1 Corintios 16

Ofrendata shuntayänanpaq nishqan

1Jerusaléncho kaq wawqi panikunapaq ofrendata shuntarqa#Rom. 15.25-26; 2Cor. 8—9. Galacia provinciacho wawqi panikunata yäsishqänöla qamkunapis shuntayay. 2Semäna arur gänayashqaykipita cada domingu cada ünuyki aykalatapis churayanki. Ama noqa chämuptïraqqa shuntaykäyankisu. 3Shuntayashqayki ofrendata Jerusalénman apayänanpaq wawqikunata akrayay. Chaykamurnami paykunapaq cartata rurashaq Jerusalénman apayaptin wawqi panikuna chaskikuyänanpaq. 4Kamakaptinqa noqapis paykunawanmi aywashaq.

May maypa aywananpaq Pablo wilashqan

5Qamkuna kaqman kutimur Macedonia provinciaparaqmi tumamushaq.#Hech. 19.21. 6Chaykamurqa capazmi tamya killa päsashqanyaq qamkunawan qoyäshaq. Saypitanami wakin markakunamanpis aywanäpaq yanapäyämanki. 7Manami pasädalaqa qamkunata watukayta munäsu, saypa trukanqa Tayta Dios munaptin qamkuna kaqcho täshaqraqmi.

8Éfesuchömi isanqa Pentecostés fiesta chämushqanyaq täshaq. 9Aska runakuna conträ sharkuyaptinpis Tayta Dios yanapaykämanmi kay markakunacho ali wilakuyninta wilakunäpaq. Sayno wilakuptïmi Jesucristuta chaskikuykäyan.#Hech. 19.8-10.

10Wawqinsi Timoteo qamkuna kaqman chämuptin kushishla chaskikuyay. Paypis noqanömi Jesucristupa wilakuyninta wilakuykan.#1Cor. 4.17. 11Paytaqa manakaqman ama churayaysu. Ali kutimunanpaq yanapaykuyälay. Noqakunapis kaycho kaq wawqi panikunawan payta shuyakuykäyämi.

12Qamkuna kaqman wakin wawqikuna shayämuptinmi Apolustapis ruwakurqä qamkunaman shamunanpaq. Sayno ruwakuykaptïpis manami shamuyta kamäpakunsu. Nirkurraqmi may shamunqa.

Carta ushanan

13Imapitapis alcäbula kayay. Imano nakarpis Tayta Diosman yärakuyay. Imatapis mana mansariypa Tayta Dios munashqanno kawayay. 14Pïmaywanpis kuyanakur shumaq kawayay.

15Wawqi panikuna, musyayankimi Acaya provinciacho wawqinsi Estéfanas ayllunkunawan#1Cor. 1.16. Jesucristuta puntata chaskikuyashqanta. Paykunami wawqi panikunata imachöpis yanapaykäyan. 16Saymi qamkunata ruwakü paykunata cäsukuyänaykipaq. Saynöla lapantapis paykunano yanapäshuqnikikunata y yachasishuqnikikunata cäsukuyay.

17Estéfanas, Fortunato y Acaico qamkuna kaqpita watukamaq chaykayämuptin lapaykita rikaqnöraqmi kushikushkä. 18Qamkunata shakyäsishushqaykinölami noqakunatapis shakyäsiyämash. Paykunata y paykunano kaqkunata shumaq respitayanki.

19Asia provinciacho kaykaq wawqi panikunapis qamkunapaq salüdunta apasikayämunmi. Saynöpis Aquila y Priscila#Hech. 18.2. y wayincho shuntakaq wawqi panikunapis qamkunapaq salüdunta apasikayämunmi. 20Lapan wawqi panikunami salüdunta apasikayämun. Jukniki juknikipis qaqlaykikunacho musanakushpayki winchinakuyälay.

21Noqa Pablo kikïmi kay salüdütaqa qelqaykämü.

22Pipis Jesucristuta mana kuyaq kaqtaqa Tayta Dios castiganqami. ¡Señor Jesucristo, juklana kutikalämuy!

23Señor Jesucristo yanapaykuyäläshunki imaypis ali kawayänaykipaq. 24Jesucristuman yärakuq mayï kayaptikimi lapaykikunata kuyä. [Amén.]

Currently Selected:

1 Corintios 16: qvhB

Highlight

Copy

Compare