1 Corintios 8

Ïdulukunapaq pishtayashqan aysapita yachasishqan

1Ïdulukunapaq pishtayashqan aysakunapita tapukayämashqaykita kanan tantiyasiyäshayki.#8.1 Say wisanqa ïdulukunapa jutinchömi mikuyänanpaq uywata pishtayaq. Jesucristuman wakin yärakuqkuna yarpäyarqan say aysata mikur jusalikuyashqantami. Wakinnami yarpäyarqan mana jusalikuyashqanta. Sayno kayashqanpitami apóstol Pabluta tapukuyarqan. Musyämi <<lapäkunami yachaq kayä>> niyashqaykita. Sayno niyaptikipis wakin yachaqkunaqa orgullösumi rikakuyan. Kuyapäkuq kaqkunami isanqa runa mayinta ali yanapäyan. 2Yachaq kayashqaykita yarparpis manami rasunpaypaqa yachaqsu kaykäyanki. 3Rasunpaypa yachaq runaqa Tayta Diostami kuyan. Sayno runataqa Tayta Diospis reqinmi.

4Ïdulukunapa jutincho pishtayashqan uywakunata mikunansipaq o mana mikunansipaq kashqantapis kanan tantiyasiyäshayki. Musyashqansinöpis ïdulukunaqa manami kawayansu ni munayyuqsu kayan. Saynöpis musyansimi Tayta Dios juklayla kashqanta. 5Sayno kaptinpis wakin runakuna yarpäyan jana pasachöpis y kay pasachöpis saysika dioskuna kayashqantami. 6Sayno yarpäyaptinpis noqansipaqmi isanqa juklayla Dios kaykan. Payqa Tayta Diosmi kaykan. Lapantapis paymi kamash. Noqansipis payta sirvinansipaqmi kawansi. Señor Jesucristupis juklaylami kaykan. Paywanmi Tayta Dios lapantapis kamarqan. Paymi kawaytapis qomansi.#Juan 1.3; Rom. 11.36; Efe. 4.6; Col. 1.16.

7Sayno kaptinpis manami lapan wawqi panikunasu saykunata tantiyayan. Wakinkunaqa ïdulukunata nawpata adorash karmi ïdulukunapaq pishtayashqan aysata mikuyta munayannasu. Say aysata mikurqa jusalikuyashqantami yarpäyan.

8Manami aysata mikushqansipitasu Tayta Dios mas kuyamansi y aysata mana mikushqansipitasu mënus kuyamansi, sinöqa mikushqapis mana mikushqapis iwal-lami kuyamansi. 9Ïdulupaq pishtayashqan aysata mikuyänaykipaq libri kaykarpis cuidä mikuyashpayki manaraq shumaq tantiyaq wawqi panikunata jusalikasiyankiman.

10Yachaq kayashqaykita yarparmi wakinnikiqa ïdulukunapa templuncho aysata mikuykäyanki. Say aysata mikuykaqta rikayäshushpayki ¿manasuraq shumaq manaraq tantiyaq wawqi panikunapis say aysata mikuyta munayanqa? 11Saynöpami yachaq kayashqaykita yarparpis say wawqi panikunata jusalikasiyanki. Sayno jusalikasiyanki paykuna rayku Jesucristo wanush kaykaptinpis. 12Mana tantiyaq wawqi panikunata sayno jusalikasirqa Jesucristupa contranmi ruraykäyanki.#Mat. 25.45. 13Aysata mikushqansipita yärakuq mayinsi ïduluta yapay adoraptinqa aysata imaypis ama mikushunnasu.

Currently Selected:

1 Corintios 8: qvhB

Highlight

Copy

Compare