Daniel 3
3
Ta'ãnga ñemomba'e guasu
1Mburuvicha guasu Nabucodonosor ojapouka órogui peteĩ ta'ãnga ijyvatéva 30 métro ha ipéva 3 métro. Oho omoñembo'y peteĩ ñúme hérava Dura, tetã Babilóniape. 2Upéi ohenoika opaichagua mburuvicha ha poguasu kuéra hetã tuichakue, oho haguã pe ta'ãnga ojapouka vaekue ñembyaretehápe. 3Oñembyatypa rire mayma poguasu kuéra pe ta'ãnga renondépe, 4peteĩ mburuvicha guasu rembiguái hatã osapukái ha he'i: “Pehendúke maymáva ko'a rupi peikóva, ha mayma tetã ambuegua. 5Pehendu vove turu ipu ramo ha opaichagua mba'epu, peñesũta ha pemomba'e guasu pe ta'ãnga ojapouka vaekue mburuvicha guasu Nabucodonosor. 6Umi noñesũiva ha nomomba'e guasúi pe ta'ãnga ojeitýta tatakua rendýpe.”
7Upéi, oñepyrũ vove ohendu hikuái turu ha opaichagua mba'epu, oĩ haguéicha oñesũ ha omomba'e guasu pe ta'ãnga, órogui ojapouka vaekue mburuvicha guasu Nabucodonosor.
8Oĩ upérõ Babiloniagua kuérava ohóva mburuvicha guasu Nabucodonosor rendápe omoĩ vai haguã judío kuérape. 9He'i chupe hikuái:
—Ore ruvicha guasu, eikove puku kena. 10Ore ruvicha guasu, nde niko ereka vaekue maymávape oñesũ ha omomba'e guasu vaerãha pe ta'ãnga, ohendu vove hikuái turu ha opaichagua mba'epu. 11Ereka vaekue avei umi ndojapóiva péicha, ojeitytaha tatakua rendýpe. 12Umi judío kuéra nde remoĩ vaekue sãmbyhyhára ramo Babilóniape katu ndojapói upéicha. Sadrac, Mesac ha Abed-Negó, umíva niko nomomba'éi ne tupã nguéra ha noñesũi pe ta'ãnga renondépe, órogui rejapouka vaekue.
13Upéva ohendúvo Nabucodonosor ipochy hendy ha ohenoika hendápe Sadrac, Mesac ha Abed-Negó. Oguahẽvo hendápe, 14Nabucodonosor oporandu chupe kuéra:
—Añete piko peẽ napemomba'éi che tupã nguéra ha napeñesũi pe ta'ãnga renondépe, órogui ajapouka vaekue? 15Ko'ágã pehendu ramo turu ha opaichagua mba'epu, peñesũtapa pe ta'ãnga che ajapouka vaekue renondépe? Cháke ndapejapói ramo pejeitýta tatakua rendýpe. Ha mba'eichagua tupã piko upégui pene renohẽta?
16Sadrac, Mesac ha Abed-Negó he'i Nabucodonosórpe:
—Natekotevẽi ro'e ndéve mba'eve ore jehe. 17Tupã, ore romomba'e guasúva, ore pe'áta pe tatakua rendýgui, ha opa mba'e vaígui nde rejaposéva ore rehe. 18Ha ndojapói ramo jepe upéicha, roipota reikuaa ore ruvicha guasu, ore noromomba'e guasu mo'ãiha ne tupã nguéra ha noroñesũ mo'ãi pe ta'ãnga renondépe, órogui rejapouka vaekue.
