Esusën Uan ismiaid 11

Nuquin Papan oncamiaid daëdshun nate chiaid

1Nuquin Papabëd icquidën piabimbuecquid tambante meneposhi. Adotanquin naden chuiuaposhi: Edusaden yacno nidshun Nuquin Papa tabadte shubu dapa tambanta. Adotanquimbic aid tantiaquin bëdambo nuadnuc pichicate dapatsen tambanta. Adotanquimbic Nuquin Papa tantiec aid shubun pudued puduedquido tambanta. 2Shubu nuntan icquidtedi tambanshun umanuc tsicatequin daquënë uaid tambanenda. Ambo Nuquin Papa tantiesabo matses utsibo pudued puduedendac. Aidon abi tabadaid Edusaden yacnoshon inchësh uëshë 42ted nidmequin dadpen icsa uabudnendac, queposh.#11.2 Nuquin Papan oncamiaid Esequiedën tambante chuipampic Ese. 40.3 ista. Aden aidtedi seta chuiquin Daniedën chuipampic. Dan. 7.25bëta 12.7 isbanta. 3Adnubien Nuquin Papa: Matses daëd umbi chuibuedquio: Adquid iquendac, quequin oncamenuen chomendambi. Aido ambi icsambuen naid matses ënmenuec dashcute icsactsëcquidquio dasiuidendac. Adquid icnuc seta 3ted matanmetanec seta utsi choaid poctsembo cuëscaquin umbi oncamiacpadombuen chuibanendac, queposh.

4Aden chuibocshobic Nuquin Papabëd icquidëntsen naden chuiuaposhi: Aido Nuquin Papan oncamiaid daëd isadaidbon tsusedpan naden chiampid nec: Nuquin Papa tsadacnombo cute odibo caid daëd nitsinaid bëdambocquid iquendac. Adecbidi tabote taboshon daëd nitsinaid bëdambocquid iquendac, quequin chiampid nendac.#11.4 Sacadiasën chiaid nec. Chotaquën onqueten isquin Sac. 4.3, 11, 13 isbanta. 5Aidon Nuquin Papan oncamiaido icquin chuibansho abi chieshënquidën: Cuessunnenu, caqui cuessunniadenquio iquendac. Nuquin Papan dayun uaid icquin aton ana shëcuënuësh nëdënquec choquidën nibëdquiecnuc pichicaquin abi cuessunnenu, quequidotedi cuessunnendac. 6Adembidi Nuquin Papan cuidte tantiamenuen Nuquin Papan namiac nadatiambocquin nabanquin ismebanendac. Aden ismequin chuibanec abi nidabi yacpadembi seta 3ted matanmetanec seta utsi choaid poctsembo cuëscaquin ue chomenquio iquendac. Adembidi aidon acte intac icmendac. Adembidi dacuëdampambo icnuc ambi tantiacpadombuen nadatiambocquin nabanquin matses natiamedednendac.

7Aden aid daëdshun nainquin Nuquin Papan Chiaidtedi chuibanendac. Aden nainshobien icsamboshëcquid bëdi dapabimbuecquid nidaid shëcuënuësh puduenanec choquin aid daëdbëd cuesnanquin abidaëdi dëniacquin bedshun cuessunnendac.#11.7 Esusën Uan Ismiaid capitulo 13 icquidën aid icsamboshëcquid bëdi dapabimbuecquid choaid chiaid icpec. 8Aden Edusaden yacnoshon cuessunneshun chococainquio iquendac. Ma abitedishun isnu, queshun chococainquio icquin podquied ansanendac. Aton Icbo cueste napotiaidën dectannëdacnoshonquio adoendac. Ambo icsambocquido nec, quequin aid shubu dadpen icquid Equipito quequin cuëntanquin Sodoma quequin cuëmpanëdash. 9-10Aden cuessunniash: Nuqui mëyadmequid nëid daëd neque. 3tedec ushshun chococainquio icnuna, queshun chococainquio iquendac. Adashic cuessunnebued isec matses abitedimbo tabadendac. Nuqui natiamequin shubimequido cuessunniosh, quiash cuishonquec abëd icquidobëd menenancuededendac nëidtedi. Nëidic shubu dadpen icquid utsi utsiec yacnocquido. Nëidic matses utsi utsiecquido. Nëidic onquete utsin utsinquiec onquequido. Nëidic nidaid utsi utsiec yacno tabadquido. Aidotedi cuishonquec menenancuededendac. 3tedec ushquin ambi cuessunnebued isbededec tabadendac, quequin Nuquin Papabëd icquidën chuiposhi.

