2 Corintios 2

1Nawpata qamkuna kaqman shamur lakikasishqäno yapay lakikasiyta manami munäsu. 2Qamkunata lakikasiptïqa ¿pïlanaraq kushikasimanqapis? 3Saymi shamunäpa trukan cartalata cartakamushkä. Manami munashkäsu shamuptï lakikasiyämänaykita, saypa trukanqa lapansipis kushikunansitami munashkä. Musyarqämi qamkuna kushikuyaptiki noqakunapis kushikuyänäpaq kashqanta.

4Jaqayashla#2.4 Wakin runakunaqa qallayashla o resientikushla niyanmi. kaykäyashqaykita yarparmi say cartata qelqamur fiyupa lakikushpä waqarqä. Manami lakikuyänaykipaqsu cartakamurqä, sinöqa qamkunata seqaypa kuyashqäta musyayänaykipaqmi.

Contran sharkuq runata Pablo perdonashqan

5Conträ sharkuq runaqa manami noqalatasu lakikasimash, saypa trukanqa qamkunatapis lakikasiyäshushkankimi. 6Say runata corrigiyashqayki alinami kaykan. 7Aläpa mana lakikunanpaq perdonar shakyäsiyay. 8Saymi qamkunata ruwakü payta kuyar ali nawikikunapa rikayänaykipaq.

9Say cartata qamkunaman cartakamurqä say runata corrigiyänaykipaqmi. Saynöpami musyayta munarqä cäsukayämashqaykita o mana cäsukayämashqaykitapis. 10Say perdonayashqayki runata noqapis perdonämi. Noqa perdonanäpaq mana kaptinpis qamkuna raykumi Jesucristupa nawpancho payta perdonashkä. 11Musyansimi Satanás imaykanöpapis runakunata jusalikasinanpaq kashqanta. Saymi say runata perdonaptinsi jaqayäsinakuyman#2.11 Wakin runakunaqa qallayäsinakuyman o resientikasinakuyman niyanmi. Satanás jitarpamäshunnasu.

Troascho Pablo lakikushqan

12Troas markaman Jesucristupa ali wilakuyninta wilakuq chaptï manami ima sapapis kashsu. 13Sayno kaptinpis qamkuna kaqpita Tito mana mayakämuptinmi fiyupa lakikurqä. Saymi Troascho qoyänäpa trukanqa Tituta ashiq#2.13 Pabluwan tinkur Tito wilapashqanta musyanaykipaq liyinki 2Cor. 7.6-15. Macedonia provinciaman päsakurqä.#Hech. 20.1.

Tayta Diosta Pablo agradëcikushqan

14¡Tayta Diostami agradëcikü! Paymi Jesucristucho kayaptï imaypis yanapaykäyäman. Saymi wilakuyaptï maysaychöpis runakunata tantiyasin Jesucristuta chaskikur payta reqiyänanpaq. 15Jesucristupa wilakuyninta wilakuyashqäqa inciensupa ali mushkuyninnömi Tayta Diospaq kaykan. Salvakuyänanpaq kaqkunaman y mana salvakuyänanpaq kaqkunamanpis chaykanmi. 16Mana salvakuqkunapaqqa melanaypaq asyaqnömi kaykan. Salvakuqkunapaqmi isanqa kuyaylapaq mushkuyno kaykan. Sayno kaptinqa ¿piraq kikilanpita Jesucristupa wilakuyninta wilakunman?

17Wakinkunaqa imatapis chaskiyänan kashlami Diospa wilakuyninta wilakuykäyan. Noqakuna manami paykunanösu kayä, sinöqa Tayta Dios kachayämash kaptin y noqakunawan pay kaykashqanta musyarmi Jesucristupa jutincho lapan shonqükunawan wilakuyä.

Currently Selected:

2 Corintios 2: qvhB

Highlight

Copy

Compare