Daniel ha iñirũ nguéra oñemoinge tatakuápe
19Nabucodonosor hova pytãmba pochýgui ohendúvo pe he'íva Sadrac, Mesac ha Abed-Negó. Ha ojatapyka pe tatakua rehe hakuve haguã 7 jey jepiguágui. 20Upéi he'i umi hembiguái imbaretevévape oipokua ha oipykua haguã Sadrac, Mesac ha Abed-Negópe, ha omombo haguã pe tatakuápe. 21Ha pe oĩháicha, ijao ha opa mba'éreve, oipokua ha oipykua chupe kuéra hikuái, ha omombo tatakuápe. 22Ha pe tatakua haku etereígui, Nabucodonosor péicha oipotágui, pe tata rendy osẽva tatakuágui ohupyty ha ojuka umi omyañáva umi mbohapy kuimba'épe.#Dn 3.48. 23Sadrac, Mesac ha Abed-Negó, upe ojepykua ha ojepokuaháicha ho'a pe tatakua ryepýpe.
Azarías ñembo'e
24Sadrac, Mesac ha Abed-Negó oñemoĩ oguata pe tata rendýpe,#Dn 3.23-25. ha oñepyrũ opurahéi Tupãme ha oguerohory Ñandejárape. 25Upéi Azarías,#Dn 1.6-7. hérava avei Abed-Negó, pe oñembo'yhápe tata mbytépe, oñembo'e kóicha:
26Rejererohory vaerã ndé, Tupã
ore ru kuéra ypykue Jára.#Esd 9.6-15; Dn 9.4-19.
Ndéve ojepurahéi vaerã
ha nde réra oñemomba'e guasu
opa árape guarã.#1 Cr 29.10-12.
27Ndé niko nde reko joja
opa mba'e rejapo vaekuépe
ore rehe.
Opa ne rembiapokue ijeroviaha,
umi nde rape naikarẽi,
opa mba'e eréva
reporombojavakévo iñañete.#Neh 9.33; Tob 3.2-6; Ap 16.7; 19.2.
28Nde rejapo vaekue upe heko jojáva
reity ramo ore rehe
ha Jerusalén rehe,
ore ru kuéra ypykue
táva marangatu,#Dn 9.5-8; Bar 1.15-16.
opa umi mba'e vai
ore ári ou vaekue.
29Henda ha hekoitépe
rejapo ore rehe upéicha,
ore angaipáre.
Añetehápe ore reko aña
ha rojapo ivaíva,
rojeívo nde hegui.
Ivai vaekue ore rembiapokue,
norohenduséigui ne rembiapoukapy.
30Umi mba'e ere vaekue oréve
ndé ore rayhúgui,
ndorojapói ha norombyajéi.
31Umi mba'e rembou vaekue ore ári,
umi mba'e rejapo vaekue ore rehe,
heko itépe rejapo.#Lv 26.14,48; Dt 15.63-67.
32Ore me'ẽ ore rehe ija'e'ỹva pópe,
tekove oikuaa'ỹva tapicha rayhu,
ha nde hegui Tupã,
ndoikuaaséiva mba'eve.
Ore reja mburuvicha guasu
heko joja'ỹva pópe,
heko añavéva yvy ári.
33Ha ko'ágã
ndaikatúi roipe'a ore juru,
ñemotĩ ha toryja ore aho'i,
ha opa umi ne momba'e guasúvape.
34Nde réra rehehápe,
ani ore reja opa árape guarã.
Ani remboyke ñe'ẽ me'ẽ
rerekóva ore ndive.#Ex 32.11-13.
35Nde poriahurereko
ani remboyke ore hegui,
ne irũ tee Abraham,#2 Cr 20.7; Is 41.8; Stg 2.23.
ne rembiguái Isaac,
ha nde ra'y marangatu Jacob rayhupápe.
36Chupe kuéra
reme'ẽ vaekue ne ñe'ẽ
iñemoñare hetataha
mbyjaita yvága peguáicha,
ha yvy ku'i ra'ỹi
yguasu rembe'ýpe guáicha.#Gn 15.5; 22.17.
37Ore Jára,
tetã michĩvéva yvy arigua
niko oiko vaekue ore hegui.
Ha ko'ágã roiko toryjárõ
ko yvy jerekuévo
ore angaipáre.
38Ndaipóri véima ko'ã árape
mburuvicha, maranduhára,*f**
ha karai guasu kuéra.
