikin kashqanno noqansipis kanansipaq.#Rom. 8.29; Gál. 4.19; Fil. 3.10.

Currently Selected:

2 Corintios 3: qvhB

Highlight

Copy

Compare