Pidipos 4
4
Esus tantiasho isash cuishonquiaid
1Tantia, cun utsibo, umbi tantiaidquio icsho mibitedi chuinu. Mibi iste bunquiebi. Umbi chuibanac Esus tantiabensho isash bëdamboshëcquid meniacbimbuec cuishonquiondabi. Ubi yacpaden chieshtoenquio icquin Nuquin Icbo Esus tantiec bëdambuec tabadta.
VI. NADEN NATA, QUEQUIN CHIAID
(4.2-9)
Chido daëd chuinu, quequin chiaid
2Tantia. Ebodiabëta Sintique chuinu. Amicananenda. Esus tantiaquid yec: Nuquin Icbo Esusën chiacpadomboen naic bëdambuec tabadnuna, cananec bëdambuec tabadta. 3Tantia, cun utsi. Ubëtan Esus chuibanondaid icsho mibitsen chuinu. Aid chido daëd chuiquin: Bëdambuec tabadta, cata. Utsibon chieshënnubi aid daëdshun Esusën naid chuibennesho ubi nashunondashe. Adembidi Quedemententsen ubëtan chuibanondash. Adembidi utsibontsen ubëtan chuibanondash. Adquid icsho aido Nuquin Papan: Ubëd tabadtequido nec, quequin aton cuëmëdquid Nuquin Papa yacno tabadtequid dadauate dapan dada uaido nec.#4.3 Nuquin Papa yacno tabadtequid dadauate dapan dada uaid: Buan. 32.32; Cuëd. 69.28; E.U.I. 3.5.
Bëdambuec tabadta, quequin chiaid
4Nuquin Icbo Esus tantiec cuishonqueta. Esus tantiaquiec cuishonquequiota, caimbi. 5Ma mibitedi isec utsibo: Esus tantiaquido yec tantiananec nashunnanquido nec, ma quenu, quiash bëdambuec tabadta. Nëbi Nuquin Icbo Esus choeque.
6Adecbidi uënësquio yec natiec tabadenda. Adenquio icquin mimbi tantiaidtedi Nuquin Papa chuita. Aden chiec: Mibi bëdamboshë iquec, Papa, quequin chianneta. 7Aden Abi chiannesho Aidëmbi mibi natiamenquio icquin bëdambo icmendac. Adoac bëdambuec tabadsho isash utsibo: ¿Mitsipadec bëdambo yampash? quetsiash. Adecbidi mibitsen: ¿Mitsipadequini bëdambo yampo? quetsiac. Adash: Nuquin Papa ubi nashunquidquio yec ubi cudasquidquio nec, quequin Esuquidistu tantiec natienquio yec bëdambuec mibi tabadendac.
Bëdamboshë iquec, caiduidi tantiata, quiaid
8Tantia, cun utsibo. Nëidtsen mibitedi chuinu. Abimbo chiaid tantiata. Matses abitedi bëdambuen isnuna, quequin chiaid tantiata. Icsaisambo icquid yec bëdambo icmianquid tantiata. Icsambuen chuishunenquio yaid tantiata. Aden bëdambuen nateuidquio tantiec tabadta. Aidtedi tantiec cuishonquec tabadta, quequin chiaidtedi tantiata. 9Aden umbi: Naden naic tabadta, quequin chuibanondaid tantiaquin nabanta. Adembidi umbi nabansho mimbi isondaid tantiaquin nabanta. Aden nabanec tabadsho isash mibitedi bëdambuec tabadmequid Nuquin Papa mibëd iquendac.
VII. MIBI BËDAMBO IQUEC, CAID
(4.10-20)
Pidipos yacnocquidon bëmiaid
10Nëbi mimbi bëmiaid bedash cuishonquec bëdambo iquebi. Ënden aden meniondashumbic nëbi iuectanneshun ubi tantiaquin mimbi meniaid bëuacsho bedombi. Nuquin Icbon tantiamiacpadombuen: Padpiden menenuna, queshun piucquid bëmiac, quiash bëdambo iquebi. Ubi tantienquio yanondash ¿quequindambi mibitedi tantiape? Padenquio. Buanquid nibëdnuc niondash, quequin tantiombi. 11Cuna nibëdeque. Bec cho ¿quectabi icti? Padenquio. Cuna icnuc bëdambo iquebi. Cuna nibëdnubi adecbidi bëdambo iquebi, quequin tantiabenondambi. 12Cun piucquid dadpen icnuc bëdambo iquebi. Cun piucquid nibëdnubi adecbidi bëdambo iquebi. Pec cubudash adecbidi bëdambo iquebi. Buna natiambo icnubi adecbidi bëdambo iquebi. ¿Atoda natiambo iquec? quec bëdambo iquebi, quequin tantiabenondambi. 13¿Ubenquiodabi adquidtedi icnuc uidënquio icti? Padenquio. Esuquidistun namiaquini adquidtedi icnuc chieshtoenquio yec uidënquio iquec. 14Ubi ad icnuc: Atona nibëdnuc natiatsiash, queshun mimbi ubi bëdambuen tantiaquin: Nashunnuna, queshun bëmiaid isash bëdambo iquebi.
15Min nidaid cuëshë Masedonia caid yacnouësh Esus chuibennenu, quec nidsho issun Esus tantiaquido icquin Pidipos yacnocshon mibitedishunuidtsëqui piucquid menenubi uanno shubu utsin icquidon menenquio iccondashi. 16Adoaquini shubu dadpen icquid utsi Tesadonica yacno nidpondac. Ambo tabadsho: Atona nibëdtsiash, queshun mimbi piucquid bëmedednepondac. 17Piucquid utsi ubi mene, ¿quequin chiectabi nedi? Padenquio. Ma aden bëdambuen nabansho issun Nuquin Papan: Mibi bëdambo iquec, canu, quequin chiec nebi. 18Utsi utsien bedshumbenneshun mimbi bëmiaid Epapadoditon bëacsho bedondambi. Aidtedi bedash bëdambo iquebi. Nuquin Papa bëdambo iquec, camenuen nuadte bëda bëdambo nuadnuc pichicacbimbuen mimbi bëmiaccondac.#4.18 Nuquin Papa bëdambo iquec, camenuen nuadte bëda bëdambo nuadnuc pichicacbimbuen: Buan. 29.18; 30.7-8. 19Adquid icsho Nuquin Papa umbi tantiaidën mitsana nibëdsho mibi icmeshunendac. Atona abitedimbo icnuc Esuquidistu uidtsëqui tantiaquid icsho aden mibi icmeshunquin bëdambo icmendac. 20Adquid icsho: Nuquin Papa bëdamboshë iquec, canuna ënenquio icquin. Amen.
VIII. ËNQUIN CHIAID
(4.21-23)
Aidtedi chiombi, quequin chiaid
21Ambocquid Esuquidistu tantiaquidotedi naden chuita: Nuquin Papa tantiaquido icsho mibitedi tantiembi, quiosh, quequin chuiban. Adembidi nëmbo ubëd icquido Esuquidistu tantiaquidobëtan mibitedi tantiembi, quiosh, cata. 22Doma yacnocquidon chuiquid tapan shubun icquido Nuquin Papa tantiaquido icquin mibitedi caic: Adembidi mibitedi tantiembi, quiosh, cata. 23Ma Nuquin Icbo Esuquidistun mibitedi bëdambuen isquin bëdambo icmepanuna. Amen.
Currently Selected:
Pidipos 4: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.