Ndojehecha véima ko'ã árape
mymbahapy*f** ha mymbajuka,*f**
mba'e kuave'ẽ*f** ha insiénso
ojehapy ramo ndéve.
Ndaipóri véima
mamo romoguahẽ haguã ndéve
ore ñemitỹngue tenondere,
39umíva rupi
rohupyty haguã ne pytyvõ.
Opáichavo,
erohory oréve ore ñembyasy
ore py'aite guive
ndéve romoguahẽva,
40rerohoryháicha mymbahapy
oñekuave'ẽ ramo ndéve
ovecha mácho térã tóro,
térã ovecha ra'yeta
oñemongyra pyre.#Sal 51.18-19; Os 6.6.
Ta upéicha kena
ko'ágã ne renondépe
ore mba'e kuave'ẽ,
ha toroiko nde rape rehe
ore py'aite guive.
Araka'eve niko ndoikóiva ñemotĩme
umi nde rehe ojeroviáva.#Sal 25.3.
41Ha ko'ágã katu
roikose nde rapére
ore py'aite guive.
Ndéve romomba'e ore,
ha rojapose
upe ndéve ne mbovy'áva.
42Ani ore reja roñemotĩ,
ema'ẽ uvei ore rehe py'a porãme,
ha ore poriahurereko
nde py'aite guive.
43Orepe'a kena ivaívagui,
mba'e hechapyrãva kena
ejapo ore rehe,
nde réra rehehápe, Ñandejára.
44Toñemotĩ umi ojaposéva ivaíva
ne rembiguái kuérare.
Toiko toryja ramo,
topyta mba'eve'ỹre,
toñehundi ipokatu.#Sal 35.26; 40.16.
45Toikuaa hikuái
ndeha opa mba'e Jára,
upe Tupã peteĩetéva,
remimbipáva ko yvy jere kuévo”.#Sal 83.19.
46Umi mburuvicha guasu rembiguái kuéra, omombo vaekue chupe kuéra tatakuápe, akóinte ohatapyñave upe tata vléke, ñandy, kapi'i ha jepe'ápe. 47Pe tata rendy ojupi 25 métro pe tatakua ári, 48ha opu'ãvo, ohapypa umi caldéo oĩvape tatakua jerére.#Dn 3.22. 49Ñandejára remimbou*f** katu oguejy pe tatakua ryepýpe Azarías ha iñirũ nguéra oĩháme, ha onohẽmba oka gotyo pe tata rendy. 50Ha opyta pe tatakua ryepy ipiro'ysã asy ku yvytu kangy asy oipeju ramo guáicha. Upe tata rendy ndojapói hese kuéra mba'eve.#Dn 3.27.
Mbohapy karia'y purahéi
51Upe tatakua ryepýpe, mbohapyve kuimba'e oñemoĩ ogueropurahéi, omomorã ha oguerohory Tupãme, he'ívo:
52Ndéve roguerohory,
Tupã, ore ru kuéra ypykue Jára.
Ndéve romomba'e guasu opa ára.
Roguerohory
nde réra marangatu tuichaite,
ha romomba'e guasu opa ára.
53Ndé rejererohory
nde Tupao marangatu mimbipápe,
reñemomba'e guasu
ha reñemomorã opa ára.
54Ndé rejererohory
mburuvicha guasúicha reguapýva,
reñemomba'e guasu
ha reñemomorã opa ára.
55Ndé rejerohory
rehechágui umi ipypukuvehápe,
ha reguapy
umi tekove ipepóva*f** ári,
nde reñemomba'e guasu
ha reñemomorã opa ára.
56Ndé rejererohory
yvága ha arapýre,
reñemomba'e guasu
ha reñemomorã opa ára.
57Opa Ñandejára rembiapokue#Sal 145.10.
perohory chupe,
pemomba'e guasu
ha peropurahéi chupe opa ára.
