Hebreos 12
12
Jesuse'ere Ñajë Tuñu'u
1I̱ Maija'quë pa'iji cuasajë yo'o i̱ñosicohua'ipi maire të'ija̱tena pa'iye sëte je̱ocoñu'u, si'aye maire dëquëye jo̱sa yo'oyere cui'ne co'ayepi maire hue̱ñere. Je̱oconi jeto ñese sai hue̱'ñase'e se ñajë huë'huëñu'u. 2Ja̱je pa'ina, maire de'ocohua'ire nequëna, Maija'quë pa'iji cuasaye i̱siquëna, Jesuse'ere ñajë tuñu'u. Co'acohua'ise'e so̱quë sarahuana que̱ cua̱ñojë ju̱'icona, huajëya'ye pa̱i ñajëna, ai yo'oquë ju̱'i ma'ñe caye pa̱pi, ai yo'osi jeteyo'je ai sihuaja̱'quë cuasa do'ire. Ja̱je pa'ina, Maija'quë ëja te̱'tena ja'rupi.
3Ja̱je pa'ina, co'acohua'ipi i̱te co'aye yo'ojëna, si'aye quëcosiquëre pani Jesuni cuasajë tuijë̱'ë, yo'o jujani je̱oñe pa̱ja'cohua'i. 4Ja̱ yë'ta'a mësaru ti̱'añe pa̱ñë, co'ayere yo'oma'pë pañu'u cajë si'anë sa̱ñope yo'ojë ju̱'iñena. 5¿Mësaru tsoe hua̱nëyete, Maija'quë mësarute i̱ mamajëre sëte yëhuoquë cayere? Ñeje toyase'e caji:
Yë'ë mamaquë coema'ë pa'ijë̱'ë, më'ë tayoyere nu'ñequë si'seto.
Yëhuoquë yo'oto yo'o jujahuë cama'ë pa'ijë̱'ë.
6I̱ oicohua'ini Ëjaë cato tayoto nu'ñequë api.
Cui'ne i̱ mamajë de'osicohua'ini Ëjaë cato si'sequë api.
7Maija'quëpi mësarute mamajëre yo'oyepi yo'oji. Ja̱je pa'ina, quëcojë̱'ë, i̱ si'seye. ¿I̱que mamaquëpi pëca ja'quëre nu'ñe cua̱ñoma'quë pa'iquë'ni? 8Ja̱je pa'iquëta'are, Maija'quëpi mësarute si'aohua'ire i̱ mamajëre si'seyeje̱ pa'ye si'sema'ë pa'ito mësaru i̱ mamajërepa peoyë, yecohua'i a'ë. 9Cui'ne mai tsi̱ pa'inë, mai tayoyere nu'ñejë, mai iye yeja ja'quëohua'ipi si'sejë pa'a̱huë'ë. Yo'ojëna, maipi i̱ohua'ire ëjaohua'ire ñajë ca'rajë de'oye yo'ohuë. ¿Ja̱je me yo'ojë ai jerepa Maija'quëre ma'tëmo aquëre pare de'oye sehuocaijë yo'o ma'ñeni ti pa'iyere pañu'u cajë? 10Iye yeja ja'quëohua'i cato iye yeja nëhui tëcahuë pa'iyere cajë nu'ñejë si'sehuë, i̱ohua'i yëyeje̱ pa'iohua'i pa'ija̱jë cajë. Ja̱je pa'iquëta'are Maija'quë cato mai de'oye ti pa'iyere caquë si'seji, i̱je pa'iohua'ire nesi'i caquë. 11Si'aye ja̱'a si'se cua̱ño maca cato a'siyese'e pa'iji. Pa'ina, de'oye pa̱ji cajë coeyë. Ja̱je pa'iquëta'are jeteyo'je jo'cua de'oye pa'iyere, cui'ne nuñerepa pa'iyere i̱siji, tayosi do'ire si'sese'epi.
Maija'quë Yë'ore Asaye Coejë Pa'i Do'ire
12De'oji yure ja̱je pa'iye sëte huajë tuture papi mësaru jë̱ñare jë'jose'ere mëñe mëajë'ë, cui'ne mësaru nëca si̱cu tutu peoyere pi̱'najë'ë. 13Yo'oni yureta'a nui ma'are pare co'ejë̱'ë. Co'eni saijë̱'ë, ja̱ maca do'pë nëcayopi ja'juja̱'coa. Ja'juni ti̱jupë soto co̱ñe pa̱ja'coa.
