2 Corintios 13
13
1Iye do'i saise'e pa'ija̱'coa, yë'ë mësarute toaso̱ñe acore do'i saico. Te'ire sa̱ñope coca caye pa'ito ne de'huaye pa'iji, cayaohua'i pa̱nita'a toaso̱cohua'i, i̱ti ñasicohua'ipi cajëna. 2Ja̱je pa'ina, ti̱jupë yure ca co̱ñë, so'ore pa'i. Yë'ë ja̱'në cayaye acore do'i saisi maca mësarure pana ñaquë case'eje̱ ca co̱ñë. Ja̱'në co'aye yo'ojë pa'isicohua'ire, cui'ne si'aohua'ire cayë. Yë'ëpi co'i co̱siquë pani, mësaru tayoye coa ñañe pa'ija̱'quë a'ë. 3Ja̱ maca ja̱je yë'ëpi cani i̱ñoquëna, mësaru asaja̱'cohua'i a'ë. Yë'ë caye cato Cristo case'e a'ë. Ja̱ case'epi mësaruna tutu caraja̱iñe peoji, Cristo tuturepa quë'i coca'ë. 4Ja̱je pa'iquëta'are Cristore tutu peoquëre que̱ni huani je̱oñeje huani je̱ohuë. Huani je̱osicohua'ita'are Maija'quë tutupi huajëquëre papi pa'iji. Ja̱je pa'ina, cui'ne yëquëje̱ i̱ tutu peoquë pa'ise'e ayere co̱ni pa'icohua'ije̱ i̱ ja̱'re tsioni pa'i do'ire Maija'quë tutupi pa'ija̱'cohua'i a'ë, mësarute necaiyere cajë.
5Mësaruja̱'a ñare pajë co'ye neñajë'ë, nuñerepa yëquë Maija'quë pa'ire paji cuasayere pa'iye cajë. Neñajëna, Cristopi mësaru ja̱'re co̱ni pa'ima'quë pa'ito coa cacohua'i pa'iyë. 6Ja̱je pa'ina, cuasayë, mësarupi neñasicohua'i pa'ijë, yëquëreje̱ tayoma'pë de'oyerepa pa'icohua'i a'ë, asa ti̱'ajajë cajë uteyë. 7Ja̱je pa'ina, mësarupi co'aye yo'oma'pë pa'ija̱jë cajë Maija'quëre se̱cacaiyë, mësarute. Yëquëpi jerepa pa'iohua'ipi ne ti̱'ahuë cajë se̱ñe pa̱ñë. Coa ai jerepa yëquë cato, mësarupi de'oye yo'oja̱jë cajë se̱ñë. Yëquëpi tayose'eje̱ pa'iohua'i ña cua̱ñotoje̱. 8Yëquë cato nuñerepa yo'oyere sa̱ñope yo'oma'cohua'i a'ë. Coa ai jerepa nuñerepa yo'oyere ñese co̱caicohua'i a'ë. 9Ja̱je pa'ina, sihuayë, yëquëpi tutu peocohua'i pa'ijëna, mësarupi tutu quë'iohua'i pa'ito. Ja̱je pa'ina, mësaru de'ocohua'irepa pa'iye ti̱'añere cajë, Maija'quëre si'anë se̱cacaijë pa'icohua'i a'ë. 10Ja̱je pa'ina, yë'ë ja̱ yë'ta'a mësaru quë'ro saima'në iye toya ja'hua toya saoyë, yë'ë mësaru quë'ro ti̱'asi maca, yë'ëre Ëjaëpi mësarute nejoma'ë, joyo pa'iyere ñese mësarute mëocaija̱'a tutu i̱sise'epi, jëayerepa yë'ë cua̱ñequërepa pa'i tutupi mësarute cayere coequë, ja̱je yo'oyë.
11De'oji, yure ca tëjihuë. De'oye sihuajë pa'ijë̱'ë. Mësaru pa'iyepi de'ocohua'irepa pa'iye po̱nëñere yo'ojë pa'ijë̱'ë, yë'ë case'ere pa'ijë̱'ë, cui'ne jo'cua de'oye sa̱'ñe de'oye yo'ojë pa'ijë̱'ë. Ja̱je pa'ijëna, Maija'quë pa̱ire oiquëpi, cui'ne jo'cua de'oye pa'iye i̱siquëpi mësaru ja̱'re pasipi. 12Sa̱'ñe pëpajë sihuajë̱'ë, si'si peoyere papi. 13Mësarute pëpa saoyë, si'aohua'i Maija'quë do'ijëpi.
14De'oji. Mai Ëjaë Jesucristo, coa i̱siyepi, Maija'quë mësarute oiyepi, cui'ne Maija'quë joyo si'anë mësaru ja̱'re pa'iyepi, si'aohua'ire mësarute pa'ija̱quë.
Currently Selected:
2 Corintios 13: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.