Colosenses 1
1
Pëpayë
1Yë'ë Pablopi Maija'quë yëyepi Jesucristo jëjo saoquë de'osiquëpi, Maija'quë do'iquë Timoteo ja̱'re co̱ni, 2iye toya ja'hua Cristore asa do'ire Maija'quë do'ijëpi Colosas daripë pa'icohua'ina, Maija'quë tse̱cohua'ina sehuosicohua'ina cajë toyayë. Maija'quë mësarute oi i̱ coa i̱siyepi jo'cua de'oye pa'ijë̱'ë.
Sehuosicohua'ire Pablo Se̱cacaiye
3Si'anë mësaruni cajë se̱cacaiyë, Maija'quëna, Jesucristo pëca ja'quëna de'oji cajë. 4Mësaru Jesucristore pa'ire paji cuasajë pa'icohua'ipi. Si'aohua'ire Maija'quë tse̱cohua'ire oijë pa'iyere quëajëna, asa do'ire pajë se̱ñë. 5Ja̱je mësaru cato yo'oyë, mësarute caquë de'huacaise'e ma'tëmore pa'iji cajë ute do'ipi. Iye uteye mësaru ti̱'ahuë, nuñerepa huaso cocare quëajëna, asasi do'ipi. 6Mësarute quëajëna, asasi cocapi ai de'oco si'a hue̱'ña quë̱iona, tëayë. Mësaru Maija'quë oiyere asani iye oiye nuñere pa'ë cajë asasi maca mësarute yo'ose'eje̱ pa'ye yequë pa̱ireje̱ yo'oji. 7Iye cocare pare mësarute yëquë oiquë Epafraspi ye'yapi, yëquë ja̱'re co'amaña nesiquëpi cui'ne mësaru Cristore necaiquëre pare ñaquëpi. 8Ja̱ëpi dani yëquëre quëapi, mësaru pa'iye cui'ne mësaru joñoapi sa̱'ñe oijë pa'iyere.
9Mësaru pa'iye quëajëna, asasi maca acohua'ipi, mësarute je̱oma'pë Maija'quëre se̱cacaiyë, i̱pi si'aye i̱ yëye, joyo pa'iye ta̱'ñe asaye i̱siquëna asajë pa'ija̱jë cajë. 10Ja̱je asa ti̱'acohua'i pa'ijë yureta'a si'aye de'o co'amañase'e quë̱iñeje pa'ye yo'ojë, Ëjaë tse̱cohua'i sëte i̱ sihuaquë ñañere yo'ojë, cui'ne ai jerepa Maija'quë pa'iyere asa ti̱'ajë pa'ijë̱'ë cajë. 11Ja̱je pa'ina, cui'ne se̱ñë, i̱te, mësarute i̱ de'o tuture papi tutu quë'iohua'ire necaija̱quë cajë. Ja̱je necaina, tutu i̱si cua̱ñosicohua'i pa'ijë, yo'o jujaye peoyerepa dahuëre yo'ojë sihuajë si'aye quëco ti̱'ajajë cajë. 12Ja̱je quëco ti̱'acohua'i pa'ijë yureta'a Maija'quëre sihuajë pëpaja̱'cohua'i a'ë, i̱ tse̱cohua'ire i̱si co'amaña ayere co̱ni mia hue̱'ñare pana paja̱'cohua'ire ne de'huasiquëre. 13-14Maija'quëpi maire, nea hue̱'ñapi jo'yaohua'ire pacohua'ini etoni mai tayose'ere tsie do'ipi sa̱i de'huacani i̱ oiquërepa i̱ mamaquë cua̱ñe te̱'tena ñopi.
