1 Pedro 5
5
Myakãhára kuéra rembiaporã
1Ko'ágã añemoñe'ẽse umi pene myakãhárape, ché che tujámava ha'e kuéraicha ha Cristo jehasa asy rechaharéva, ha arekótava avei che renda pe teko mimbipa oútavape. 2Peñangareko umi Tupã ovecháre,#Jn 21.15-17. oñemoĩ vaekue pende pópe. Pejapo pejaposépe porã, oipotaháicha Tupã, ha ani jejopýpe térã Pira pire potágui, pejaposépe porãnte. 3Peiko ani peẽ ramo guáicha umi peñangarekóva jára, peñeha'ã tohecha pende rehe iporãva. 4Upéicharõ, oguahẽvo pe Ovecha rerekua Ruvicha,#Heb 13.20. peẽme oñeme'ẽne peteĩ pene akã rehegua omimbipáva, peteĩ mba'e araka'eve ipiru'ỹ vaerã.
Opavavépe guarã ñemoñe'ẽ
5Upéicha avei, peẽ mitãrusu peñemoĩ umi myakãhára poguýpe. Opavave oñemoĩ vaerã ojopoguýpe jejapo'ỹre, Ñandejára Ñe'ẽ he'ígui:
“Tupã opu'ã umi ojejapóvare,
ha oipytyvõ py'a porãme
umi ojejapo'ỹvape.”#Pr 3.34; Stg 4.6.
6Peñemomirĩke, aipórõ, Tupã po mbarete guýpe, ha'e pene mopu'ã haguã yvate, hi'araitépe.#Mt 23.12; Lc 14.11; 18.14; Stg 4.10. 7Opa pejepy'apyha peheja Tupãme. Ha'e oma'ẽ pende rehe.#Sal 55.23; Mt 6.25-34. 8Pejerereko kuaa ha ani peke, cháke Aña ndaija'éiva pende rehe, jaguarete pochýicha oheka pende'u haguã. 9Peñemoĩ mbaretéke hese pende jeroviápe, peikuaa rupi yvy tuichakue pene pehẽngue kuéra ohasa asyha hína peẽicha avei. 10Pehasa asy rire sapy'ami, Tupã ojapóta pende hegui ojavy'ỹva, ojepytaso kuaáva, imbaretéva ha okyhyje'ỹva. Tupã voi niko pe imborayhu tuichágui, ñane renói vaekue ñaime haguã avei pe teko mimbipa opa'ỹvape Jesucristo ndive. 11Ha'e taipokatu opa ára guarã. Amén.
Ipahavogua ñe'ẽ
12Silvano rupi,#Hch 15.22.40. arekóva che pehẽngue ajeroviaha ramo, ajapo peẽme ko kuatia mbykymi, añemoñe'ẽ ha aikuaauka haguã peẽme, umi jehovasa pehupyty vaekue ohechaukaha Tupã pende rayhu añeteha. Aníke márõ pejei upe mborayhu upévagui.
13Jesucristo iglésia oĩva Babilóniape, Tupã oiporavo vaekue pende poravo haguéicha peẽme, oguerahauka peẽme imaitei, ha che ra'y Márcospe avei.#Hch 12.12.25; 13.13; 15.37-39; Col 4.10; Flm 24. 14Peñomomaitei peñoañuãvo oñopehẽnguéicha.
Ta pende py'a guapy Jesucristo reheguáva maymáva.
Currently Selected:
1 Pedro 5: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.