Codosas 1
1
I. BEDANQUIN CHIAID
(1.1-8)
Mibi tantiembi, quequin chiaid
1Pabado nebi. Nuquin Papa bunacpadombuen Esuquidistun: Ubi chuibenneta, caidquio nebi. Esuquidistu tantiaquid icsho nuqui cun utsi caid Timoteo ubëd iquec. 2Aidbëtambi chieshtoenquio icquin Esus tantiaquid Codosas yacno iccuededquido Nuquin Papan: Cun matses nec, caido icsho cun utsibo nec, quequin mibitedi tantiaquin chiec nebi. Esus tantiaquido icsho ma Nuquin Papan mibitedi bëdambuen isquin bëdambuec tabadquid icmepanuna.
Mibi bëdambuen naquidquio nec, quequin Nuquin Papa chianniaid
3Nuquin Papa Nuquin Icbo Esuquidistun Papa bëdamboshëcquid nec, quequin mibitedi tantiadednequin naden ënenquio icquin chiannembi. Aido bëdambo icmequin bëdambuec tabadquid icmeta, Papa. 4Ambo istanquidon: Esuquidistu tantiaquido yanash Esuquidistu tantiaquido utsibo mimbi: Cun matses nec, caidobëd tantiananquiec tabadosh, quequin chuisho tantiashun: Adequi bëdambuec tantiananmeta Papa, quequin Nuquin Papa chiannembi. 5Esuquidistu Nuquin Papa yacno iuedanquid nec, quequin Nuquin Papan Chiaid Bëda chuibanac aid tantiaquido mibitedi yanac. Adquid yanshun: Abi yacno abuc Nuquin Papabëd tabadtequid nebi, quequin chieshtoenquio icquin cainquidombo mibitedi nec. 6Aden Chiaid Bëda chuibanquid mibi yacno nidshun chuibanac mibitedishun: Abimbo caic, queshun tantiabempanëdac. Mibitedi chuibanacpadombuembidi matses utsi utsiec yacno chuibenniac adembidi dadpenshun: Abimbo caic, queshun Esuquidistu Nuquin Papa bëdambuen ismequid tantiabempanëdash. 7Aden mibëd icquin Epapadasën chieshtoenquio icquin Esuquidistu chuibanac aid tantiaquido mibitedi yampondac. Aidi umbi Esus chuibanacpadombuen chuibanquid icsho umbi tantiaidquio nec.#1.7 Epapadas Codosas yacnocquid nepanëdash. 8Adquid yec mibi yacnouësh choshon mibitedishun naid naden chuituidpondash: Nuquin Papan Mayan Bëdan tantiamiacpadquiec Esus tantiaquidobëd tantiananquiec tabadosh, quequin Epapadasën chiondashi.
II. NUQUIN PAPA BËDAMBUEN ISMEQUID ESUQUIDISTU CHIAID
(1.9-23)
Esus tantiaquido chieshtoenquiocquid icme, Papa, quequin Pabadon chianniaid
9Aden Epapadasën chuiboc mibitedi tantiaquin ubitedishun ënenquio icquin naden Nuquin Papa chiannembi: Mimbi tantiacpadombuen min Mayanën bëdambuen tantiamiac: Nuquin Papan chiacpadombuen nate bunebi, quequin ma bëdambuen tantianu. Tantiamequiota, Papa, quequin chiannembi. 10Aden Nuquin Papan abi bunacpaden nate mibi tantiamiac mibitedi utsibobëd nashunnanec bëdambuec tabadendac. Adshun: Nadquio Nuquin Papa iquec, quequin bëdiactsëc tantiabuedi canidoacbimbuen bëdambuen tantiaquidquio yanendac. Adsho isash: Bëdambo iquebi, quendac Nuquin Icbo Esus. 11Nadembidi Nuquin Papa chiannembi. Mibi nadatiambocquid yec bëdamboshëcquid icquin Codosas yacnocquido dayacquio icmequimbi utsibon chieshënquin natiamesho issun chieshtoenquiocquido icmeta. Adoac mibi tantiec cuishonquequid iquendac, Papa. 12Mimbi bëdambocquid icmebanac icsambocquid nibëdacno mimbi namiacno uëshëmboshë yacno mibi tantiaquid utsibobëd mibëdi tabadendabi, quequin tantiec: Nuquin Papa bëdambo iquec, quec cuishonquendac, Papa, quequin Nuquin Papa chiannembi.
13Ënden Mayan Icsa Satanasën iuaquin namiaido yec inchëshquio yacno tabadacbimbuec tabadsho Nuquin Papan nuqui mënchicpondash. Aden mënchicshun ambi tantiaidquio aton Mado Esuquidistun namiaido nuqui icmiondash. 14Nuqui icsambuen naid Nuquin Papa bëshunmenuec aton Mado abided cuidadec uënëspanëdash.
