Esusën Uan ismiaid 7
7
Nuquin Papa tantiaquidombo bësiaid
1Aden ismeboshombic Nuquin Papan abëd icquidombo budmiac 4ted nidaid abichobi dacuenadec nidtoash tabadsho ispombi. Aidon cunquequid tapa 4tedbidi icsho icbo icbuen uidënuaquin cuncamenquio icposh. Nuquin Papa: Ma cunquequin icsa uabudnu, quiabi icnuc aid cunquequid tapan nidaid yec acte dapa mad caid yec cute yec quenuc icsa uamenquio icposh.#7.1 Adembidi Daniedën ispampic. Aid iste bunquin Dan. 7.2 ista. 2Adnubien Nuquin Papabëd icquid Ambi budmiaid uëshë choacmiuësh choposh. Nuquin Papa uënëstiapimbocquidën abi tantiaquido cudasmenuen dada uaquin ambi bësebante sanamposh. Aidën: Nidaidbëta acte dapa icsa uamenda, quequin cumapenec cuëdquin Nuquin Papabëd icquido utsi 4ted icquido chuituidposh: 3Chiata. Nidaid yec acte dapa mad caid yec cute yec quenuc icsa uanushe, queshun adembi cunquequid uidën uata. Nuquin Papa tantiaquido yec Aidën iuabo neque. Bësebambono, quetanquin uëshë choacmiuësh choquidën bësebamposh.
4Adshumbic ambi bësebambuedo tambanquin naden chuibamposh: Bësebambuedtedi Acobo cashumbi Nuquin Papan Isadaid quequin cuënaidën mado 12ted icquidon matses tsiuecquido neposh. Aidtedi tambanac 144midted icposh. 5Nëidic Udan matses tsiuecquido 12midted. Nëidic Dubenën matses tsiuecquido 12midtedbidi. Nëidic Cadën matses tsiuecquido 12midtedbidi. 6Nëidic Asedën matses tsiuecquido 12midtedbidi. Nëidic Netadin matses tsiuecquido 12midtedbidi. Nëidic Manasesën matses tsiuecquido 12midtedbidi. 7Nëidic Simeonën matses tsiuecquido 12midtedbidi. Nëidic Debin matses tsiuecquido 12midtedbidi. Nëidic Isacadën matses tsiuecquido 12midtedbidi. 8Nëidic Sabudonën matses tsiuecquido 12midtedbidi. Nëidic Osen matses tsiuecquido 12midtedbidi. Nëidic Benjaminën matses tsiuecquido 12midtedbidi. Aid abitedi tsinacquin tambanac 144midted iquec, quequin chuiposhi Nuquin Papabëd icquidën.#7.5-8 Adembidi Daniedën ispampic. Aid iste bunquin Ene. 49 ista.
Esus tantiaquido Nuquin Papa yacno tabadaid
9Aden ismeboshombic padpiden Nuquin Papa yacnombo ismeuaposhi. Adoac isaquien matses dadpenquioshë tamëdtiapimbo yec nëidtedi tabadposh. Nëidic nidaid utsi utsiec yacno tabadquido. Nëidic matses utsi utsiecquido. Nëidic onquete utsin utsinquiec onquequido. Nëidic shubu daëdpactsëcquid utsi utsiec yacnocquido. Aidtedi Obecabimbuecquid tantiaquido neposh. Aido Nuquin Papabëta Obecabimbuecquid bëisec tabadposh. Abëdi tabadmequin Nuquin Papan icsaisa icmiaido yec dashcute ushumbo icquiduidquio dasiuidcuededposh. Cun matsesën chuiquid tapa ismiacbimbuen: Nuquin Papa bëdamboshë iqueque. Ismenu, quequin niste podobiecquid sananquin uic uiccabededposh. 10Aidon cumapenec cuëdënquin naden chuibededposh:
Abitedishun Icbombo icquin Nuquin Papan
ambi tantiacpadombuen nuqui cuidmenquio icnuen
Obecabimbuecquidded uënës uaquin cuidpanëdash.
Adembidi Obecabimbuecquidën mënchicaid nebi, quequin tantianuna,
quec cuëdëncuededposh.
11Adsho tantiash Nuquin Papa yacno abëd icquido abi dacuenadec dannëshën tinquebudcuededec nidaidën bëccuësquebudcuededposh. Nuquin Papabëd Obecabimbuecquid bëdamboshëcquid neque. Ismenuna, quiash adposh. Adec dacuenadec tabadec aid nënantanquio icnuc dadanobi ëshëcquido 4ted tabadposh. Abi ëquëctsëc dacuenadec tsësiobo 24ted icquido tabadnuc abi ëquëctsëc dacuenadequic Nuquin Papabëd icquidombo tabadposh. 12Aidon naden chuibededposh:
Amen. Ai, abimbo caic.
Nuquin Papa bëdamboshëcquid nec, canuna.
Bëchamauanquiecsho mibi tantiaquiembi, abitedishun canuna.
Cumapenen tantiaquidquio mibi icnuc mimbi tantiacmaid utsi nibëdec.
Mimbi nashunac bëdamboshë iquebi, canuna.
Adembidi: Bëdamboshëcquid mibi nec.
Nadatiambo icquid nec.
Nuquin Papan namiacpadombuen utsibon dëniactiapimbocquid nec.
Abitedishun Icbombo yec nibëdantiapimbocquid mibi nec, canuna ënenquio icquin. Amen,
quecuededposh.
13Adnubien ambocquid umbi 24ted icquid isbued tsësio abentsëcshun naden chuiposhi. Dashcute ushumbocquid abitiombi dasiuidquido ¿Tsutsi nepec? ¿Mitsiuëshquio chouaido nepec? caposhi. 14Adoac: Tantienquio iquembi. Mimbien tantiec tsësio, capombi. Adsho tantiash: Tantia, mibi chuinu. Chieshëmënquidon natiamequin natiamboshë icmiaqui Obecabimbuecquid tantiec chieshtoenquio ictednedo nec, queposh. Aido abided cuidadec uënësaid Obecabimbuecquidën intaquën abi tantiaquido icsho icsaisa icmiaido yec dashcute ushumbocquiduidquio dasiuidquido nec, quequin chuiposhi.
15Obecabimbuecquid tantiaquido icsho Nuquin Papan abi yacnombo puduedmeshun aton iuabo icmiaido icquin abi bëisec nec, queposh.
Adquido icquin Nuquin Papan shubun tabadquin aid ënenquio icquin tantiaquin nashunendac.
Adembidi aton tsadte dapan tsadquin Nuquin Papan abëdi tabadmequin bëdambuen dayun uaido nendac.
16Adoac pete bunec mëyadenquio iquendac.
Actetsen bundoenquio iquendac.
Uëshën pichiquenquio iquendac.
Chun mëyadenquio iquendac.
17Aden Obecabimbuecquid tsadte dapan tsadquidën aton icbon
aton obeca dayun uaquin acte yacno
buanshun acte bëdambocquid acmec.#Isa. 25.8; E.U.I. 21.4.
Adoacbimbuen ënëdenquio yec abëd tabadtequid icmendac.
Adoac bacuë shubisho anin bëucquin bëdambo icmiacbimbuen
abi yacnoshon Nuquin Papan bëdambo icmendac,
quequin tsësion chuiposhi.#Isa. 25.8; E.U.I. 21.4.
Currently Selected:
Esusën Uan ismiaid 7: mcfNT
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
