Hebreos 2
2
Ña Tayoye Pa̱ñu'u Huasosicohua'i Pa'iyere
1Ja̱je pa'ina, mai asasi cocare de'huarepa asacaijë pañu'u, hua saiye pa̱ja'cohua'i. 2Maija'quë cua̱ñeñere hui̱ñaohua'ipi quëase'e nuñerepa coca paji'i. Ja̱je pa'ina, i̱ti de'oye sehuocaima'pë co'aye tayo yo'osicohua'i si'se cua̱ñoahuë'ë, nuñerepa co'a do'ire. 3Ja̱je pa'ito ¿mai me jëaja̱'cohua'i a'ni, iye maire huasoye jaiyere ña tayosicohua'i pani? Iye huaso cocare mai Ëjaëpi du'ru macarepa pa̱ire quëapi. Ja̱ jeteyo'je i̱ quëaye asasicohua'ipi nuñerepa coca'ë cajë asani maireje̱ de quëahuë. 4Cui'ne Maija'quëje̱ i̱ cocare pa'ë caquë i̱ñoquë, pa̱i yo'o ti̱'a ma'ñere jaiye yo'o i̱ñopi, ja̱ohuaija̱'a, i̱ joyo tutu pa̱i ñapere i̱ yëyeje̱ i̱sisi tutupi yo'oquë.
Jesucristo Pa̱ije Pa'i De'ose'e
5Maija'quë hui̱ñaohua'ina i̱sima'ë paji'i, ja̱ohua'ipi ëjaohua'i pa'ijë yequë mu'se pa'ija̱'a yeja, mai se cacore cua̱ñejajë caquë. 6Ja̱je pa'iquëta'are yequë hue̱'ña toyase'ena te'i quëaquë caji:
I̱na, Diusu më'ëpi i̱te hua̱nëyema'ë cuasahuë.
Ju̱ni huesë ca̱pë hue'ere do'ire më'ëpi ai co'a ju̱'i co̱casi'i caquë yo'ohuë.
7Ja̱je pa'ina, më'ëpi i̱te hui̱ñaohua'i huë'ehuë maca pa'ire nehuë, coa nëhui tëcahuë ja̱je pa'ija̱quë caquë:
Ja̱je pa'isiquëta'are i̱te de'oyepi ëja de'huani, si'aye më'ë de'huase'e cua̱ñequëre Ëjaëre pare nehuë, më'ëpi.
8Si'aye i̱ quë̱o huë'ehuëna të'ya meni saocaë'ë, më'ëpi.
Ja̱je Maija'quëpi i̱ quë̱o huë'ehuëna të'ya meni saopi, ti te'oreje̱ hue'sena o̱añe pa̱pi. Ja̱je pa'iquëta'are mai ja̱ yë'ta'a ñama'pë pa'iyë, si'a co'amaña i̱te de'oye sehuocaire. 9Ja̱je pa'iquëta'are ñañë, Jesuni nëhui tëcahuë hui̱ñaohua'i huë'ehuë maca pa'i pa'ija̱quë caquë Maija'quë nesiquëni. Ja̱ëni Diusupi maini oi si'aohua'i do'ire ju̱cacaija̱quë cuasa nëopi. Cuasa nëoëna, ai yo'oquë ju̱'isi do'ire yure de'oyepi ëja de'huasiquëpi si'aohua'ire jerepa pa'i pa'iji. Pa'ina, ja̱ëni ñañë, mai.
10Si'aye Maija'quë co'amañase'e pa'iji, i̱pi quëcoquëna. Ja̱je pa'ina, Maija'quë cato yëji, si'aohua'i i̱ mamajëpi i̱ de'o co'amañare co̱ni payere. Ja̱je pa'ina, Jesucristoni i̱ohua'ire huasoquëni de'oquëre pare nepi, i̱ ai yo'o do'ipi. 11Ja̱je pa'ina, Jesucristo cui'ne i̱ huasosicohua'i co̱ni si'aohua'i te'ini pëca ja'quëre payë. Ja̱je pa'ina, Maija'quë mamaquë maire yo'jedohuë hue'yoye ca'rama'ë pa'iji. 12Toyase'e ja̱je pa'ina, caji:
Më'ë pa'iye ayere casi'i yë'ë yo'je tsi̱re
cui'ne jë̱jësi'i, jai pa̱i tsi'si sitona më'ëre sihuaquë.
13Cui'ne caji, yequeje̱:
Maija'quëna yë'ë cato quëcosi'i.
Cui'ne ti̱jupë caji yequeje̱:
Iye macare pa'iyë, Maija'quë yë'ëre i̱sisi mamajë ja̱'re co̱ni.
14I̱na i̱sisi mamajë cato te'e ca̱përe, cui'ne te'e tsiere hue'ecohua'i a'ë. Ja̱je cui'ne Jesuje̱ pa̱ina ai de'oni te'e ca̱pë cui'ne te'e tsie hue'equë paji'i, pa̱i hue'eyere. Ja̱je pa'ipi ju̱ji'i, i̱ ju̱'iñepi huati huani je̱o tutu jiosi'i caquë. 15Jioni ne huasopi, si'a mu'seña ju̱'iñere ca'ra do'ire tse̱a cua̱ñosicohua'ije̱ pa'iohua'i pa'isicohua'ire. 16Ja̱je pa'ina, daima'ë paji'i, hui̱ñaohua'ini co̱casi'i caquë. I̱ cato Abraham tsëcapëni co̱caiyere caquë daji'i. 17Ja̱ co̱caiyere caquë maije pa'irepa de'opi, Maija'quë ña hue̱'ñare pana, de'oyerepa Maija'quë aye yo'oye ñacai Ëjaëre papi, teaye ñani co̱caiquëre papi, cui'ne i̱ ai yo'osi do'ipi pa̱i co'aye yo'oyere sa̱i to̱caiquërepa pasi'i caquë. 18Ja̱je pa'ina, neña cua̱ñoquë, ai yo'oquë asasiquëpi, yure maire co̱cai cua̱ñoquë pa'ija̱'quë api, neña cua̱ñojë ai yo'ocohua'ire.
Currently Selected:
Hebreos 2: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.