1 Corintios 7

Majayuqkunapaq yachasikuy

1Kanan tantiyasiyäshayki cartakayämushqaykicho tapuyämashqaykipita. Alimi kanman warmiwan runa mana kakuptin. 2Sayno kaptinpis jukwan jukwan mana kakuyänanpaq cada ünun majayuq kayäsun.

3Runanta warmin cuerpunta ama michäsunsu. Saynöla warminta runanpis cuerpunta ama michäsunsu. 4Majasakaptinnaqa warmipa cuerpun manami kikinpanasu, sinöqa runanpanami. Y runanpa cuerpunpis manami kikinpanasu, sinöqa warminpanami. 5Sayno kaykaptinqa majaykiwan cuerpuykita ama michänakuyaysu.

Wakinkunaqa majanwan wilanakuyan Tayta Diosta manakuyänan junaqkuna päsashqanyaq awantakuyänanpaqmi. Sayno wilanakurqa wilanakuyashqayki junaqyaqla awantakuyanki. Wilanakuyashqayki junaq cumpliskiptin isanqa majaykiwan yapay kakuyanki. Sayno mana rurayaptikiqa Satanásmi mayqaykitapis jusaman ishkisiyäshunki. 6Manami majaykiwan pununaykita micharsu sayno nikä, sinöqa wakinkuna sayno rurayta munayaptinmi.

7Noqapa yarpaynïpitaqa mas alimi kanman lapaykipis noqano majaynaqla kakuyaptiki. Imano kaptinpis Tayta Diosmi kamakäsin wakinninsi majayuq kanansipaq y wakinninsina majaynaq kanansipaq.

8Majaynaqkunata y viüdakunataqa noqa yäsï noqano majaynaqla täkuyänanpaqmi. 9Majaynaq täkuyta mana kamäpakur imarqa majasakäkuyäsun. Chïnäkur o waynäkur kawayänanpa trukanqa majasakäkuyashqan mas alimi kaykan.

10Majayuqkunapaq Señor Jesucristo kaynömi nirqan: <<Runanpita warmi ama rakikäsunsu>>.#Mar. 10.12. 11Saymi runanpita rakikar imarqa mana yapapakuylapa täkunan. Majayuq kayta munarqa runanwanmi amistakunan. Saynölami runa kaqpis warminpita rakikänansu.

12Mayqan wawqipa warminpis rakikayta mana munaptinqa Jesucristuman mana yärakuptinpis warminpita ama rakikäsunsu. Saypita Señor Jesucristo mana yachasish kaptinpis mana rakikänanpaqmi sayno nï. 13Saynöla mayqan panipa runanpis rakikayta mana munaptinqa Jesucristuman mana yärakuptinpis runanpita ama rakikäsunsu.

14Ama yarpäyaysu Jesucristuman majayki mana yärakuq kaptin paywan täyashqayki mana ali kashqanta. Jesucristuman warmi yärakuptinqa runanwan tashqan alimi kaykan. Saynölami Jesucristuman runa yärakuptin warminwan tashqan ali kaykan. Sayno mana kaptinqa wamrankunata Tayta Dios manami yanapanmansu. Isanqa wamrankunata kuyaparmi Tayta Dios yanapaykan.

15Jesucristuman mana yärakuq warmi o runa rakikayta munarqa rakikäkusun. Rakikaptinqa majan librinami kaykan. Tayta Dios manami munansu majayuqkuna mana ali kawayänanta.

16Wawqikuna, tantiyakuyay. Mana rakikaptikiqa capazchir warmiki tantiyakur salvakunqa. Panikuna, qamkunapis tantiyakuyay. Mana rakikaptikiqa capazchir runayki tantiyakur salvakunqa.

Señalakush o mana señalakush karpis, ashmay o libri karpis Tayta Diosta sirviyänanpaq nishqan

17Maysaychöpis wawqi panikunata kayno nirmi tantiyaykäsï: Salvayäshunaykipaq Tayta Dios qayayäshuptiki señalakush o mana señalakush karpis, ashmay o libri karpis Tayta Diosta sirviyay.

18Cuerpuykikuna señalakushta qayayäshush kaptikiqa señalakushla kakuyay. Cuerpuykikuna mana señalakushta qayayäshush kaptikiqa ama señalakuyaysu. 19Señalakush kayashqayki y mana señalakush kayashqaykipis Tayta Diospaq iwal-lami kaykan. Pay munan imano karpis mandamientunkunata cäsukur kawayänaykitami. 20Salvayäshunaykipaq Tayta Dios qayayäshuptiki señalakush o mana señalakush kayashqaykinöla kakuyay.