14Maija'quëna i̱sisicohua'ire papi jai pa̱i ja̱'re jo'cua de'oye pa'iyere cajë yo'ojë̱'ë. Ja̱je i̱na i̱sima'cohua'i pani ti te'ije̱ Maija'quëre ñañe peoji. 15De'hua ñajë'ë, mësaru aquëpi, së̱je oi joyo hue'equëpi jo̱sa yo'oquë jai pa̱ire co'a de'huaye peoja̱'core. Ja̱je pa'ina, Maija'quë de'oye ñacai i̱siyere si'aohua'i pañu'u cajë de'oye yo'ojë pa'ijë̱'ë. 16Mësaru acohua'ipi yequë nomiore pa̱nita'a yequë ë̱mëre yo'oma'pë pa'ija̱jë, pa̱nita'a Maija'quë tse̱re coema'pë pa'ija̱jë, Esau je̱'quë hua'i de'hua maca do'ina si'aye maja'yërepa pa'iye peoquë to̱meaji'i. 17Ja̱ maca Esaupi pëca ja'quëre de'oye pa'i ja̱'ñere cacaijë̱'ë caquë se̱ina, cacaiye pa̱'aji'i, otarepa oi catoje̱, mësarupi tsoe iye toyase'ere asacohua'i a'ë.
18Mësaru cato Sinaí cu̱tihuëje̱ pa'iona, tsioja̱ima'pë paë'ë, Israel pa̱i tsioja̱ijë pa'ise'eje̱ pa'yena, toa tsë̱ni nëcasicona, nea hue̱'ñana ñamije pa'yena, tutu ai juta hue̱'ñana. Cui'ne 19asama'pë paë'ë, duruhuë juiye pi̱siyeje̱, cui'ne Maija'quë yë'oje̱ asama'pë paë'ë. Ja̱ yë'o caye asacohua'i cato i̱ cua̱ñeñere quëco ti̱'ama'pë 20ai jerepa caye pa̱jë'ë, ca'a̱huë'ë, i̱te. I̱ caye cato paji'i: “Ai cu̱tihuëna tsa'cuquëre cato quë̱na pë̱api je̱a hue̱añe paji'i, pa̱nita'a uiyopi seso etoja̱iñe paji'i, nëicohua'ireje̱ huaiye paji'i, ja̱ro tsa'cucohua'ire,” capi. 21Ja̱je pa'ina, Moisésje̱ ja̱ ai huajëya'ye pa'iyere ñaquë quëquëquë capi: “Ai ca'raquë tsasiyë, yë'ëje̱.”
22Ja̱je pa'iquëta'are mësaru cato Sión ai cu̱tihuëna tsiosicohua'ipi pa'iyë, Maija'quë huajëquërepa, pa'i daripëna, ma'tëmo Jerusalénna, cui'ne Maija'quëre sihuañu'u cajë jai pa̱i hui̱ñaohua'i tsi'si sitona, 23Maija'quë mamajëpi i̱ohua'i mamire ma'tëmona toya cua̱ñosicohua'i tsi'si sitona, tsioja̱ë'ë. Mësaru cato tsioja̱ë'ë, si'aohua'ire i̱ohua'i yo'ose'eje̱ pa'ye ti ca de'huaquë Diusu quë'rona. Pa̱i joñoare Maija'quëpi nuñerepa pa'icohua'ire nesicohua'i quë'rona tsioja̱ë'ë, 24huajë ca nëose'e cayere necaisiquë Jesuna cui'ne maire tsoa to̱si tsie quë'rona tsiosicohua'ipi pa'iyë, Abel tsie se̱ña maca de'oye maire necaiyena.
25Ja̱je pa'ina, coema'pë Maija'quë caye de'oyerepa asañu'u, Maija'quë iye yejapi soiquë caquëna, asacaiye coesicohua'i jëaye pa̱'ahuë'ë. Ja̱je pa'ina, ai jerepa jëa ti̱'añe peoji, Maija'quë ma'tëmore papi soiquëna, asacaiye coejë yequere asaroja̱isicohua'i. 26Ja̱ mu'seña Maija'quëpi caquëna, yeja ñu'cuea̱'co'ë. Ja̱je pa'iquëta'are yure cato caji: “Ti̱jupë iye yeja cui'ne ma'tëmoje ñu'cue co̱ja'coa, yë'ëpi yo'oquëna.” 27Ja̱je ti̱jupë cani caji, si'aye i̱ de'huase'e ñu'cueye pa'iji caquë, a̱'jiñe nejoñese'e nejoñe pa'iji, jëayere pase'e nëaja'core. 28Maija'quë cua̱ñe te̱'te maire i̱siye cato ti nejo ma'ñe a'ë, ja̱ i̱si do'ire Maija'quëre de'oji cajë pëpayë ca'rajë, ëjaëre pare ñajë, de'oyerepa i̱te necañu'u. 29Maija'quë cato peo hue̱'ñarepa ëo huesoquë api, toaje̱ pa'i api.
Currently Selected:
Hebreos 12: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.