58Ñandejára remimbou#Sal 103.20; 148.2. kuéra,
pererohory Ñandejárape,
pemomba'e guasu
ha peropurahéi chupe opa ára.
59Yvága, erohory Ñandejárape,
emomba'e guasu
ha eropurahéi chupe opa ára.
60Y kuéra yvága ári peiméva
perohory Ñandejárape,
pemomba'e guasu
ha peropurahéi chupe opa ára.
61Opa mbyja kuéra,
perohory Ñandejárape,
pemomba'e guasu
ha peropurahéi chupe opa ára.
62Kuarahy ha jasy
perohory Ñandejárape,
pemomba'e guasu
ha peropurahéi chupe opa ára.
63Yvágare mbyjaita
perohory Ñandejárape,
pemomba'e guasu
ha peropurahéi chupe opa ára.#Sal 148.3-4.
64Ama ha ysapy
perohory Ñandejárape,
pemomba'e guasu
ha peropurahéi chupe opa ára.
65Opaite yvytu
perohory Ñandejárape,
pemomba'e guasu
ha peropurahéi chupe opa ára.
66Tata ha ára haku
perohory Ñandejárape,
pemomba'e guasu
ha peropurahéi chupe opa ára.
67Ro'y ha y rypy'a
perohory Ñandejárape,
pemomba'e guasu
ha peropurahéi chupe opa ára.
68Ysapy ha y rypy'a
perohory Ñandejárape,
pemomba'e guasu
ha peropurahéi chupe opa ára.
69Y ratã ha ro'y
perohory Ñandejárape,
pemomba'e guasu
peropurahéi chupe opa ára.
70Y rypy'a#Sal 148.8.
Perohory Ñandejárape,
pemomba'e guasu
ha peropurahéi chupe opa ára.
71Ára ha pyhare
perohory Ñandejárape,
pemomba'e guasu
ha peropurahéi chupe opa ára.
72Ára sakã ha pytũ
perohory Ñandejárape,
pemomba'e guasu
ha peropurahéi chupe opa ára.
73Ára tiri ha arai
perohory Ñandejárape,
pemomba'e guasu
ha peropurahéi chupe opa ára.
74Yvy, toguerohory Ñandejárape,
tomomba'e guasu
ha togueropurahéi chupe opa ára.
75Yvyty kuéra,#Sal 148.9.
Perohory Ñandejárape,
pemomba'e guasu
ha peropurahéi chupe opa ára.
76Opa mba'e heñóiva yvy ári,
perohory Ñandejárape,
pemomba'e guasu
ha peropurahéi chupe opa ára.
77Ykua yvu kuéra
perohory Ñandejárape,
pemomba'e guasu
ha peropurahéi chupe opa ára.
78Yguasu ha ysyry kuéra
perohory Ñandejárape,
pemomba'e guasu
ha peropurahéi chupe opa ára.
79Pira guasu ha opa ýpe omýiva
perohory Ñandejárape,
pemomba'e guasu
ha peropurahéi chupe opa ára.
80Guyra kuéra yvytúre pevevéva
perohory Ñandejárape,
pemomba'e guasu
ha peropurahéi chupe opa ára.
81Tymba ñarõ ha mymba kuéra#Sal 148.10.
perohory Ñandejárape,
pemomba'e guasu
ha peropurahéi chupe opa ára.
82Opa yvypóra
perohory Ñandejárape,
pemomba'e guasu
ha peropurahéi chupe opa ára.
83Israel, erohory Ñandejárape,
emomba'e guasu
ha eropurahéi chupe opa ára.
84Ñandejára pa'i kuéra#Sal 135.19.
perohory Ñandejárape,
pemomba'e guasu
ha peropurahéi chupe opa ára.
85Ñandejára rembiguái kuéra#Sal 134.1.
perohory Ñandejárape,
pemomba'e guasu
ha peropurahéi chupe opa ára.
86Heko johéi pyréva
perohory Ñandejárape,
pemomba'e guasu
ha peropurahéi chupe opa ára.
