1 Corintios 16
16
Viru ñemono'õ
1Pe viru ñemono'õ Tupã mba'éva peguarã katu,#Ro 15.25-26; 2 Co 8-9. pejapo pe ha'e haguéicha Tupã Iglésia Galacia guápe. 2Upe semána ñepyrũha árape, peteĩ-teĩ pemboyke vaerã michĩmi perekóvagui, ha peñongatu, che aguahẽvo tekotevẽ'ỹ haguã ojeiko oñemono'õ. 3Ha che aguahẽ vove, amondóta Jerusalénpe umi peẽ peiporavóvape, kuatia che ajapóva reheve, oguerahávo umi pembyaty vaekue. 4Ha iporã ramo che avei aha, ha'e kuéra ohóne che ndive.
Pablo omombe'u mba'éichapa ohóta
5Ahakuévo ahasa vaerã Macedonia rupi, ha Macedonia rire aguahẽta Coríntope.#Hch 19.21. 6Ikatu vaerã apyta sapy'ami pene ndive, ha ikatu voi ahasa upépe ro'y pukukue. Aipórõ, peẽ peche pytyvõne mamo ahatahápe upe rire. 7Ndapohechaséi ko'ágã ahasakuévonte, aha'arõ uvei aimévo pene ndive sapy'ami, Ñandejára ohejárõ chéve. 8Éfesope katu apytáta Pentekostés ára peve,#Lv 23.15-21; Dt 16.9-11. 9okẽ niko ojepe'a porã chéve hína amba'apo haguã, oimérõ jepe heta ndaija'éiva che rehe.#Hch 19.8-10.
10Oguahẽ ramo Timoteo,#1 Co 4.17. peñeha'ã tovy'a pende apytépe, omba'apo niko Ñandejárape guarã chéicha avei. 11Aníkena mavave ndapeguerohorýi chupe. Peipytyvõ uvei ojeity haguã tapére py'a guapýpe, ou haguã che recha. Aha'arõ hína chupe, ambue ñane pehẽngue kuéra ndive.
12Ñane pehẽngue Apólospe katu, heta ajerure ohomi haguã ñande pehẽngue kuéra ndive pende rechávo. Ha ko'ágã rupi ndohoséi gueteri. Ohóta ija vove chupe.
Ñemoñe'ẽ
13Aníkena peke, ha pene mbaretéke pende jeroviápe. Pende py'a guasúkena ha pejepytaso. 14Ha opa mba'e pejapóva, pejapo mborayhúpe.
15Che pehẽngue kuéra, peẽ peikuaa porã Estéfanas#1 Co 1.16. rogagua hague, Acáyape, umi oike raẽvete vaekue ñane jeroviápe, ha omba'apo hague ñane pehẽngue rehehápe. 16Aipota, peẽ avei pehecha kuaa ha peñemoĩ umi ha'e kueraichagua ha opa oipytyvõ ha omba'apóva ko'ã mba'épe ykére.
17Avy'aite niko ou haguére Estéfanas, Fortunato ha Acaico, pene pore'ỹme niko 18ha'e kuéra ome'ẽ chéve py'a guapy, peẽmeicha avei. Pehecha kuaáke umi ha'e kuéraicha guápe.
Maitei ipahavogua
19Tupã iglésia Asia pegua oguerahauka peẽme imaitei. Áquila ha Prisca#Hch 18.2. ha umi Jesús reroviaha oñembyatýva hógape, oguerahauka peẽme heta maitei Ñandejára rérape. 20Toguahẽ peẽme maitei opa ñane pehẽngue kuéragui. Peñomomaitei peñohetũvo marangatúpe.
21Che, Pablo, amoguahẽ peẽme ko maitei che po rupiete ajapo vaekue.
22Oime ramo ohayhu'ỹva Ñandejárape, to'a hi'ári Ñandejára Ñe'ẽ pohýi! Ore Jára, eju!
23Ñandejára Jesús tohekuavo pende ári ipytyvõ. 24Che mborayhu akói oĩ pene ndive, Cristo Jesús rérape.
Currently Selected:
1 Corintios 16: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.