San Mateo 16
16
Fariséo ha Saduséo kuéra ohechase mba'e hechapyrãva
(Mc 8.11-13; Lc 12.54-56)
1Fariséo ha Saduséo kuéra oho Jesús rendápe, ha omoñuhã haguã chupe, ojerure chupe ojapo haguã mba'e hechapyrãva,#Mt 12.38; Lc 11.16. ohecha kuaa haguã ha'e kuéra Tupã ombou hague chupe. 2Jesús katu he'i chupe kuéra:
—Kuarahy oikévo peẽ peje: “Ára porãta hína” pehecha ramo ára pytãmbaha. 3Ha ko'ẽvo katu peje: “Ára vaíta hína. Ára niko ijaraipa ha pytãmba.” Peẽ niko peikuaa mba'épa ojehúta árare pemañárõ. Mba'éicha rupi piko ndapeikuaái mba'épa he'ise umi mba'e ko'ágã ojehúva? 4—Tekove ahẽ Tupãre ojerovia'ỹva ñemoñarénte ojerure ohecha haguã mba'e hechapyrãva.#Mt 12.39; Lc 11.29. Ndojechauka mo'ãi peẽme mba'eveichagua hechapyrãva. Tupã ohechaukáta peẽme maranduhára Jonás rehe ojapo haguéicha.
Upépe oheja chupe kuéra ha oho.
Jesús he'i mba'épa he'ise tova mokõi
(Mc 8.14-21)
5Hemimbo'e kuéra oguahẽvo pe yguasu mboypýri, ohecha kuaa hikuái hesarái hague ogueraha haguã hembi'urã nguéra. 6Ha Jesús he'i chupe kuéra:
—Peñeñangarekóke umi fariséo#Lc 12.1. ha Saduséo kuéra rova mokõigui.
7Hemimbo'e kuéra katu he'i ojupe:
—Upéva niko he'i ndajarúigui mbuja.
8Ha Jesús oikuaa mba'épa he'i hikuái, ha upévare he'i chupe kuéra:
—Mba'ére piko peñe'ẽterei ndaperekoiha mbuja? Pejerovia'i etépa che rehe. 9Na pene mandu'ái nga'u piko amboja'o hague 5 mbuja 5.000 kuimba'épe,#Mt 14.17-21. ha mboy ajakápa pembyaty hembyrégui? 10Na pene mandu'ái nga'u piko amboja'o hague umi 7 mbuja umi 4.000 kuimba'épe,#Mt 15.34-38. ha mboy ajakápa pembyaty hembyrégui? 11Ndapehecha kuaái ra'e na ñe'ẽi hague peẽme mbujáre. Ha'ese kuri peẽme peñeñangareko haguã umi fariséo ha Saduséo kuéra rova mokõigui.
12Upépe ae ohecha kuaa hikuái Jesús nde'íri hague chupe kuéra oñeñangareko haguã mbuja mbovuhágui. Pe he'ise vaekue chupe kuéra niko oñeñangareko haguã umi mba'e fariséo ha Saduséo kuéra oporombo'évagui.
Pedro he'i Jesús ha'eha pe Mesías
(Mc 8.27-30; Lc 9.18-21)
13Jesús oho táva Cesarea Filípope, ha upépe oĩ aja oporandu hemimbo'e kuérape:
—Che, yvypóraicha aju vaekue rehépa, mavaha chépa oje'e?
14Ha'e kuéra he'i chupe:
—Oĩ he'íva ndeha Juan Bautista. Oĩ he'íva ndeha Elías, ha oime katu he'íva ndeha Jeremías térã ambue maranduhára.#Mt 14.1-2; Mc 6.14-15; Lc 9.7-8.
15Jesús oporandu chupe kuéra:
—Ha peẽ piko mba'e peje, mávapa che?
16Ha Simón Pedro he'i chupe:
—Nde hína upe Mesías, Tupã rembiporavo ha Tupã oikovéva Ra'y.#Jn 6.68-69.
17Jesús he'i chupe:
—Revy'aitétapa nde Simón, Juan ra'y. Avave rupi ndereikuaái kóva, che Túva yvágape oĩva oikuaaukáva ndéve. 18Che ha'e ndéve Pedro, nde réra niko he'ise ita. Ko ita ári amopu'ãta che Iglésia, ha mano jepe ndaipu'aka mo'ãi hese. 19Ame'ẽta ndéve ñesãmbyhy yvágagui oúva rokẽ pe'aha. Ha opa mba'e nderehejáiva ojehu ko yvy ári, ndojehu mo'ãi avei yvágape. Ha opa mba'e nde rehejáva ojehu ko yvy ári, ojehúta avei yvágape.#Mt 18.18; Jn 20.23.
20Upéi Jesús he'i hemimbo'e kuérape ani haguã omombe'u avavépe ha'eha upe Mesías, Tupã rembiporavo.
Jesús omombe'u omanotaha
(Mc 8.31—9.1; Lc 9.22-27)
21Upe ára guive Jesús oñepyrũ he'i hemimbo'e kuérape ha'e oho vaerãha Jerusalénpe. Ha upépe myakãhára kuéra, pa'i ruvicha kuéra ha umi Moisés rembiapoukapy mbo'eha heta ombohasa asytaha chupe. He'i chupe kuéra ha'e ojejukataha ha oikove jeytaha mbohapy ára rire. 22Upépe Pedro ogueraha chupe ha'eñoháme, ha he'i chupe anive haguã péicha oñe'ẽ. He'i chupe:
—Mba'eveichavérõ, che Jára! Tupã ndaikatúi oheja ojehu ndéve péicha.
23Jesús katu ojere ha he'i Pédrope:
—Ejei che ypýgui, Sataná! Nde, che rape jokose reína. Nde niko yvypóraicha reñandu ko'ã mba'e, ndaha'éi Tupã oñandukaháicha.
24Upéi Jesús he'i hemimbo'e kuérape:
—Oime ramo che moirũséva toñembyesarái ijehegui, tohupi ikurusu ijapére, ha ta che moirũ.#Mt 10.38; Lc 14.27; Jn 12.24. 25Pe hekovére hakate'ỹva, omanóta. Pe omanóva che rehehápe katu, oikovéta.#Mt 10.39; Lc 17.33; Jn 12.25. 26Mba'épa oguenohẽne yvypóra oguerekopárõ opaite mba'e ipópe, ha oñehundi ramo ha'e? Mba'eve! Mba'épa ikatúne yvypóra ome'ẽ oikove jey haguã? Mba'eve! 27Che, yvypóraicha aju vaekue, aju jeývo, ajúta che Túva reko mimbipa reheve ha hemimbou kuéra reheve.#Mt 25.31. Ha upévo Tupã omyengoviáta peteĩ-teĩme hembiapokue ojerureháicha.#Sal 62.12-13; Pr 24.12; Jer 17.10; Ez 18.30; Eclo 16.12,14; 33.20; Ro 2.6. 28Añetehápe ha'e peẽme, ko'ápe oĩva apytépe oĩ nomano mo'ãiva che recha mboyve chéve, yvypóraicha aju vaekue, ajúvo apórosãmbyhy haguã.
Currently Selected:
San Mateo 16: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.