Doma 13

Nuquin Papan chuiquid tapa icmendac

1Aton matsesën chuiquid tapan chiacpadombuen abitedishun naquid. Aido Nuquin Papan chuiquid tapa icmiaido nec. Aidëmbidi chuiquid tapa icmeshun utsi utsiec yacno tabëcaido iquec.#13.1 B.T.Ch. 8.15 isbanta. 2Chuiquid tapan chiaid niacquin Nuquin Papan Chiaid niaquendac. Aden ambi chiaid niacsho issun chuiquidon cuidquid. 3Bëdambuec tabadquidon chuiquid tapan cuidte dacuëdëntiapimbo iquec. Adquido cuidenquio icquimbien ambi chiaid niacquido chuiquid tapan cuidendac. ¿Ada aido dacuëdënenquio yec tabadte bune? Adte bunec bëdambuec tabadta. Adsho issun: Mibitedi bëdambuec tabadec, catsiash chuiquid tapan. 4Ma matses bëdambuen tabadmenu, queshun Nuquin Papan chuiquid tapa icmiaidën mibitedi bëdambuec tabadmete bunec. Adquid icnubi: Icsambuen nasho chuiquid tapan cuidpanundac, quiash icsambuen naquid dacuëdendac. Adec chuiquid tapa icquin icsambuen naic tabadquido cuidendac. 5Adquid icnuc chuiquid tapabon chiacpadombuen nabanta. Cuidnushe, quequinuidtsëqui tantienquio icquin: Naden nac bëdambo ictsiash. Naden nac icsambo ictsiash, quequin tantiaquin nabanta.

6Bëdambuen tabadmenuen Nuquin Papan chuiquid tapa icmiaidon chiacpadombuen naquin: Nëidtedi piucquid meneta, caid icnuc menequid. 7Chuiquid tapan: Piucquid bec cho. Nacnenmenu, cacpadombuen aidën chiactedi meneta. Min chuiquidon chiacpadombuen naquin bëdambuen ista.

Utsibo tantiaquionona, quiaid

8Aidted bedshun mibi meneuanun nanu, quequin bedenda. Aden nainquio yec utsibobëd tantiananta. Adec utsibobëd bëdambuec tantiananquin Nuquin Papan: Naden nata, quequin Moises chiampicpadombuen nuqui bëdambuen naindac. 9Nuquin Papan Moises chuiquin naden dada uamepampic: Utsin chido chudenda. Utsin bënë chudmenda. Cuessunnianenda. Ampenda. Utsina isash: Cuna adquid nibëdec, quec chieshëmënenda. Naden naquin aid chiampid mimbi natsiac: Mibibi min dada datantiadacbimbuen utsibotsen tantiaquiota, quequin chuipampic.#13.9 Buan. 20.13-17 isbanta. Chotaquën onqueten dada uaid D.N.Ch. 19.18 isbanta. Chotaquën onqueten M.I.Ch. 13.9; M.I.Ch. 5.17-21 isbanta. 10Adec utsibo tantiaquidquio icquin mimbi utsibo icsa uatiapimbo iquendac. Adec utsibobëd tantiananquin Nuquin Papan chiampicpaden mimbi naindac.

Esus chouate chiaid

11Naden mibitedishun tantiata: Chuibanquidën chuibansho tantiashun Esus tantiabenash: Iuecashien Esus chochitec, quiondaidi nëbien abi tantiaquido abi yacno buannuec Esus choec, quequin tantiaquionona. Ushacbimbuen tantienquio icbuedi nëbi ushash isucunacbimbuec dayacquio yec chieshtoenquio icquin Nuquin Papan chiacpadombuen nanuna. 12Nëbien Esus choec, quequin tantiaquin icsambuen nainquio yec bëdambuec tabadnuna. Sondado: Senushe, quiash tsasimbocquid dasiuidacbimbuen icsamianquidën iuanushe, queshun nuqui icsambuen naid ënshun bëdambuen tantianuna. 13Icsambuen nainquio yec bëdambuec tabadquid nebi, queshun peteuidi nua penquio yec tabadquinc tantiadennuen acte paë uaid aquenquio icquinc utsin chido chudenquio icquinc utsin bënë chudmenquio icquinc canuna. Adecbidi utsina isash cuna adquid nibëdec, quiash chieshëmënec tabadenquio icnuna. Adembidi utsin namesho isash chieshëmënenquio icnuna. 14Adec tabadenquio icquin Nuquin Icbo Esuquidistu tantiaquiec aid tabadacpadquiec bëdambuec tabadnuna. Adquid icquin nuqui bunacpadombuenuidi icsambuen nainquio icnuna.

Currently Selected:

Doma 13: mcfNT

Highlight

Copy

Compare