Salmos 135
135
Tuicha ite mba'e Tupã ojapo
1Toñemomba'e guasu Ñandejára.
Pemomba'e guasu Ñandejára réra,
tomomba'e guasu chupe
umi hese ojeroviáva,
2umi tupaópe hembiapóva,
ha umi tupao pepo guýpe oĩva.
3Pemomba'e guasu Ñandejárape,
ha'e niko ipy'a porã,
héra peropurahéi,
ha'e niko imba'e recha kuaa.
4Ha'e oiporavo vaekue imba'e teerã
Jacob, upéva hína Israel.
5Che aikuaa porã
Ñandejára tuichaha,
Tupã tuichave
opa ambue tupã nguéragui.
6Ñandejára niko ojapo ojaposéva,
yvága ha yvýpe,
yguasu ha upe huguápe.
7Amo ára mbotýgui arai omopu'ã,
ojapo ára tiri oguerúva ama,
ha yvytu ojora
iñapytĩmby oguerekohágui.#Jer 10.13; 51.16; Eclo 43.13-14.
8Ha'e ojuka umi ñemoñare ypykue
peteĩcha, kuimba'e ha mymba ra'y.
9Mba'e tuicha ite
ha hechapyrãva omondo
Faraón ha hembiguái kuérare
Egipto mbytépe.#Ex 12.29-30.
10Heta tetã ohundi
ha ojuka mburuvicha guasu mbaretépe:
11Sihón, amorréo kuéra
ruvicha guasu,
Og, mburuvicha guasu
Basán pegua,#Nm 21.21-35.
ha mburuvicha guasu kuéra
oĩva Canaánpe.
12Umíva umi tetã yvy
ome'ẽ hetã Israélpe
imba'e teerã.
13Ore Jára,
nde réra niko ndopáiva,
nde rehe oikóne mandu'a opa ára.
14Nde, ne retã rehehápe,
reñorãirõ,#Dt 32.36.
ha reiporiahurereko
ne rembiguái kuérape.
15Umi ta'ãnga
tetã nguéra omomba'éva niko
pláta ha óronte,
yvypóra rembiapokue.
16Ijuru ha noñe'ẽi,
hesa ha ndohechái,
17ijapysa ha nohendúi,
ijuru ha naipytuhẽi.
18Upéichata avei umi ijapohare,
ha umi hese kuéra ojeroviáva.#Sal 115.4-8; Is 44.9-10; Jer 10.1-16; Sab 15.15; Ap 9.20.
19Peẽ Israelgua!
Pemomba'e guasu Ñandejárape.
Pa'i kuéra!
Pemomba'e guasu Ñandejárape.
20Levíta kuéra!
Pemomba'e guasu Ñandejárape.
Peẽ Ñandejára rehe pejeroviáva!
Pemomba'e guasu ñande Járape.
21Sión guive
toñemomba'e guasu Ñandejára,
upe oikóvape Jerusalénpe.
Toñemomba'e guasu Ñandejára.
Currently Selected:
Salmos 135: GPC2006
Highlight
Copy
Compare
Share
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.
