Cantares 2
2
Kuñataĩ
1Che niko yvoty
Sarón pegua.
Che niko yvoty
ñumegua.
Karia'y
2Che rembiayhu,
ndéko kuñataĩ apytépe
ñuatĩ pa'ũme guáicha yvoty.
Kuñataĩ
3Che rembiayhúko
karia'y kuéra apytépe,
ku yvyra hi'a porãve vaicha
ka'aguy pegua apytépe.
Iporãitéiko aguapy
hi'ãme!
He'ẽtépa chéve hi'a!
4Ha'e che reraha
koty guasu ojevy'ahápe.
Mborayhu meme
chéve guarã ima'ẽ.
5Pe'uka chéve mbujape
yva guiguáva.
Yva aju he'ẽ asyvéva
che mbyetia'e vaerã.
Mborayhúgui niko
che kangypa!
6Ijasúpe tojoko che akã
ha ijakatúape ta che añuã.
Karia'y
7Pejéke chéve,
kuña kuéra Jerusalengua,
umi guasu ra'y mimi
ka'aguy peguáre,
napemombáy mo'ãiha
che rembiayhu.
Peheja chupe toke,
opayseha peve.#Cnt 3.5; 8.4.
Purahéi 2ha
Kuñataĩ
8Péina ou che rembiayhu.
Ahendúma iñe'ẽ.
Opo oúvo umi yvytýre.
9Che rembiayhúko ku guasúicha,
ku guasu pytã ra'y rusúicha.
Péina oiméma okẽ kupépe.
Ovetãme iñakãsẽma,
ha upe rupi oma'ẽ.
10Che rembiayhu he'i chéve:
“Epu'ã che rayhupára.
Eju jaha, che yvoty.
11Na ema'ẽ! Ro'y ohasáma.
Hendive ama ohopa.
12Ñúme yvoty heñóima.
Japurahéiha ára oguahẽma.
Ñahendúma ñande yvýpe
opurahéirõ jeruti.
13Ígo hi'áma,
ha parralty omyasãi
hyakuãngue.
Epu'ã, che rayhupára.
Eju jaha, che yvoty.
14Nde, che pykasumi
rekañýva ita apytépe,
rejaitypóva ijyvatevehápe:
Eheja tahechami pe nde rova,
tahendu pe ne ñe'ẽ
he'ẽtéva,
tahecha pe nde rova
iporãitéva.”
Mokõivéva
15Ñuhãme peity umi aguara,
umi aguara oúva
ore parralty ombyai,
ore parralty ipotypáva!
Kuñataĩ
16Che rembiayhu
che mba'erã,
ha che imba'erã.
Ha'e, yvoty apytépe
hymba kuéra omongaru.#Cnt 6.3.
17Ko'ẽjúvo hína
ha napytũvéivo:
Eju jey, che rayhupára,
ku guasúicha,
ku guasu pytã ra'y rusúicha,
pe yvytýre eju.
Currently Selected:
Cantares 2: GPC2006
Highlight
Copy
Compare
Share
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.