87Imarangatu ha ojejapo'ỹva
perohory Ñandejárape,
pemomba'e guasu
ha peropurahéi chupe opa ára.
88Ananías, Azarías ha Misael
jarohory Ñandejárape,
ñamomba'e guasu
ha jaropurahéi chupe opa ára.
Ha'e niko ñane renohẽ
tugua pypukúgui,
ha ñande pe'a ñemanógui.
Ha'e ñane renohẽ
tatakua rendýgui,
ha'e ñande pe'a tata mbytégui.
89Perohory Ñandejárape
ha'e ipy'a porãgui,
imborayhu ndopáigui araka'eve!#1 Cr 16.34; 2 Cr 5.13; 7.3; Esd 3.11; Sal 100.5; 106.1; 107.1; 118.1; 136.1-26; Jer 33.11; 1 Mac 4.24.
90Opavave pemomba'éva Ñandejárape
perohory chupe.
Ha'e hína Tupã
Tupã nguéra ári oĩva.
Peropurahéi ha perohory chupe,
imborayhu ndopáigui araka'eve!”
Nabucodonosor ohechakuaa mba'e hechapyrãva
91 Upe rire mínte Nabucodonosor opo opu'ã, ha he'i umi ijere rupi oĩvape:
—Nambohapýinte piko umi jaipokua ha jaity vaekue tatakuápe?
—Péicha niko kuri, —he'i chupe hikuái. 92 Ha Nabucodonosor he'i:
—Mba'éicha rupi piko péicharõ ahecha irundy kuimba'e? Péina ahecha oguata hína hikuái pe tata mbytépe ha mba'eve ndojehúi chupe kuéra. Pe irundyha katu ojogua Tupã remimboúpe.
93 Nabucodonosor oho oñemboja pe tatakua jurúre ha osapukái:
—Sadrac, Mesac ha Abed-Negó, Tupã yvatetegua rembiguái, pesẽ upégui ha peju ko'ápe.
Mbohapyve osẽ pe tata rendýgui. 94 Opaite mburuvicha kuéra oĩva upe rupi oñemboja omaña haguã umi kuimba'ére. Ohecha pe tata ndojapói hague hese kuéra mba'eve. Peteĩ iñakã raguénte jepe ndojehoveréi, umi ijao katu ipyahu ha ojegua asy, ha tatatĩnte jepe nahyakuãi hese kuéra.#Dn 3.50.
95 Upe vove Nabucodonosor he'i: “Tojererohory Tupã Sadrac, Mesac ha Abed-Negó Jára, omboúva hemimbou oipe'a haguã hembiguái kuéra jeroviahápe. Ko'ãva ndojapói vaekue che ha'e haguéicha, ha omanose uvei oñesũ rangue ha omomba'e guasu ambue tupã ndaha'éiva imba'e kuéra. 96 Upévare kóicha aipota ojejapo: Oĩ ramo oimeraẽva, taha'e ha'éva, oñe'ẽ vaíva ko'ã kuimba'e Tupã rehe, toñembo'i sa'i, hóga tojeity yvýre ha toiko chugui tapere. Tupãichagua ndaipóri ambue péicha oporope'a ivaívagui.”
97 Upéi Nabucodonosor omohenda porãve ko'ã kuimba'épe, tetã Babilóniape.
98 Mburuvicha guasu Nabucodonosor omoherakuã iñe'ẽ opavavépe, taha'e ha'éva hetã, taha'e ha'éva iñe'ẽ, oikóva ko yvy jerekuévo. Kóicha ha'e:
“Aipota py'a guapy oĩ opaite pene ndive. 99 Iporã vaicha chéve peikuaa opa mba'e hechapyrãva Tupã Yvatetegua ojapóva che rehe. 100 Tuichaitéma niko umi mba'e ha'e ojapóva, ñaimo'ã'ỹ haguãicha! Ha'e oporosãmbyhy vaerã opa árape ha ipokatu ndopa mo'ãi araka'eve.”
Currently Selected:
Daniel 3: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.