Gálatas 1
1
Pablo Toyase'e Galacia Sehuosicohua'ire
1Yë'ëre Pablore pa̱ipi cani neni jëjo daosiquë peoyë. Coa Jesucristopi, cui'ne Diusu Maija'quëpi, Jesús ju̱'isiquëre huëosiquëpi jëjo daosiquë a'ë, cui'ne 2si'aohua'i Maija'quë do'ijë yë'ë ja̱'re i̱ño pa'icohua'ije̱, mësarute yë'ë ja̱'re toyayë, iye ja'hua sehuosicohua'i Galacia yeja pa'icohua'ina. 3Diusu Maija'quëpi cui'ne Jesucristopi co̱ni, mësaruna coa caraja̱iñere cui'ne jo'cua de'oye pa'iyere i̱sija̱jë. Ja̱je pa'ina, 4yure mai co'a yeja pa'icohua'ini, huasosi'i caquë Jesucristo mai do'ire ju̱cacaji'i, Maija'quë Diusu yëyepi. 5Ja̱je pa'ina, Maija'quëse'ere de'oquëre pa'ni cajë sihuaye pa'iji. ¡Ja̱je pa'ija̱quë!
Peoji, Yequë Huaso Coca
6Cristo necai do'ipi Maija'quë mësarute soisicohua'ipi, yequë huaso cocare tui huëoni cuasama'topi Maija'quëre tuiye je̱orena, ña quëquëyë. 7Nuñerepa cayë, mësarute yequë huaso coca ti peoji. Ja̱je peoquëta'are mësarute yecohua'ipi ca co̱'me huesoyë, Cristo huaso cocare ti̱ñe po̱nañu'u cacohua'ipi. 8Ja̱je pa'ina, huaso cocare yecohua'ipi ti̱ñe quëacohua'i pani ti nejosicohua'i pa'ija̱jë. Yë'ëpi tayo ti̱ñe quëaquë pa'itoje̱ nejoñe pa'iji. Pa̱nita'a hui̱ñaë ma'tëmo daisiquëpi ti̱ñe quëaquë pa'ito ti nejoñe pa'iji. 9Tsoe ja̱'në mësarute case'ere ca co̱ñë, yecohua'ipi mësaru du'ru macarepa huaso coca asani de'huase'eje̱ pa'ye quëama'cohua'i pani ti nejosicohua'i pa'ija̱jë.
10Ja̱je pa'ina, ¿yë'ëni pa̱ipi de'oquë api, caja̱jë caquë yë'ë yo'oye? ¿Pa̱nita'a Maija'quëpi de'oji, caja̱quë caquë yo'oye? Ja̱je pa'ina, yë'ëpi pa̱ipi de'oquë api caja̱jë caquë yo'oquë pani Jesure necaquë peoyë.
Me De'o U'ni, Pablo Maija'quë Jëjo Saoquë
11Yë'ë quëaye huaso coca pa̱i cuasase'e pa'ima'ë pa'iji. Ja̱je pa'ina, Maija'quë do'ijë, mësarupi pa̱i cuasaye a'ë cuasama'pë pa'ijë̱'ë caquë quëayë. 12Ja̱je pa'ina, pa̱ipi yë'ëre iye coca i̱sima'pë paë'ë. Cui'ne pa̱ina ye'yema'ë paë'ë. Coa Jesucristopi yë'ëre iye coca ta̱'ñe asaye necaji'i. 13Ja̱ yë'ta'a judío pa̱i sehuoyere sehuoquë pa'inë, yë'ëpi Maija'quëre sehuocohua'ire tuniroja̱i nejo saosi'i caquë yo'ose'e asahuë, mësaru. 14Ja̱je pa'ina, judío pa̱i sehuoyere yë'ë jerepa ta̱'ñe asaquëpi yë'ë cajeohua'ire yë'ë ja'ye o̱metëca pacohua'ire tëto saisiquë paë'ë, yë'ë aipë case'ere ai de'oye nuñerepa sehuoquë pacacaiquë paja̱'quë caquë pa'i do'ire. 15Ja̱je pa'ita'are Diusupi ja̱ yë'ëre co̱ama'në sahuapi. Ja̱je pa'ina, i̱ ai oiyepi soipi, yë'ëre. 16Yë'ëre i̱ñopi, i̱ mamaquëre yë'ëpi judío peocohua'ire huaso coca quëaja̱quë caquë. Ja̱je yo'osi maca yecohua'ini se̱ni asasi'i caquë yo'oye pa̱huë. 17Cui'ne saima'ë paë'ë, Jerusalénna, Jesús tsoe jëjo daocohua'i ye'yayere ye'yesi'i ñasi'i caquë. Ja̱je yo'oma'ë, tsoe nëiñe peoyerepa Arabiana saë'ë. Saisiquëpi jeteyo'je Damascona co'ihuë.
18Tres o̱metëca tëto sai maca Jerusalénna saë'ë, Pedrore ñasi'i caquë. Sani i̱ ja̱'re co̱ni quince mu'seña pëahuë. 19Ja̱je pa'iquëta'are ñama'ë paë'ë, yecohua'ire Jesús jëjo saocohua'ire. Coa mai Ëjaë yo'jei Jacobose'ere ñahuë. 20Care payë, Maija'quë ña hue̱'ñana, më'ëre yë'ë iye toyaye nuñere pa'ë.
21Ja̱ jeteyo'je saë'ë, Siria yejana cui'ne Ciliciana. 22Ja̱ maca cato Cristore sehuocohua'i Judea yeja pa'icohua'i yë'ëre pare ñama'cohua'ipi paë'ë. 23Coa yecohua'ipi “ja̱'në maire jo̱sa yo'oquë pa'isiquëpi yure Maija'quë pa'iji cuasayere quëaquë cu'iji. Ja̱'në nejo saosi'i caquë yo'oquë pa'isiquëpi cajë quëayese'e asacohua'i paë'ë.” 24Ja̱je pa'ina, yë'ëre de'oye yo'osi do'ire cuasajë Maija'quëre ai de'oji cajë sihuajë paë'ë.
Currently Selected:
Gálatas 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.