21Ashmay kaykaqta qayayäshuptikipis ama lakikuyaysu. Sayno kaptinpis ashmay kaykäyashqaykipita pilapis jorquyäshuptiki alimi kanman. 22Jesucristo kayninpa Tayta Dios qayayäshuptiki ashmay kash karpis Jesucristuman yärakur librinönami kaykäyanki. Saynölami Tayta Dios qayayäshuptiki libri kash karpis Jesucristuta sirviyänaykipaq paypa ashmaynin kaykäyanki. 23Tayta Diosmi salvayäshushpayki rantiyäshushkanki. Sayno kaykaptinqa señalakuyänaykipaq niyäshuptiki o ashmay kayashqaykipita yarqukuyänaykipaq niyäshuptiki ama cäsuyaysu. Cäsurqa paykunapa ashmayninno rikakuyanki.

24Wawqi panikuna, sayno kaykaptinqa señalakush o mana señalakush karpis, ashmay o libri karpis Tayta Diosta sirviyay.

Majayuq o japala täkuyänanpaq yachasishqan

25Kananqa japala kaqkunapaq tantiyasiyäshayki. Paykunapaqqa Señor Jesucristo manami imatapis parlakushsu. Sayno kaptinpis Tayta Dios kuyapämar yachayta qoykämaptinqa yäsishqäkunata chaskikuyänaykimi. 26Kanan wisan aläpa nakaykuna kaptin noqapa tantiyaynïpitaqa majaynaq kaqkunaqa japala täkuyanman. 27Majayuq karqa majaykipita ama rakikäyaysu. Japala karqa warmita ama ashiyaysu. 28Sayno kaptinpis warmita ashir manami jusalikuykäyankisu. Saynölami jipashpis majasakarqa jusalikuykansu. Isanqa majayuq rikakur kanan wisan aläpa nakaykuna kaptin masraqmi nakayanqa. Sayno kananta manami munäsu.

29Wawqi panikuna, walkalanami kay pasa ushakänanpaq pishin. Sayno kaykaptinqa majayuq karpis japala kayashqanno kawayäsun.#7.29 Manami warminta kachariyänanpaqsu nikan, sinöqa Tayta Diosta mas sirvir kawayänanpaqmi. 30Lakish kaykarpis mana lakish kaykaqno kawayäsun. Kushish kaykarpis mana kushish kaykaqno kawayäsun. Imata rantirpis saykunaman ama atiënikuyäsunsu.#7.30 Sayno nirqa tantiyasirqan lakish karpis kushish karpis imata rantish karpis Tayta Dios munashqanno kawayänanpaq kashqantami. 31Imaykayuq karpis saykunaman uman churakash ama kayäsunsu. Kay rikaykashqansi pasa ushakänanpaqnami kaykan.

32Manami munäsu yarpachakular kawayänaykita. Warmiynaq runakunaqa Señor Jesucristo munashqanta rurayänanpaqmi mas yarpachakuyan. 33Warmiyuqkunami isanqa warminwan ali kawayänanpaq mas yarpachakuyan. 34Sayno karqa warminta ali rikayänanpaqraq y Jesucristuta sirviyänanpaqraqmi yarpachakuyan.

Saynölami viüdakunapis#7.34 Wakin griego copiakunaqa warmikunapis niyanmi. y jipashkunapis Señor Jesucristo munashqanno lapanchöpis santu kawayänanpaq yarpachakuyan. Runayuq warmikunami isanqa runanwan ali kawayänanpaq mas yarpachakuyan. 35Sayta nï manami majayuq kayänaykita micharsu, sinöqa majayuq kayänaykipaq o majaynaq kayänaykipaqpis shumaq yarpachakuyänaykita munarmi. Saynöpis munaykä shumaq kawar Señor Jesucristuta lapan shonquykikunawan sirviyänaykitami.

36Pï runapa warmi surinpis runayuq kananpaq edäninchöna kaptin y runayuq kayta munaptinqa majasakäsisun. Majasakäsirqa manami jusalikuyansu. 37Sayno kaptinpis majasakäsiyta mana munarqa ama majasakäsisunsu. Isanqa manami pipis majasakäsinanpaq o mana majasakäsinanpaqpis obliganmansu. 38Saymi surinta majasakäsir alita ruraykan. Sayno kaptinpis mana majasakäsir mas alitami ruraykan.

39Runayuq warmi runan kawashqanyaqqa [ley nishqannöla] runalanwanmi tanman. Runan wanukuptinmi isanqa librina kaykan jukwan majasakänanpaq. Sayno kaptinpis Jesucristuta mana chaskikuq runawanqa ama majasakanmansu. 40Majasakänanpaq libri kaptinpis noqapa yarpaynïpitaqa viüda mananami yapapakunmannasu. Sayno nikä noqapis Espíritu Santuta chaskikush karmi.

Currently Selected:

1 Corintios 7: qvhB

Highlight

Copy

Compare