Filemón 1
1
Pablopi Filemónna Toyapi
1Cristo Jesús do'ire yë'ë Pablo tse̱a cua̱ñosiquë pa'iquëpi Maija'quë do'iquë, Timoteo ja̱'re co̱ni toyayë, iye toya ja'hua, më'ëna Filemón yëquë oiquëpi te'e co'amañare nequëna. 2Cui'ne më'ë huë'ena sehuosicohua'i tsi'sisicohua'ireje̱ cajë toyayë. Cui'ne Maija'quë do'ico Apiareje̱ cui'ne Arquipore cajë toyayë, te'e yëquë yo'oyeje̱ pa'ye tutu yo'oquëreje̱. 3Maija'quë Diusupi cui'ne Jesucristopi ñacaina, ai yo'oye peoquëna, jo'cua, de'oye pa'ija̱jë.
Pa̱ire Oiye, Cui'ne Maija'quë Pa'iji, Filemón Cuasaye
4-5Maija'quëre sehuocohua'ire më'ë ai oiyere cui'ne Jesure necaiquëre pare cuasayere yecohua'ipi quëajëna, asaquëpi yë'ë Maija'quëre se̱ñe ñape si'anë më'ë pa'iyere cuasaquë de'oji caquë pëpayë, i̱te se̱ maca. 6Ja̱je pa'ina, më'ëpi yëquë cuasayeje̱ pa'ye Maija'quë pa'ire paji cuasaquëpi Cristo ja̱'re pa'ijë, jaiye de'oye yo'oye payere nuñerepa asa ti̱'ajaquë caquë se̱cacaiyë. 7Cui'ne ai sihuayë, më'ë Maija'quë do'iquëpi pa̱ire oiquëpi, sehuosicohua'ire co̱caina, ai oima'pë pa'ijëna, asa huajëquë.
Pablopi Cacaiye Onésimo Pa'iyere Caquë
8Cristo jëjo daoquë a'ë caquë më'ë yo'o ja̱'ñere cua̱ñe tutu paquëta'a, 9yë'ë Pablo ai hua̱noupi Cristo Jesús do'ire tse̱a cua̱ñosiquë pa'iquëpi pa̱ire oiyere papi se̱ñe yëyë, më'ëre. 10I̱ño co sitore pa'i quëaquëna, asani Onésimopi sehuoni yë'ë mamaquëje̱ pa'i de'osiquëni caquë se̱ñë, më'ëre.
11Ja̱'në tsoe Onésimo jo'yaë pa'i maca coa pa'iquë paji'i, yure cato necaiquëre papi, më'ëre cui'ne yë'ëreje̱. 12Ja̱je pa'ina, yë'ëpi ti̱'aquëna, sihuayeje̱ pa'ye i̱te sihuajë̱'ë, cui'naëni më'ë quë'rona jëjo saoyë, yure. 13De'o coca quëa do'ire tse̱asiquë pa'ina, yë'ëre më'ë co̱catira'si sa'rore, pëani co̱caija̱quë cara'huë. 14Ja̱je ca'ñe pa'ita'a pa̱ñë, më'ëpi de'oji cuasama'ëna yo'oyere coequë. Më'ë yë'ëre co̱caiyepi më'ëse'e cuasaquë yo'oye pa'ija̱quë caquë. Je̱oconi cua̱ñese'eje̱ pa'ye peoja̱quë, 15cuasayë. Yë'ëta'a Onésimopi më'ëre je̱oconi saji'i, a'ri maña tsoe pa'i sitopi yureta'a ti pa huesoja̱quë caquë. 16Ja̱je pa'ina, jo'yaëje̱ pa'ire paye peoji, jo'ya nesiquëre se̱ña maca pa'i api. Ja̱je cani cayë, yo'jeije̱ pa'ire papi caquë. I̱te yë'ë ai yëyë. Cui'ne më'ëpi i̱te jerepa yëye pa'iji, Ëjaë Jesure cuasa do'ire Maija'quë do'iquëre sëte.
17Ja̱je pa'ina, më'ëpi yë'ë cajei sëte, yë'ëre sihuaquë pëpayepi pëpajë̱'ë, i̱te. 18Më'ëre co'aye yo'osiquë pa'ito pa̱nita'a, co'amaña do'ire sa̱iñe pa̱quë pa'ito yë'ëni se̱jë'ë. 19Yë'ë Pablopi sa̱icasi'i. Yë'ë jë̱tëpi toyayë, iye toya e'que, yë'ë quëaquëna, sehuosi do'ire, më'ëje yë'ëre sa̱iñe payë caquë quëa sëto'ñe pa'ita'a pa̱ñë. 20De'oji. Maija'quë do'iquë, Cristore cuasaquë sëte yë'ë case'eje̱ necaijë̱'ë, oi pa'iquëpi quëcoja̱quë, de'oye yo'o huasojë̱'ë.
21De'oye sehuocasipi caquë toyayë, më'ë yo'o ja̱'ñere asaquë cui'ne asayë, më'ë yë'ë case'e jerepa de'oye yo'o ja̱'ñere. 22Cui'ne yequeje̱ cayë, më'ëre. Yë'ë sani pëaja̱'to necaijë̱'ë. Uteyë, Maija'quëpi mësaru se̱ñere asaquë. Necaina, sani ñasi'i caquë.
Tëjiyerepa Pëpaquë De'oye Pa'ijë̱'ë, Case'e
23Ja̱ro mësarute pëpa saoji, Epafras Cristo do'ire yë'ë ja̱'re co̱ni tse̱a cua̱ñosiquë pa'iquëpi. 24Cui'ne Marcos, Aristarco, Demas cui'ne Lucas yë'ë yo'oquëna, co̱caicohua'ipi pëpayë.
25Jesucristopi ñacaija̱quë si'ahua'ire mësarute. Ja̱je pa'ija̱quë.
Currently Selected:
Filemón 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.