Tito 3
3
Sehuosicohua'i Yo'oye
1Pa̱i ëjaohua'ire, cui'ne pa̱ire cua̱ñe tutu pacohua'ire, de'oye i̱ohua'i cua̱ñeñe sehuojë pa'ija̱jë, cui'ne de'o co'amañase'e neñe yëcohua'ipi pa'ija̱jë caquë quëajë̱'ë. 2Cui'ne yecohua'ire co'acohua'i a'ë cama'cohua'ipi, uihuaye yëma'cohua'ipi, de'oye pa̱ire yo'ocohua'ipi, cui'ne joyore papi teaye pa'iohua'i pa'iyere i̱ñojë, si'aohua'ire de'oye yo'oja̱jë caquë.
3Ja̱'në maije huesëcohua'ipi Maija'quë caye sehuocaima'cohua'ipi, ne huesësicohua'ipi paë'ë. Pa'ijë coa si'aye mai yëye yo'ocohua'ipi tse̱a cua̱ñosicohua'ipi paë'ë, co'ayena. Ja̱je co'ayere pa'ijë yecohua'i co'amañare ëa ñajë pë̱icohua'ipi, cui'ne pa̱ire oima'cohua'ipi, sa̱'ñe coecohua'ipi paë'ë. 4Ja̱je pa'ijëna, mai Diusu, maire huasoquëpi si'a pa̱ire de'oye necaiyere cui'ne pa̱ire oiyere i̱ño maca, 5ja maca huasopi, maire. Maipi de'oye yo'osi do'ire huasoye pa̱pi. Coa i̱pi oi teaye ñani huasopi. Ja̱je huasoquë co'ayere tsoa to̱quë, huajë pa̱ire nepi. Nequë Maija'quë joyopi huajëye pa'iye i̱sipi. 6Cui'ne mai Ëjaë Jesucristo maire huasoquë do'ipi jaiye i̱sipi, i̱ de'o joyore. 7Maipi co'acohua'i pa'isicohua'ipi i̱ oi do'ipi de'ocohua'i pa'ijë ti pani huesëyere mai utejë pa'iyere paja̱jë caquë.
8Iye coca nuñere pa'ë. Ja̱je pa'ina, më'ëre cua̱ñeñë. Iyere ai si'anë cua̱ñequë quëajë̱'ë, Maija'quëre sehuocohua'ipi asajë de'oyese'e nejë pa'ija̱'cohua'ire. Iye coca si'a pa̱ire co̱caiye a'ë, cui'ne de'oye a'ë. 9Ja̱je pa'ina, huesëohua'i cayere aipë cocare cui'ne cua̱ñese'e caye ayere ca huëoni yë'ose'e cajë uihuayere, yo'oma'pë pa'ijë̱'ë.
10Sehuosicohua'ire te'e pa'iye pa̱jë'ë caquë huahuequë yo'oquë pa'ito soini yëhuojë̱'ë. Te'e pa̱nita'a cayayerepa yëhuorena, asama'ë pa'ito eto saojë̱'ë. 11Eto saoni nuñe cuasama' do'ire ne huesësiquërepa pa'iji, i̱ co'aye yo'oyepi nejoquëna, cuasajë̱'ë.
Pa̱i Ñape Yo'o Ja̱'ñe Quëaye
12Artemasni pa̱nita'a Tíquiconi më'ëre ñaja'quëre jëjo saosi maca esa daijë̱'ë, Nicópolisna yë'ëre ti̱'ani ñasi'i caquë. Ja̱rona oco tëcahuë pëasi'i cuasa nëohuë. 13De'oye co̱caijë̱'ë, pa̱i yo'oye asaquë ne de'huaquëre Zenasre cui'ne Apolosre, si'aye caraye peoquëna, ai yo'oma'pë so'o saija̱'cohua'ire. 14Ja̱je yo'oquëna, mai tse̱cohua'ije̱ de'oye yo'oyere ye'yeja̱jë, peocohua'i ai yo'ocohua'ire co̱caiye. Ye'yejë yo'ojë de'oye yo'o pa̱i pa'ija̱jë caquë.
Tëjiyerepa Pëpaquë De'oye Pa'ijë̱'ë Case'e
15Si'aohua'i yë'ë ja̱'re co̱ni pa'icohua'i më'ëre pëpayë. Ja̱je cui'ne ja̱ro pa'icohua'ire si'aohua'ire pëpacaijë̱'ë, cajeohua'ire Maija'quëre pa'iji cuasacohua'ire. Maija'quëpi ñacaiyepi si'aohua'ire mësarute pa'ija̱quë. Ja̱je pa'ija̱quë.
Currently Selected:
Tito 3: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.