Esusën Uan ismiaid 10

Nuquin Papabëd icquidën dada uaidëmpi chemiaid

1Adshumbic Nuquin Papabëd icquid utsitsen nadatiambocquid abucuësh abu ushun dabidiquiash budsho ispombi. Uen podquied uenquebudacbipambuec mapino icposh. Uëshë chënquiacbimbuec aton bëtantete bëchamauanquiec icposh. Buintad nitsinaid nëdënquiacbipambuec isquid isquidpambo aton nidte icposh. 2Dada uaidëmpi bidicatsaid copiocshon bëcadoaid sananec nidtuidposh. Tsiembudcuenshun taë abiucshun chian dapa mad caid nëtincaquimbi taë copiocshon mananuc tincapaccosh. 3Adashien bëdi dapa tëbuchoquid noshquiacbipambuec cumapenec cuëdec nuamboshë cuëdtoposh. Adec cuëdquin chiac abu 7tedec cuëdtonequin ëcbedtoneposh. 4Aden abu cuëdquin ëcbedtonesho tantiash: Abu 7tedec cuëdquin chiaid dada uanu, queshobi: Padi. Abucuësh 7tedec cuëdquin chiaidtedi dada uainda. Utsibon tantianushe, caposhi. Adoac dada uainquio icpombi.

5Adnubien Nuquin Papabëd icquid tsiembudcuenshun chian dapa mad caid nëtincaquimbi utsiucshun mananuc tincash nidquimbi aton podo abiuc abuc cadoposh. 6Adotanquin naden chuiposhi: Nibëdantiapimbo icquidën tantianubi abimbo chuinu. Aidëmbi abu yec, nidaid yec, acte yec quenuc uapampic. Adoshon aidën icquidtedi uapampic. Aden abitedi uaquidën chiaidquio chuinu: Nëbi Nuquin Papan ambi tantiacpadombuen icsambuen naquido bëdambuen isnu, quebuedi caintiapimbo icquin cuidendac. 7Ubipadquid Nuquin Papabëd icquid utsintsen shoncate sanambuedën: Nëbi ënquin shoncanubi Nuquin Papan ambi chiampicpadombuen naindac. Adnubi Nuquin Papan ambi matses tantiamenquio icpampid tantiamendac. Ambi oncamiaido chiampicpadombuen nainquin naindac, queposh Nuquin Papabëd icquid.

8Adnubien umbi ënden onquesho tantiabocpadquiec abucuësh cuëdbuedën padpiden chuiuaposhi: Dada uaidëmpi bidicatsaid bëcadoaid sananec tsiembudcuenshun taë abiucshun chian dapa mad caid nëtincaquimbi taë copiocshon mananuc tincash nidquidën sananaid bedshuntan, caposhi. 9Adoac Nuquin Papabëd icquid yacno nidshun: Mimbi sananaid dada uaidëmpi bidicatsaid bec cho, capombi.

Adoaquien: Në, che. Aden chiac min ana shiëdë chiac batambo yacbimbuec icbuedi min pucu yacno budash mucambo yanendac, caposhi.

10Adoac aid bedshun chiac shiëdë batambo yacbimbuec icbuedi cun pucu yacno budash mucambo yamposh. 11Adquio yansho issun Nuquin Papabëd icquid nuacquid tapan chuiuaposhi: Adquid yanendac, quequin matsesën tantiacmaid ambi nabante dadpen mimbi nëidtedi yacno chuibanendac. Nëidic shubu dadpen icquid utsi utsiec yacnocquido. Nëidic nidaid utsi utsiec yacno tabadquido. Nëidic matses onquete utsin utsinquiec onquequido. Nëidic chuiquid tapabo quequin mimbi chuibanendac, quequin chuiposhi.#10.8-11 Adembidi Nuquin Papan ambi oncamiaid Esequied chuiquin: Aden chuita, quequin chuipampic. Ese. 2.7 ista. Dada uaidëmpi bidicatsaid bëcadotsaid Nuquin Papan Chiaid nec.

Currently Selected:

Esusën Uan ismiaid 10: mcfNT

Highlight

Copy

Compare