Hebreos 13
13
¿Me Diusu Yëye Yo'ocaiye Pa'iquë'ni?
1Maija'quë do'ijë sëte je̱oma'pë si'anë sa̱'ñe oijë pa'ijë̱'ë. 2Cui'ne mësaru huë'ena daicohua'ire oijë de'oye necaiye hua̱nëyema'pë pa'ijë̱'ë. Ja̱je yo'ojë yecohua'i je̱'quë hui̱ñaohua'i a'ë cuasama'pë huesërepa de'oye i̱ohua'i huë'ena necaijë pëpa'a̱huë'ë.
3Cuasacaijë̱'ë, co cua̱ñosicohua'ire, mësarupi i̱ohua'i ja̱'re co sitore pa'iyeje̱ pa'ye. Mësaruje̱ cui'ne yo'o cua̱ño'ñe pa'iohua'i sëte cuasacaijë̱'ë, co'aye yo'o cua̱ñojë ai yo'ocohua'ire.
4Si'aohua'i huejani pa'iyere ëjarepa ñajë pa'ijë̱'ë. Ja̱je pa'ina, huejasicohua'i nëjo ja̱'re cui'ne ë̱jë ja̱'re yo'ojë pa'ijë̱'ë. Ja̱je pa'ima'cohua'ire Maija'quëpi i̱ohua'i yo'ose'ere sa̱ija'quë api, huejama'cohua'ipi nomiohua'ire yo'oroja̱icohua'ire, cui'ne nëjore pajëta'a yequë nomiore yo'ocohua'ire.
5Oima'pë pa'ijë̱'ë, curiquëre. Mësaru payere sihuajë pa'ijë̱'ë. Ja̱je pa'ina, Maija'quëpi caji, maire: “Te'ohua'ire je̱o nëcoye pa̱ja'quë a'ë, cui'ne je̱oco huesoyeje̱ pa̱ja'quë a'ë.” 6Ja̱je pa'ina, Maija'quëna quëco pajë caye pa'iji, ñeje:
Ëjaëpi yë'ëre co̱caiquëre pa'ë.
Ja̱je pa'ina, ti ca'raye pa̱ñë, pa̱ipi yë'ëre co'aye neñu'u cajë yo'oye pa'itoje̱.
7Cuasajë̱'ë, Maija'quë coca quëajë mësarute sasicohua'i pa'ise'ere, me ja̱ohua'i pate'ni cajë. Ñajë ye'yejë i̱ohua'i pa'ise'ere tuijë̱'ë, pa'ire paji cuasajë yo'ose'ere.
8Jesucristo cato i̱pi ñamina'a pa'isiquëpi iye mu'seje̱ pa'iji, ja̱re ti pani huesëji, je̱'nëna. 9A̲o a̱ijë ñeje yo'ojë̱'ë, cajë cua̱ñese'ere si'aye yo'o ti̱'ajë a̱icohua'ire ja̱ yo'oyepi ti co̱caiye pa̱ji. Ja̱je pa'iquëta'are maire cato ai co̱caiji, Maija'quë maire oiyepi, mai joyona tutu i̱siquëna pa'iyepi. Ja̱je pa'ina, sehuosicohua'i ja̱'në ye'yese'ere je̱oni ti̱ñe ye'yayena ye'yema'pë pa'ijë̱'ë.
