Esusën Uan ismiaid 8

Dada uaid bitaccaid nainquin chicaid

1Adnubien Obecabimbuecquidën nainquin dada uaid bitaccaid utsitsen bedshun chicposh. Aden chicnubien Nuquin Papa yacnouësh abitedimbo nadimbo icposh. ¿Midapadquid nepeba? quec iuepactsëc otacquio tantiec tabadcuededposh.

IV. SHONCATE 7TED ICQUID CHIAID

(8.2—11.18)

Nuquin Papan ismiaid

2Adnubien Nuquin Papabëd icquidombo 7ted: Nuquin Papan chiacpadombuen nanu, quec aid bëisec nidtoash tabadposh. Adsho issun 7ted icquid shoncate icbo icbuen menebamposh. 3Adnubien Nuquin Papabëd icquid utsi ambobidi choposh. Bëdambo nuadquid pichicanu, quequin shocosh bëshpiu bëshpiucquid odo caid nacnenaid sandote bëec choequi Nuquin Papa tabadacnombo pichicate shocosh bëshpiu bëshpiucquid odo caid nacnenaid dayun nidtuidposh. Adsho issun bëdambo nuadquid nua meneposh. Nëid pichicac pushudquid Nuquin Papa yacno nidacbimbuec abi tantiaquidon chianniaid iquec, quequin bëdambo nuadnuc pichicate nacnenaid tapan sandoshon pichicaposh. 4Aden abëd icquidën pichicac aid bëdambo nuadnuc pushudquidbëd abi tantiaquidon chianniaid Nuquin Papa yacnombo abuctoposh. 5Adshumbic aid Nuquin Papabëd icquidën pichicate dapan samëdquid cute dëcsisaid isquidquio icquid bedshun shocoshëmpin sandoposh. Aden sandotanquimbic Nuquin Papa tabadacnoshon nidaidën siabudposh. Adnubi bedbedquetannepambuec abu tesquianniacbimbuec cuëdtoposh. Adquid icnuc nidaid abichobi saca sacaquembuec uëdëquec ishcudposh.#8.5 Adembidi Nuquin Papa dacuëdampambo icquin isadaidbo ismepampic. Buan. 19.16-18 isbanta.

6Aden nidaidën siabudnubien Nuquin Papabëd icquido 7tedshun shoncate bedbuedon shoncanuen sanambededec tabadposh.

Bëyuc 4tedshun shoncaquin ismiaid

7Adshumbic abentsëcshumba shoncadoposh. Aden shoncanubien Nuquin Papan matses yacno ue tsasi chomeposh. Nadquio icposh. Ue tsasi intacbëd daëdash nuambo nëdënquequid chomeposh ue dapa choacbimbuecnuc. Aden chomiaidën nidaid nua pichiqueposh nuamboshë padabicnuc. Cute dadpen pichiqueposh dadpenquioshë padabicnuc. Adecbidi uasintsen pichiqueposh dadpenquioshë padabicnuc.#8.7 Adembidi Esequiedën Nuquin Papan matses cuidte chuipampic. Ese. 38.22 ista.

8Adnubien Nuquin Papabëd icquid utsintsen shoncaposh 5tedshun shoncabi icnuc. Shoncanubien macuësh tapatembi icquid nëdën nëdënquepambuecquid nebudac budec chian dapa mad caid nëpaëdposh. Adec nëpaëdnubi nua chian dapa intacposh, nuamboshë padabicnuc. 9Adec intac yanaidën aid chian dapa mad caidën icquidtedi dadpen uënësbudneposh dadpenquioshë padabicnuc. Adecbidi cano dapa antabëdquidotedi dadpen mentoadposh, dadpenquioshë padabicnuc.

10Adnubien Nuquin Papabëd icquid utsintsen shoncaposh 4tedshun shoncabi icnuc. Shoncanubien uispa dapa nuamboshëcquid abichobi tabotebimbuec nëdën nëdënquepambuec abucuësh budec acte ushumbo pududquequid yacnobëd actembo dadpen nëpaëdposh dadpenquioshë padabicnuc. 11Aid uispa dapa Mucambocquid quequin cuënaid neposh. Aid nëpaëdnubi acte dadpen mucambo yamposh dadpenquiohë padabicnuc. Aid acte acash matses dadpenquio uënësbudneposh.

12Adnubien Nuquin Papabëd icquid utsintsen shoncaposh, 3tedshun shoncabi icnuc. Shoncanubien badiadën uëshë yec inchëshën uëshë yec uispa dadpenquio yec quec chënquebuedi bëdiactsëc chënquenuc icsa uaposh. Adoac uëshëmbo chënquebuedi uëshëpentsëcquio yec chënquecuededtsëccosh.

13Adshun isaquien chiqui dapa abuc cuenec matsesbimbuec naden chiec cumapenec cuëdcuemposh: Padtemboshë, padtemboshë, padtemboshë, matses nidaidën tabadquidotedi cuidac mëyadtequidombo nec, queposh. Shoncabi icbuedon Nuquin Papabëd icquid utsibo 3tedshun shoncabedednuc Nuquin Papan icsaido cuidte tantiac dacuëdampamboshë iquec, quec cuëdcuemposh.

Currently Selected:

Esusën Uan ismiaid 8: mcfNT

Highlight

Copy

Compare