Aj Colosa 1

Jun qꞌolbꞌil kye nimil toj tnam Colosa

1Ayiꞌn Pabl, jun tsanjil Jesucristqiꞌn, noq tuꞌn tajbꞌil qMan Dios. Nxi ntzꞌibꞌinjiꞌy uꞌj luꞌn junx tukꞌa qerman Timotey. 2Nxi ntzꞌibꞌiꞌn kyeꞌy, ayiꞌy werman te aj Colosa, a waꞌlqiꞌy toj kynimbꞌila tiꞌj Crist, a skꞌoꞌnxix tuꞌn Dios. Axte qMan Dios ktzajil qꞌonte jun t-xtalbꞌil kyibꞌaja, ex jun kymujbꞌil kyibꞌa toj tkyaqil.

Tnaꞌj Dios Pabl kyiꞌj nimil toj Colosa

3Kukx nqo naꞌn Diosjiꞌy, ex nxi qqꞌoꞌn chjonte kyiꞌja te Dios, a Manbꞌaj te qAjaw Jesucrist, 4quꞌn ma qbꞌiꞌy jun tqanil tiꞌj kynimbꞌila tiꞌj Crist, a Jesús, ex tiꞌj tqꞌaqꞌbꞌil kykꞌuꞌja kyxoliliꞌy tiꞌj tkyaqil txqantl nimil. 5¿Ex jaꞌn ntzaje kynimbꞌila ex tqꞌaqꞌbꞌil kykꞌuꞌja? Antza ntzaje tiꞌjjo a nchi ayoꞌn tiꞌj; aj tkyaqiljo a o tzaj ttziyin Dios, ex kꞌuꞌn tuꞌn te kyeꞌy toj kyaꞌj. O tzaj kykꞌmoꞌnjiꞌy qꞌuqbꞌil kykꞌuꞌja, atxixj tej tkubꞌ kybꞌiꞌn, ex tkubꞌ kyniminjiꞌy Tbꞌanil Tqanil kolbꞌil, a Tyol Dios twutzxix wen.

6Ex toj tkyaqil twutz txꞌotxꞌ, luꞌ Tyol Dios nchꞌiy wen, nyakuj jun wiꞌ awal, nimxix twutz ma tzꞌel; ikyxjo tzeꞌnku ma bꞌaj kyxola, ex toj kychwinqila, tej tok kybꞌiꞌn tqanil t-xtalbꞌil qMan Dios, ex el kynikyꞌa tiꞌj qa twutzxix.

7Tkyaqiljo lo, o bꞌaj t-xnaqꞌtzin Epafras,#Col. 4:12; Flm. 23. a o tzꞌaqꞌnin junx qukꞌiy, ex nimxix tqꞌaqꞌbꞌil qkꞌuꞌja tiꞌj. Waja tuꞌn t-xi nqꞌmaꞌn kyeꞌy qa ajo Epafras jun tbꞌanil taqꞌnil Crist at kyxola. 8Ex tej tul tzaluꞌn, a ul qꞌinte tqanil kyiꞌja, qa nimxix tqꞌaqꞌbꞌil kykꞌuꞌja qiꞌja, a tzajnin tiꞌj Xewbꞌaj Xjan.

