Gipgujetkaluru 18
18
Nikawnanatka tsro Wawiloni
1Wanepnute netlu satu Goyakalutowreru tengogne gijrukyachri. Tsru potu rutakikolu. Ratajiwnale pokamlatlu tye chiji. 2Ga wa gichkoplaji china sapleta. Wane china:
¡Nikawnanatka, nikawnanatka tsro Wawilonyani!
Kamchine gwiyawaka tixatka
ga wa pejnuruneko kamchine puchotlewatachine gishyatikowaka,
ga wa pejnuruneko koshichine kapcholune ga wa gayegixkalune.
3Gi rixanu tapoklewle getsotanrewle wingate
payinemnunanuka gira.
Walayma rapoklewatna tyechijne pogirene.
Ga wa marnewatachine tyechijne gajene
ponikowata tshichponponikowleshatinriya.
4Ga wa satu tokanchi tengogne giyakatyachri njema. Wane china:
Gishpakinitkalo, nayinerutene, gma mumukochirewatyanuplo,
ga wa gma yoptotyanuplu tsru tsaletikoluya.
5Gi rixanu tengognepotuko rapokmoletinitka tmukochire.
Ga wa Goyakalu gishinikatkalu tma poyagkaklenu.
6Papnutanro tixa gapnulewletyawaka.
Gepi kata psatkakyegitanro tkamrure pixka.
Wa girapistono tutakgatanru,
gepi kata putakgatinro.
7Wane tixa galixkotletnawa ga wa tponikowashatinri wanekpejnu penekanro tsalewnapotutinri ga wa twamonuwatinri.
Gi rixanu wane chingajita, “Gita pogirewatachrono tuplatachrono.
Gi wa mkapyalno.
Gike nixiniko wamonchi netanu.”
8Wale chinanu pshinitsonuji rapokanu tsalewninripotu:
gipnalu, wamonchi, ga wa tsru nachlu.
Ga wa xirnachri tyoxikikolupa.
Gi rixanu gichkolni Gitsrukaachi
Goyakalu tuklukanuwnayegjixjeru.
Wawiloni ruchiyagatanna
9Wala ruchiyagatanna ga wa rukegeknanuwatanrona tyechijne pogirene, walayma gapoklewatachine ga wa tixje ponikowashatachine, wa wanna getiniplu tyoxikikolupgya. 10Tsalewnapotutinri, piklena chinanu wajra tunwatanna. Wane chinachinepni:
¡Gi waneni! Tsru potu pokchi Wawiloni, gichkolu pokchini.
Gi rixanu pshinitsonuji rapokatka puklukanuwnayegjixikolu.
11Ga wa saplewjekteyegitanrona tyechijne gajene kmarnewaklerune ga wa ruwamonuwatanrona. Gi rixanu gike wanepnute gagjitanunna rejnunkatna. 12Rejnunkatna walenwa kori, ga wa sroschi, ga wa kwenursotleru, ga wa katajiroji perlaji, ga wa wale potu mkachrichrata, ga wa pakniga yoshmookaluru pixkalutu mkachri, ga wa pgayamtalu, ga wa serolu mkachri, ga wa pejnuruko pgamlumunalu, ga wa pejnurukostono nikchi gitsruka gapkajere kamrutikalurustono, ga wa pejnuruko kwenuru potu gagmunastonkaka, ga wa sintawoshpata, ga wa yowuma, ga wa kiglesotlerushpata. 13Ga wa kanilata, ga wa pgamluru, ga wa pgamlugalo, ga wa pgamlupagiri yochpiikalurupa, murmunga, pgamlupagirpotu, ga wa winga, ga wa goliwangi, ga wa wale potu trikopagi, ga wa triko, ga wa prachine, ga wa gowegane, ga wa kawalyone, ga wa chiji yapachrokaka kawalyo kosetanro, ga wa manchikaka, ga wa yine giwekinri.
14Wa gejnuji punshinikanu getsotanutanru gitspalatinyi.
Ga wa pejnuruko ponikolu
ga wa pejnuruko gatajiwnachri pamginina.
Gi pagogneko rukshiiko.
15Ga wa tyekaka marnewatyachine, walaya ponikowatachine tsalewnapotutinri piklena chinanu wajra tunwatanna. Ruchiyagatanrona ga wa ruwamonuwatanrona. Wane chinanna:
16¡Gi waneni! ¡Gi waneni, tsru pokchini!
Wale potu klatalu mkachri,
ga wa pakniga yoshmookaluru pixkalutu,
ga wa serolu mkachri gitakachro.
Ga wa kori tugletika, ga wa kwenuru potu sotlejiruya
ga wa katajiroji perlajkakaya.
Gi rixanu pshinitsonuji
giknookalurni gi pejnunanukta ponikolewlu.
17Ga wa pejnuruneko kanawa ganikachine, ga wa pejnuruneko kyagapgaklerune ga wa pejnuruneko kanawa kamrurewatyachine, ga wa pejnuruneko tsru wenu kamrurewatyachine, wajra tunwatanna. 18Ga wa saplewjektetna retinrina tyoxikikolupgya. Wane chinna, “¿Girupni tye tsru pokchi pixkalutu?”
19Chijipagi rupkajiwutna. Ga wa saplewjetanna. Chiyagatanna ga wawamonuwatanna. Wane chinna:
¡Gi waneni! ¡Gi waneni! Tsru potu pokchini.
Walaya ponikowatna
pejnuruneko kanawa waneyalune tsru wenu, tponikowleya.
Gi rixanu pshinitsonuji giknookalurotkani.
20Gimuwatanu wala chinanu,
tengogne gajene ga wa kpashirine,
ga wa yokanatkalune, ga wa Goyakalu tokanu geneklewatachine,
gi rixanu Goyakalu giklukanuwnayegjixlo gixa chinanu.
Gike rixiniko rukshikonatka Wawiloni
21Ga wa satu Goyakalutowreru gichkolu gwalu sotlu, tsru ginripi sotle pixka. Tsru wenu ruknoklu. Wane china:
Tye pamuchkonu pixka tixa giknookota Wawiloni,
wa tsru potu pokchi.
Ga wa gike rixiniko rukshiikonatka.
22Ga wa kgitpetsaklerunegima
ga wa kgitloklerunegima
ga wa ktumlejiklerunegima,
ga wa kowiklerunegima
gike rixiniko jemkotka pixaya.
Ga wa pejnuruko kamrurchi gike rixiniko rukshiikotka pixaya.
Ga wa ginripsotlegima gike rixiniko jemkotka pixaya.
23Ga wa katalo pokamlale gike rixiniko pokamlatyegityi.
Ga wa gnunrowatachriplaji ga wa gnuruwatachroplaji
gike rixiniko jemkotka pixaya.
Gi rixanu kmarnewakleru pixanu
wannanwa tsrukakalune tyechijneya.
Gi rixanu pkagonchiwle payinemnunanuka pyokwitinri.
24Ga wa walaya rukshikika Goyakalu tokanu geneklewatachinegraga,
ga wa kpashirinegraga,
pejnurunniko giylatkalurunena tyechijneya.
Currently Selected:
Gipgujetkaluru 18: pib
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
