2 Corintios 12
12
Maija'quë Pablore I̱ñose'e
1Do'i peoye a'ë, co'ye de'oyerepa yo'oquë a'ë cajë sihuaye. Ja̱je pa'iquëta'are mësarute quëaye yëyë, yë'ëre Ëjaë huëo ca̱ni ñañeje pa'ye cui'ne yequë mu'seña pa'i ja̱'ñere i̱ñose'e. 2Pa'iji, catorce o̱metëca te'ire Cristo sehuoquëre ma'tëmona, toaso̱ pëpë acona sase'e. Iye yo'ose'ere asaquë a'ë, yë'ë. Si'a ca̱pë sa cua̱ñosiquë pa'ini, pa̱nita'a joyose'e sa cua̱ñosiquë pa'ini huesëyë. Ja̱ cato Maija'quëse'e asaji. 3Ja̱je pa'iquëta'are asayë yë'ë cato, ja̱ëte si'a ca̱pë quë'ire, pa̱nita'a joyose'e sasiquë pa'ini huesëyë. Coa Maija'quëse'e asaji. 4I̱te cato Maija'quë tsiona sapi. Saëna, ja̱rona asapi, ti pa̱i asani i̱ case'eje̱ pa'ye ca ti̱'añe peoyere pare. 5Yë'ë ja̱ëje pa'ire pani, jerepa pa'i api caquë sihuacati̱'ñe pa'i a'ë. Yë'ëja̱'a co'ye jerepa pa'i a'ë caquë sihuayeta'a pa̱si'i. Ja̱je pa'iquëta'are sihuasi'i yë'ë ne ti̱'a ma'ñere. 6Ja̱je pa'iquëta'are, yë'ëpi jerepa pa'i a'ë caquë pani, coa cuepequë caye pa̱'ñe pa'i a'ë, ja̱re nuñerepa caja̱quë pa'i do'ire. Ja̱je pa'iquëta'are iyere yëyë, yecohua'ipi yë'ëre jerepa pa'i api cuasama'cohua'ipi, i̱ohua'i yë'ë yëhuose'ere asayepi cui'ne yë'ë pa'iyere ñañepi cue̱cuejë.
7Jaiye i̱ñose'ere paquëta'a pa'ina, yë'ëpi jerepa pa'i a'ë cuasama'quëni caquë, yë'ëre jo̱sa yo'oja̱'core huati ëjaë hua'jo ñacaje̱ pa'iopi yë'ë ca̱pëna ai yo'oyere miuje pa'iore ne nëopi. 8Ja̱je neina, ai yo'oquë toaso̱ñe mai Ëjaëre, ja̱ ai yo'oye nejocaijë̱'ë caquë se̱i'ë. 9Se̱ina, i̱pi capi: “Yë'ë më'ëre oiyepi tsoe de'oji, yë'ë tuture tutu peocohua'ija̱'a de'oyerepa i̱ñoñe pa'iji” capi. Ja̱je pa'ina, sihuayë, yë'ë tutu peoyeja̱'a Cristo tuture i̱ñoñe pa do'ire. 10Ja̱je pa'ina, sihuayë, tutu peoyere, pë̱poyere, co'amaña carayere, huani je̱oñu'u cajë yo'oyere, cui'ne Cristo do'ire necai ai yo'oyere. Ja̱je pa'ina, yë'ëpi tutu peoquë pa'i maca, ja̱ maca jerepa tutu quë'i pa'iyë.
Corinto Sehuosicohua'ire Pablo Co'a Ju̱'iñe
11Mësarupi cacaima' do'ire, cuepei cayeje̱ cahuë, mësarute. Mësarupi yë'ëre de'oquë api cacaiye pa'iji, pa̱ni yë'ëja̱'a co'ye. Yë'ë mësarute ye'yacohua'i huë'ehuëre pa'iye pa̱ñë, ¡do'i peoquë maca pa'inije! 12Ja̱je pa'ita'a, yequë mu'se pa'i ja̱'ñe i̱ñoñepi, pa̱i yo'o ti̱'a ma'ñe yo'oyepi, jaiye de'o co'amaña mësaru ja̱'re pa'i dahuëre quëcoquë yo'o i̱ñose'epi, ja̱pi i̱ñohuë, Jesús jëjo daoquërepa yë'ë pa'iye. 13Ja̱je pa'iquëta'are yequë huë̱'ña sehuosicohua'ipi jerepa de'oyerepa necaise'e payë cuasayë. Mësaru coa mësarute necaiye tayo yo'ose'e pa'ito iyese'e a'ë: Yë'ë carase'e mësarute se̱ma'ë paë'ë. Ja̱ tayo yo'oyere ai cuasama'pë sa̱i to̱caiyeje̱ pa'ye de'oye cuasajë oni yejejë̱'ë, yë'ëre.