9Tuꞌnpetziꞌn, atxix tej qbꞌintiꞌy, kukx nqo naꞌn Diosa kyiꞌja, ex nqo qaniꞌn te, tuꞌn tqꞌoꞌnte tumil kyeꞌy, tuꞌn tel kynikyꞌa tiꞌj tajbꞌil, ex tuꞌn ttzaj tqꞌoꞌn nim kynabꞌla, ex tuꞌn tel kynikyꞌa toj kyanmin tiꞌjjo a taj Dios kyukꞌiy. 10Ex ikyxjo, nqo kubꞌsin qwutza te Dios, tuꞌntzintla kybꞌeta toj tumilxix tzeꞌnkuxjo tajbꞌil qAjaw, ex tuꞌntzintla ttzalaj Dios kyiꞌja toj tkyaqil, tuꞌn kybꞌinchintejiꞌy wen, ex tuꞌn kyel wena toj kychwinqila tzeꞌnku jun tbꞌanil awal, nimxix twutz n-el. Ikytziꞌn, k-elilexix kynikyꞌjiꞌy te Dios. 11Ex nqo qaniꞌn te Dios, tuꞌn ttzaj tqꞌoꞌn jun kujsbꞌil kyeꞌy, noq tuꞌn tkyaqil tipin, tuꞌn kyweꞌxixa tukꞌa jniꞌ kyipiꞌn, ex tuꞌn tikyꞌx kyuꞌn, exla qa nim nya bꞌaꞌntz tzul kanin kyiꞌja. 12Ex nqo qaniꞌn te qMan, tuꞌn t-xi kyqꞌoꞌn chjonte te Dios tukꞌa nim tzaljbꞌil. Quꞌn tuꞌn ma qo txꞌixpit tuꞌn, tuꞌn tbꞌant qnajan toj kyaꞌj, a nqoptzꞌaj wen, ex tuꞌn ttzaj qkꞌmoꞌn tkyaqiljo qetzbꞌil at qoklin tiꞌj, a ktzajil tqꞌoꞌn Dios te tkyaqiljo nimil. 13Quꞌn ma qo klet tuꞌn Dios tjaqꞌ tipin tkawbꞌil il, a qxopin toj qanmin, ex ma qo tzaqpet te tipin tkyaqil nya bꞌaꞌn, tuꞌn qpon tiꞌn toj Tkawbꞌil Tkꞌwal, a kꞌuꞌjlin tuꞌn. 14Noq tuꞌn tkyimlin Jesús te qxel, ma qo klet, ex ma kubꞌ najsit tkyaqil qil.#Ef. 1:7.

Ma qmujbꞌe qibꞌ tukꞌa qMan Dios, noq tuꞌn tkyimlin Tkꞌwal

15Nya qꞌanchaꞌl te Dios, me atziꞌn jaꞌlin, ma qli noq tuꞌn Tkꞌwal, a nimxix toklin, atxixj tej naꞌmxtaq tkubꞌ tchꞌiysin Dios tkyaqil. 16Ex aku teꞌ Tkꞌwal tAjaw Tkyaqil, ex noq tuꞌn, o bꞌante tuꞌn Dios tkyaqiljo a at toj kyaꞌj ex jniꞌ at twutz txꞌotxꞌ: Tkyaqiljo qꞌanchaꞌl ex tkyaqiljo nya qꞌanchaꞌl, junx kyukꞌa jniꞌ nmaq kawil ex kykyaqil nmaq kyoklin, ex kykyaqiljo nejinelqe junx kyukꞌa jniꞌ kawbꞌil. Kykyaqilxjo lo o chi bꞌant tuꞌn Tkꞌwal qMan Dios, tuꞌn kyajbꞌin te. 17Ex kukx o teꞌn Tkꞌwal te tnejil, atxixj tej naꞌmtaq tbꞌant tkyaqil, ex toj ttxolilxix tzyuꞌmila tibꞌjo tkyaqil tuꞌn. 18Ex ikyxjo, a te Tkꞌwal Dios wiꞌbꞌaj, quꞌn nejinel te Ttanim qMan, a axjo t-xmilil. Ex ate nej jatz anqꞌin kyxol kyimnin, tuꞌn tok toklin te tnejilxix kywutz kykyaqil.#Ef. 1:22-23. 19Quꞌn axte Dios tajtaq tuꞌn tyekꞌinte Tkꞌwal ikyxixjo tzeꞌnkuxjo a toj tkyaqil. 20Ex noq tuꞌnjo Tkꞌwal, tajtaq Dios tuꞌn tmujbꞌinte tibꞌ tukꞌa tkyaqil twutz txꞌotxꞌ, ex tukꞌa jniꞌ at toj kyaꞌj. Ex noq tuꞌn tchkyꞌel Jesús, a Tkꞌwal, el chitj, tej tkyim twutz cruz, o tajbꞌe Dios tuꞌn tkubꞌ tnikꞌuꞌn juntl majl tkyaqiljo bꞌinchin tuꞌn, a otaq naj tuꞌn il.#Lc. 19:10; Ef. 2:16.