11Adec 3tedec ushash uëshë budnuc tabadnubien cuessunnebued daëd Nuquin Papan uincuenmeposh. Aden uincuenmiac nidtosho isash cuishonquebuedobi natiambo dacuëdec tabadendac. 12Adec nidtosho issun abucshun cumapenen cuënquin: Nëmbo dectatoec cho, cac nidec abu ushu datanec cuessunnebued abidaëdi abuctoendac abi chieshënquidon isnubi. 13Aid daëd abuctosho isec tabadnubi nidaid saca sacaquembuec cumapenec ishcudamposh. Adec nidaid ishcudnubi shubu dadpenquioshë chimeshadbudnposh. Adec chimeshadbudnequin matses catashquin dadpenquio 7midted uënës uabudneposh dadpen padabicnuc. Adnubien uënësabi icquido cumapenec dacuëdcuededendac. Dacuëdcuededequi: Abucquid Nuquin Papa nadatiambocquidëmbien nachitec. Aidquien tantiatiad, quecuededendac, quequin Nuquin Papabëd icquidën chuiposhi. 14Adombuen abi tantiesabo cuidquiendac, quequin daëden ismeposhi ismiabi icquid badedquio abentsëc chotequid icnuc.

Nainquin shoncaquin ismiaid

15Nuquin Papabëd icquidën shoncate sanambuedën nainquin shoncaposh. Shoncanubien abucuësh cumapenec cuëdëncuededposh naden chiec:

Nuquin Papa Ambi Chomiaid Nuquin Icbo Esuquidistubëd abitedishun Icbombo yec nidaidën icquidtedishun Chuiquid Tapambo nendac.

Adquidquio icquin ënenquio icquin abitedimbo namendac.#11.15 Daniedëntsen aton Madobëtan Nuquin Papa abitedimbo namequid iquendac, quequin chuipampic. Dan. 2.44bëta 7.14, 27 isbanta.

16Adashic Nuquin Papa bëisec icbo icbuec aton tsadten tabadbued tsësiobo 24ted icquido: Mibi bëdamboshë iquec, quequin Nuquin Papa ismec dannëshën tinquebudec nidaidën bëccuësquebudcuededposh. 17Adtanquin naden chuibededposh:

Mibi bëdamboshëcquid nec. Abitedishun Icbombo yec nadatiambocquidquio mibi nec.

Nëbi adquid yec nibëdantiapimbocquid mibi nec.

Abitedishun Icbombo mibi iquec.

Nadatiamboquid icsho utsin: Umbiquien dëniacquin namenu, utsin mibi catiapimbo iquec.

Adquid icquin mimbentsëqui matses abitedimbo mimbi namendac.

18Nidaid utsi utsiec yacno tabadquidon aton chuiquidobëtan nëishënquioshon

mimbi chiaid niacniacquin mibi chieshënquiec tabadec.

Adsho mimbi tantiacpadënquio nëbi mimbi aido cuidendac.

Matses abitedi uincuenmetanquin mimbi chiaid niacniacquin icsambuen nabuedo icsho mimbi cuidendac.

Adoshombic mibi nashunquido mimbi oncamiaidobëta mibi tantiaquido abitedimbo mibi yacno mibëdi mimbi tabadmendac.

Chuiquid tapabobëta chuiquidpenquio mibi tantiaquidotedi mimbi bëdambo icmendac.

Padnuen mibi tantiesabo cuessun secanquido icsho mimbi cuidquiendac, quequin chuibededsho tantiapombi.

V. NADQUID IQUENDAC, QUEQUIN ISMETE CHIAID

(11.19—15.1)

Ushquin isacbimbuen padpiden isaid

19Adshumbic Nuquin Papa yacnombo abi tabadte shubu dapa shëcnesho ispombi. Aden shëcnesho isaquien aid nuntan Moisesën nacnenampid Nuquin Papan Chiaid sandote dapa icposh. Ëndenquimboshë ambi#11.19 Buan. 25.10, 21; Ebed. 9.4 tantiaquin nëid dada uapanëdash. Aid ista. chiampicpadombuen Nuquin Papan ambi tantiaidtedi nainquin naindac, camenuen aden ismeposhi. Aden umbi isnubien bedbedquetannec abu tesquianniacbimbuec nua cuëdtoneposh. Nidaid cumapenec ishcudposh. Ue dapa nuamboshë choacbimbuec ue tsasi choposh.#11.19 Nuquin Papambo abitedishun Icbombo nec, camenuen aden ismepanëdash Nuquin Papa yacnoshon.

Currently Selected:

Esusën Uan ismiaid 11: mcfNT

Highlight

Copy

Compare