10Mai cato payë, ti̱ñe pa'yere Maija'quëna i̱sise'e. Ja̱ cato iye yeja Maija'quë huë'e ñacaicohua'i a̱iñe peoye a'ë. 11Maija'quë huë'e ñacai ëjaërepa cato pa̱i co'aye yo'o do'ire sa̱i to̱ ja̱'ñere i̱sisi'i caquë tsiere de'o hue̱'ñarepa hue'yo sitona saquë api. Ja̱je pa'iquëta'are nëicohua'i ca̱ cato pa̱i daripë hue'sena etoni peo hue̱'ñarepa ëo je̱oñe paji'i. 12Ja̱je cui'ne Jesuje̱ i̱ tsie do'ipi i̱ pa̱ire nesi'i caquë pa̱i daripë hue'sena ai yo'oquë ju̱ji'i. 13Ja̱je pa'ina, jë̱najë̱'ë, Jesús ja̱'re pa̱i daripë hue'sena etañu'u. Etani ai yo'oñu'u, i̱ tea ju̱ni cua̱ñoquë ai yo'ose'eje̱ pa'ye. 14Iye yeja mai peoyë, ti pani huesë daripërepa. Ja̱je pa'ina, yequë mu'se pa'ija̱'a daripëre co'ejë saiyë. 15Jesucristo do'ija̱'a Maija'quëre de'oquëre pa'ni cajë sihuaye pa'iji, si'anëpi. I̱te ja̱je cajë sihuaye a'ë, coa i̱sijë yo'oyeje̱ pa'ye. ¡Ja̱je pa'iye sëte mai yë'opopi de'oquëre pa'ni Maija'quë cajë sihuañu'u! 16Hua̱nëyema'pë pa'ijë̱'ë, mësaru co'amañapi peocohua'ire co̱caiyere. Ja̱'ë, Maija'quëre i̱sijë yo'oye. Ja̱re Maija'quë sihuaquë necaiquë api.
17Maija'quë coca mësarute quëacohua'i cua̱ñeñere de'oye sehuocaijë pa'ijë̱'ë. Ja̱ohua'i a'ë, mësaru joñoa ñacaijë pa'icohua'i, Maija'quëna i̱ohua'i yo'ose'e quëaja̱'cohua'i sëte. Ja̱je pa'ina, mësarupi de'oye sehuocaito sihuajë neja'cohua'i a'ë. I̱ohua'ipi co'aji cajë oijë neto mësarute i̱ohua'i necaiye ti co̱caiye peosipi.
18Si'aye nuñerepa yo'oñu'u cajë yo'osicohua'i sëte, tayose'e peoquëna, asajë jo'cua de'oye pa'iyë, nuñerepa yo'ohuë cuasajë. Ja̱je pa'ina, yëquëre se̱cacaijë̱'ë, cayë, mësarute. 19Maija'quëpi jëjo saoquëna, esa yë'ë sani mësaru ja̱'re co̱ni pa'i ja̱'ñere cajë. Se̱cacaijë̱'ë, cayë.
De'oye Pa'i Ja̱'ñere Caquë Pëpa Tëjiye
20Jo'cua de'oye pa'iye i̱si Diusupi yëi ñama Ëjaëre pare, ju̱'isiquëni huëosiquëpi, mësarute ti ca nëo huesose'e necai tsie do'ipi, 21nuñe pa'icohua'ire, si'aye i̱ yëyere yo'oja̱'cohua'ire nejaquë. Ja̱je yo'oquë Jesucristo do'ipi maire i̱ sihuaquë ñañere yo'oja̱quë. De'oquëre pa'ni cajë si'anëpi i̱se'ere sihuajë pañu'u. Ja̱je pa'ija̱quë.
22Maija'quë do'ijë, yë'ë mësarute yëhuoquë case'ere quëcojë de'oye asacaijë̱'ë. Nuñerepa caye cato yë'ë mësarute toyasico nëhuicoa. 23Asajë̱'ë, cui'ne Maija'quë do'iquë Timoteo tsoe eta huajëpi, cosiquë pa'isiquë. I̱pi yë'ë quë'rona ti̱tasiquë pa'ito i̱ ja̱'re co̱ni sasi'i, mësarute do'i sai maca. 24Si'aohua'ire, Maija'quë pa̱ire cui'ne mësarute Maija'quë coca quëajë ñacaicohua'ireje̱ pëpacaijë̱'ë. 25Italia yejapi daicohua'ije̱, mësarute pëpa saoyë. Maija'quë oi ñacaiyepi si'aohua'ire mësarute pa'ija̱quë. Ja̱je pa'ija̱quë.
Currently Selected:
Hebreos 13: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.