21Najchaqtaq otoꞌye ojtxe tkꞌatz Dios, ex ajqꞌojqotaq tiꞌj toj qanmin, noq tuꞌn tpaj qbꞌinchbꞌin nya bꞌaꞌn. 22Me atziꞌn jaꞌlin, axte Dios o tzꞌok mujbꞌinqe junx tukꞌa, noq tuꞌn nimx ikyꞌx tuꞌn Jesús, tej tkyimjo t-xmilil, tej tten tzaluꞌn twutz txꞌotxꞌ. A Jesús skꞌoꞌnxix tuꞌn qMan Dios tuꞌn tok te Crist te jun majx. O bꞌantjo luꞌn tuꞌn, noq tuꞌn qpon qꞌiꞌn twutz, saqxix toj qanmin, ex ntiꞌ chꞌin tzꞌil qiꞌj, ex ntiꞌ chꞌin qkyꞌi.

23Tuꞌnpetziꞌn, qa qaj tuꞌn qok ikyjo, il tiꞌj tuꞌn qweꞌxix wen toj qnimbꞌil, tuꞌn mina jaw kaꞌmin qkꞌuꞌj tiꞌjjo a nqo ayoꞌn tiꞌj. Ikytziꞌn, mina qo txalpaj tiꞌjjo luꞌn, a ma qbꞌi, ex tzajnin tiꞌjjo Tbꞌanil Tqanil kolbꞌil. Atziꞌn Tbꞌanil Tqanil, atzin nqꞌmaꞌnte kyexjal toj tkyaqil twutz txꞌotxꞌ; ex ayiꞌn Pabl, loqiꞌn nchin mojin tuꞌn tyolit.

A taqꞌin Pabl kyxol tkyaqil Ttanim Dios

24Atziꞌn jaꞌlin, tzun nchin tzalaja tiꞌjjo n-ikyꞌx wuꞌn, quꞌn bꞌiꞌn wuꞌn, qa n-ajbꞌin luꞌn tuꞌn kychꞌiya, ikyx tzeꞌnku a ma tzikyꞌx tuꞌn Jesús n-ajbꞌin te kolbꞌilqe. Ayintzin weꞌ loqiꞌn nchin ikyꞌsin tiꞌjjo a atx taj noq tuꞌn tel wenjo Ttanim Dios, a t-xmilil Crist. 25Quꞌn ma tzaj tqꞌoꞌn Dios wokliꞌn te jun aqꞌnil txol Ttanim, quꞌn atzin waqꞌiꞌn, a o tzaj tqꞌoꞌn, a tuꞌn t-xi nqꞌoꞌn kyeꞌy tkyaqiljo Tyol Dios,#Ef. 3:2. 26junx tukꞌa t-xim, a ewintaq kywutzxjal atxix ojtxe. Ewintaq tuꞌn Dios nej, me atziꞌn jaꞌlin, ma kubꞌ tchikyꞌbꞌin Dios te Ttanim. 27Quꞌn taj Dios tuꞌn tkubꞌ yekꞌit twutz tkyaqil Ttanim, tuꞌn tel tnikyꞌ tiꞌjjo t-xim, a ewintaq. Iky t-xim Diosjo kyjaluꞌn: Qa tkyaqil xjal twutz txꞌotxꞌ at kyoklin junx, tuꞌn kyok te Ttanim Dios, ex tuꞌn tokx Jesucrist toj kyanmin. Ex noq tuꞌn at Crist toj qanmin, loqo nqo ayoꞌn tukꞌa tqꞌuqbꞌil qkꞌuꞌj, tuꞌn qpoꞌn junx tukꞌa toj kyaꞌj, jaꞌ qo jawila nimsin tuꞌn.

28Ex awo qeꞌ nqo yoliꞌn tiꞌj Jesucrist, ex nqo qꞌoꞌn tumil kye kykyaqil xjal, ex nxi qxnaqꞌtziꞌn te tkyaqil, tukꞌa tkyaqil qnabꞌla, noq tuꞌn kynimin jniꞌ xjal Tbꞌanil Tqanil, ex tuꞌn kytijinxjal toj kynimbꞌil, noq tuꞌn Crist, a Jesús. 29Tuꞌnpetziꞌn, nchin aqꞌniꞌn, ex n-ok tilil wuꞌn tukꞌa tkyaqil tipin Crist, a at toj wanmiꞌn ex toj nchwinqila.

Currently Selected:

Aj Colosa 1: mamC

Highlight

Copy

Compare