14Mësarute toaso̱ñe acore do'i sai ja̱'ñere yure ne de'huaquë pa'iyë. Yureje̱ mësarute dëquëyeje̱ pa'ye yo'oma'ë pa'ija̱'quë a'ë. Mësaru curire pasi'i caquë yo'oma'ë pa'iyë. Yë'ë cato mësaruni caquë yo'oyë. Ja̱je pa'ina, pëca ja'quëohua'ipi mamajëre i̱sija̱'a curiquë tsi'socohua'i a'ë, pa̱ni mamajëpi pëca ja'quëohua'ire i̱si ja̱'ñere tsi'soye. 15Ja̱je pa'ina, yë'ëpi mësarute ai oina, mësarupi yë'ëre a'ri maña oitoje̱, yë'ë de'oye cuasa do'ipi si'aye yë'ë curi paye sa̱i saosi'i, cui'ne yë'ë tutu mañaje ne saosi'i caquë sihuaquë yo'oyë, mësaru joñoa de'oye pa'iyere caquë.
16Nuñerepa cayë, yë'ë mësarute dëquëye yo'oma'ë paë'ë. Ja̱je pa'iquëta'are yecohua'i mësaru acohua'ipi cayë, yequëre coa i̱ ta̱'ñe cosoyepi yo'oquë se̱'queoje̱ pa'iona, eo nëopi. 17¿Yë'ë mësaru ñato, yë'ë yëyere cosoquë nesi'i caquë ja̱ohua'ire jëjo saore? 18Titore do'i mësarute sani ñajaquë caquë se̱ni cui'ne i̱ ja̱'re co̱ni yequëre Maija'quë do'iquëre jëjo saohuë, ¿jëjo saosiquëpi Tito sani mësarute i̱ yëyere nesi'i caquë cosoquë yo'ou? ¿Yëquëre te'e joyopi cui'ne nëiñe i̱siquëna, cayaohua'i si'a yë'quë macarepa yo'oma'pë pate, mësaru ñato?
19Yeque mësaru ca'ra'ñe pa'iohua'i a'ë tayo yo'ose'ere, yëquë i̱ti ñasicohua'i ña hue̱'ñana ca de'huañu'u cajë cayë. Ja̱je cajë caye pa̱ñë, yëquë cato Maija'quë ña hue̱'ñana cayë, Cristo acohua'i sëte. Ja̱je pa'ina, si'aye yëquë caye cato, mësaru Maija'quë do'ijë joyo pa'iye jerepa ñese mëi ja̱'ñere co̱cañu'u cajë caye a'ë. 20Ja̱je pa'iquëta'are ca'rayë, mësarute ñasi'i caquë sani ti̱ñe pa'ijëna, ña quëquëyere cui'ne mësarupi yë'ëreje̱ ti̱ñe pa'ina, ñañere. Ca'rayë, te'e cuasaye peoquëna, pë̱tise'e, te'i payese'e, co'a cocase'e, yecohua'ire cue'cueyese'e, jerepa pa'i a'ë cuasayese'e, cui'ne coa co'a tiyapë pa'iyese'e pa'ima'quëni caquë. 21Ja̱je pa'ina, cui'ne ti̱jupë do'i ñasi'i caquë saquëna, yë'ë Diusupi huajëya'ye nëiñe nema'quëni mësaru yo'oyere ñaquëna, caquë ca'rayë. Ja̱ maca mësaru tsoe hue̱'ña acohua'ipi tayojëta'a ti je̱oma'pë, jai pa̱i si'si yo'ojë coa nomiohua'ire cui'ne ë̱mëohua'ire yo'ojë pa'iyere, cui'ne ja̱'në yo'ojë sëo mease'ere je̱oma'pë pa'iyere, i̱ño oema'quëni caquë ca'rayë.
Yëhuoye Cui'ne Pëpa Tëjiyerepa
Currently Selected:
2 Corintios 12: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.