Nuquin Papan mado abentsëqui abitedishun Icbombo Esuquidistu nec, quiaid
15Nuquin Papa isadesambo icnubi abipadquidquiobidi yec Aton Mado matsesacsho Esuquidistu matsesën ispanëdash. Abitedi uabi yequi Esuquidistu abitedimbo namequid icnush aton Papabëd icpampic. 16Abubëta nidaid uashun aidën icquidtedi uanuna, queshun Nuquin Papabëtan aidëmbi abitedimbo uapampic. Matsesën isaidbëta matsesën istiapimbocquidtedi Esuquidistun uapampic. Nuquin Papabëd icquidotedi ambi uampidquiobidi nec. Adembidi Mayan Icsa Satanas aton iuabobëta ambi uampidbidi nec. Aidotedi bëdambocquidobëd icsambocquid utsi utsiec chuiquid tapambo yantequid uapampic. Matsesteditsen Esuquidistun uaido nec. Aidotedishun Icbo Esuquidistu nec. 17Abitedi uabi yequi ëndenquimboshë icpampidquio Esuquidistu nec. Aidëmbi: Umbi uaido namebannu, quequin ambi tantiacpadombuen ambi uaidtedi abi bëdambuen namebanendac. 18Adquid iquec abi tantiaquidtedishun Icbombo Esuquidistu nec. Adnubi abi tantiec iccuededquido aton dadabimbuecquid nec. Adquid yec Nuquin Papan Madombo ëndenquimboshë icpampidi matsesash uënëspanëdash. Adsho Nuquin Papan abia uincuenmeshun ambi uaidtedishun Icbo abentsëcquiobi icmepanëdash. 19Adoac Nuquin Papapadquidquiobidi yec nadatiamboshëcquid nec. 20Esuquidistunuidtsëqui nac Nuquin Papan ambi tantiacpadombuen ambi uaido nidaidën icquidobëtabi abuc icquido abitedimbo bëdambuen tabadmec. Adquid icmenuec matsesën icsambuen naid bedshunash abided cuidadec cueste napotiaidën dectanac intac chididiquec Esuquidistu uënëspanëdash.
Esuquidistun Nuquin Papa matses bëdambuen ismete chiaid
21Ënden Nuquin Papan: Cun matses nec, cacmaido mibitedi icpondac. Adembidi icsambuen tantiaquin nabanquido yec Nuquin Papa chieshënquido mibitedi icpondac. 22Adquid iccondaidi: Nëbi ubi yacno iuednu, quiash abided cuidadec uënëssun Esuquidistun abi tantiaquidotedi ambi icsambuen naid tantienquio yec bëshunquin icsaisabimbuecnuc isquin ambi icsambuen naid nibëdacbimbuecnuc aido Nuquin Papa bëdambuen ismec. 23Chieshtoenquio icquin cainquin Esuquidistu tantiaquid icsho abi yacno mibi iuedendac, quequin chuibansho mimbi tantiondac. Adenuidi Chiaid Bëda ënenquio icquin tantiata. Adombuembidi shubu dadpen icquid Doma yacno chuiquid tapan namiacnoshon chuibennesho nidaid utsi utsiec yacno tabadquidon tantiapanëdash. Umbitsen adembidi aid chuibennepondambi.
III. NUQUIN PAPAN PABADO CHUIBANMIAID
(1.24—2.5)
Esuquidistu tantiaquiota, quequin Pabadon chuibenniaid
24Nëbi mibitedi tantiaquin Esus chuibansho natiamequin mëyanondashi, quec cuishonquec bëdambo iquebi. Ambia chuibansho matsesën Esuquidistu mëyampanëdash. Nëbi Esus tantiaquido mëyantebidi iquendac, quequin Nuquin Papan tantiacpadombuen Esus natiamequin mëyannëdacbimbuen mëyanondashi, quec bëdambo iquebi. 25Mibitedi bëdambo icmenuen Esus tantiaquidotedi nashunquid icmequin Nuquin Papan: Nidaid utsi utsiec yacno nidshun Esuquidistun naid Chiaid Bëda chuibenneta, caidquio nebi. 26Nuquin Papan ambi tantiampicpaden matses tantiamenquio icpampidi nëbi aid tantiamiac Esuquidistu tantiaquido yanac. 27Aden Nuquin Papan ambi matses tantiamenquio icpampidi bëdamboshëcquid Esuquidistu Isadaidpembo tantiamebempanëdash. Adoac Esuquidistu tantiaquido yansho issun Nuquin Papan cun matses caido yec bëdamboshëcquid yacno aidbëd tabadtequid nebi, quequin tantiaquin cainec tabadendac.
28Aden ubi padquidobëtan Esuquidistu chuibenniac aid tantiaquid yansho issun: Esuquidistu tantiec bëdambuec tabadtedneta, quequin Nuquin Papan tantiamiacpadombuen chuibennec nebi. Abi yacno chosho Esuspadquid icmequin ambi bëdambuen isaido ma Nuquin Papan iuednu, queshun chuibennequid nebi. 29Adquid mibitedi icmenuen badiadquidën badiadquidënquien Esuquidistu nadatiambocquidën namiac uidënquio yec chieshtoenquio icquin chuibennec nebi.
Currently Selected:
Codosas 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.