Cristo Ju̱cacaisi Do'ipi, Maija'quë Cajeohua'i Pa'iye
15Maija'quë ña cua̱ñoma'quëpi i̱ mamaquëja̱'a ti̱ña ña cua̱ñoquë daji'i. I̱ mamaquë cato si'aye peo'në aquëre papi. 16Ja̱ë ja̱'re co̱ni Maija'quë si'aye iye yeja pa'iye cui'ne ma'tëmo pa'iye de'huapi, mai ña ti̱'a ma'ñe, cui'ne mai ñañe de'huapi. Ja̱je cui'ne si'aye cua̱ñeñere, meñe cua̱ñe tutu payere, ëjaë pa'iyere, jo'ya ne tutu payere Cristo ja̱'re co̱ni de'huapi, i̱ tse̱ pa'i ja̱'ñere. 17Ja̱je pa'ina, Cristo cato si'a co'amaña peo'në du'ru pa'isiquë api. Ja̱je pa'ipi i̱pi ñacaina, i̱ tutupi si'aye de'oye i̱ti pa'i macare pa'iji. 18Cui'ne yequeje̱ Cristo cato sehuosicohua'i si̱opë api. Ja̱je pa'ina, sehuosicohua'ire pa'iye i̱siquëpi du'ru pa'iquëre papi si'aye du'ruja̱'a pasi'i caquë ju̱'iñeje ju̱ni huëji'i. 19Ja̱je pa'ina, Maija'quëpi sihuapi, si'aye i̱ pa'iyepi Cristore pa'ina. 20Ja̱je pa'ina, Maija'quë Cristo do'ija̱'a si'a iye yeja pa'icohua'ire cajeohua'i de'osi'i cuasapi, ma'tëmo acohua'ije̱ pa'iohua'ire, cuasaquë Cristo cruz ju̱'i do'ija̱'a cajeohua'ire de'huapi.
21Ja̱'në mësaru joñoapi co'aye cuasajë yo'o do'ire Maija'quë sa̱ñope yo'ocohua'ipi ti̱ohua'i paë'ë, pa'isicohua'ipi. Yure cato Maija'quë cajeohua'i de'ohuë, 22Cristo ai yo'oquë ju̱cacaisi do'ipi. Iye cato yo'opi mësarupi i̱ ña hue̱'ñare pana i̱na i̱sicohua'ipi ti si'si te̱'ña peocohua'ipi pa'ijëna, pasi'i caquë. 23Ja̱ ñaquë payere ti̱'añere cajë mai utejë pa'iyere, huaso coca mësaru asase'ere ti hua saima'pë, Maija'quë pa'ire paji cuasayere o̱cue pa'i macarepa cuasajë tuiye pa'iji. Iye cocare si'a hue̱'ña quëacaiyë, yë'ë Pabloje̱ ja̱re quëacaiquë pa'iyë.
Pablo Sehuosicohua'ire Necaiye
24Cristo i̱ ca̱pë acohua'ire oi ai yo'ose'e carayere, yë'ë ca̱pëpi mësaruni caquë ai yo'oquë ne saocai yure cato ai sihuayë. 25Ja̱je pa'ina, Maija'quëpi yë'ëre sehuosicohua'ire necaija̱'quëre nepi. Neina, i̱ cua̱ñe nëose'eje̱ pa'ye mësaru de'oye pa'i ja̱'ñere caquë si'aye i̱ coca quëacaiquë pa'iyë. 26Ja̱je pa'ina, tsoe hue̱'ña o̱metëcana yahuese'e pa̱i asa ma'ñe pa'ise'ere yureta'a i̱ tse̱cohua'ina i̱ñose'ere ja̱re quëayë. 27Maija'quëpi yë judío pa̱i peocohua'ina, iye pa̱i asa ma'ñe yahuese'ere de'oyere pare i̱ñopi. Ja̱ cato Cristopi mësaruni pa'iye a'ë. Ja̱ë api, mësaru utejë pa'iquë de'oquërepa.
28Yëquëpi Cristo ayere quëayë. Si'aohua'ire de'oyerepa asa ti̱'ajajë cajë ye'yajë cui'ne yëhuoyë. Ja̱je yo'ojëna, Cristona tsiosicohua'ipi de'oyerepa pa̱i ñape ai de'osicohua'i pa'ija̱jë cajë. 29Ja̱re caquë yë'ë, si'a tuturepa yo'oquë neñë, Cristo cua̱ñe tutu yë'ëre i̱siyepi.
Currently Selected:
Colosenses 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.