Esusën Uan ismiaid 20

Mayan Icsa Satanas dëniacquin uidënuaid

1Adshumbic padpiden ismeuaposhi. Adoac Nuquin Papabëd icquid utsi abucuësh budsho ispombi. Podobitsi icsabo tabadaid shëcuë bëtashaid chictebëta shocosh bucu nacnenaid tapa sanamposh. 2Adshumbic nisi dapabimbuecquid bedposh. Aidi ënden icpampid Mayan Icsa cashumbic Satanas caid neposh. Bedtanquimbic shocosh bucu nacnenaid ambi sananaidën datanetanquin uidën uaposh, ma seta midtedi matanmec tsadnu, queshun. 3Adotanquin aidën iuabo tabadacno shëcuë ëquëducquiocquid anneposh. Adoshombic puduentiapimbo icnuc chuiquidën dada uaid bëbitaccaquin shëcuë bëtashquioposh. Seta dadpenquio midtedi matanmeshun bëtashaid chicquin badedquio puduenmenumbi adoposh. Aden seta midtedi matanmiabi icquin abi uidën uactedembi nidaid utsi utsiec yacno tabadquidtedi matses mua uaquin icsametiapimbo iquec, queshun chicten bidiacquin uidën uaquioposh.

4Adshumbic utsitsen ismeuaposhi. Aden ismiac chuiquidën tsadte dapan icbo icbuec: Cuidte chuiquid icta, caid tabadsho ispombi. Adembidi Esus tantiasho chieshënquin mapi butiac uënësaidon mayan tabadsho#20.4 Uincuenmiabicquido quequin mayan capec. ispombi. Aidotedi chieshtoenquio icquin Esus tantiaquin Nuquin Papan Chiaid chuibanquido neposh. Aidobidi bëdi dapabimbuecquid acte ëquëducuësh chobuedbëta abibimbuecnuc nacnenaid tantiatiapimbo icquido neposh. Adecbidi: Aidën iua nebi, quec aid cuëmëdquid dada uadec bësiadenquio icquido neposh. Adecbidi mësiadenquio icquido neposh. Adquido icsho icsamboshë icquidon cuessun secaido neposh. Adquido icsho Nuquin Papan uincuemiac Esuquidistubëtambi seta midtedi matanmequin matses nameposh. 5Aden aido tauaquin uincuenmequimbi seta midtedi matanmeshun: Utsibo abitedi uincuenmembi, quequin adoposh. Aden Nuquin Papan ambi tantiacpadembi uënësaido tauaquin uincuenmeposh. 6Aden tauaquin uincuenmiaido bëdambo yec cuishonquec: Nëbi ubi chian annëdënquiacno nënenquio iquendac. Adoac ubi padpidec uënëste nibëdquiendac, quequin chiec cuëdëmposh. Adec nëish iua cuessunneshun pichicaquidobimbuec icquin: Esuquidistubëd Nuquin Papa bëdamboshë iquec, canuna, quequin chiannequido neposh. Aden seta midtedi matanmequin Esusbëtambi utsibo bëdambuen namendac, quequin ismeposhi.

Mayan Icsa Satanas chian annëdënquequid nëniaid

7Adshumbic seta midtedi matanmeshun ambi uidën uampidi Mayan Icsa Satanas caid chiquendac. 8Adoaquien matses icsambuen namenuen mua uaquin chiec nidaid abitedi yacno nidendac. Nidaid Coc caid yacno nidec nidaid utsi Macoc caid yacno nidshun aidën namiaquien sondado dadpenquioshë masi tamëdtiapimbo yactedi cuesnannuec tsidadendac.

9Aidtedi tsidadash chochoash Nuquin Papa tantiaquido tabadacnombo Nuquin Papan tantiacnombo Edusaden yacno daquiadshun cuessun secanu, quec tabadendac. Adshobien Nuquin Papan abucuësh nëdënquepambuecquid budmequin uesquin pichicaindac. 10Adshumbic aido muaquin icsambuen namequidtsen Mayan Icsa Satanas bedshun aben icquid tapa acte ëquëducuësh chondaidbëta nidaid shëcuënuësh chondaid ënden nësecaondacnombobidi ënëdenquio yec chian annëdënquequid icsamboshë annuadquid yacno Mayan Icsa Satanastsen nënendac. Adoac ënëdenquio yec mëyadec aido tabadendac, quequin ismeposhi.

Nainquin cuidte chiaid

11Adshumbic padpiden matses cuidte ismeposhi. Aden ismiac tsadte tapa ushumboshë icquidën Nuquin Papa tsadsho ispombi. Icsambuen naquido cuidquidquio yec dacuëdampambuec Nuquin Papa isadnuc abubëdi nidaid abichobi nibëdquio yamposh, padpidec isadtiapimbo yec.#20.11 Icsaisambo icquin matsesën naidtedi chuibanquin Nuquin Papan icsambuen naquido cuidendac, camenuec adec tsadposh. 12Adshumbic uënësaidotedi aton matsesën chuiquidobëd utsi chuiquidpenquio yec quec Nuquin Papa aton tsadte dapan tsadsho bëisec tabadposh. Adnubien dadauate dapan dada uabanaid isquin Nuquin Papan matsesën naidtedi abimbo chuibamposh cuidnumbi. Adshumbic abi tantiaquido abëdi tabadmete dada uaid tapa nec, caidën dada uabanaid isquin chuibamposh abëdi tabadmenumbi. 13Uënësaid abitedimbo icposh. Utsi utsiec uënësacsho acte dapa mad caid nëniaid uincuenmiaido neposh. Utsi utsiec nidaidën chococaid neposh. Adsho aidon nabanaidtedi tantiaquin abimbo chuiquin abi tantiaquido abëdi tabadmequimbi abi tantiesabo Nuquin Papan cuidposh. 14Adshumbic uënësmiantequid caid chian annëdënquequid yacno nëneposh. Aid chian padpidec uënëstequid caid neposh. 15Ambobi abi tantiesabo yec aton cuëmëdquid abëd tabadmetequid dadauate dapan dada uabicquid icsho Nuquin Papan cuidquin nësecaposh.

Currently Selected:

Esusën Uan ismiaid 20: mcfNT

Highlight

Copy

Compare