Uan 5
5
Dada shëquëquenquiocquid Esusën bëdanmiaid
1Iuecquio ictanec Esus: Edusaden yacno cuëdënnuec nuquin matses isadaidbo nidanneque. Nuquitsen nidnunid, quianec nidannepondash. 2Shubu dadpen icquid Edusaden caid daquënë uaquin tsicatiaidën puduedte shëcuë abentsëc obeca puduedte quequin cuënaid icpondash. Aid anoentsëqui chian uaquin uëdëshcaidëmpi tiquidimbocquid icpondash. Aidi cun onquete ebedeon: Betsata, capondash. Ambobi tabadte shubumpi 5ted icpondash. 3Aid shubumpin matses dadpen nadquidtedi tabadpondash. Daicsaido yec nënquido yec bëshuaido yec tidinquequido yec shëquëquenquio icquido yec quec tabadpondash. 4Iuecquio ictannequin Nuquin Papan abëd icquid abi yacnoshon budmiaidën tëccuascaid acten abia mentoadquid bëdanquid, quedenneque. Chianëmpi tëccuascaic ma chobono, quiash cainec tabadpondash.
5Adec nënquidobëd daicsaid dadpen tabadnubi dada abentsëc ënden aton dada daicsabudaid seta 38tedquiobi matanmec capuenquio yec nënquid uepondash. 6Adec uesho istuidshumbien Esusën: Ëndenquio daicsabudaid nec, quequin tantiaquin: ¿Bëdanteda bune? catuidpondash. 7Adoaquien: Ai ¿mitsipadequini bëdampe? Acte tëccuasquesho istanec ubi bëdiactsëcquio nidnuc utsiboba badedquio mentoadtenniosh. Ubi mentonuen buanquid nibëdec, quepondash daicsatsaid.
8Adshobien Esusën: Nidtotanquin mibi nandote chiadtoshon buanec nid, capondash.
9Adoac badedquio aton dada bëdantanquin abi bëbued nandote buanec nidpondash. Aid uëshë cun matsesën: Chonoadtemaid uëshë nec, caid nepondash.
10Aden buanshobien cun matses isadaidbon chuiquidon: ¿Chonoadtemaid uëshënda uete buampaid? Aden mibi nandote buanquin ma mimbi Moisesën chiampid niacpayoc, quequin chushcapanëdash.#5.10 Aden chonoadtemaid uëshë caquin Nem. 13.19bëta Ede. 17.21-22 isbanta. 11Adoaquien: Ubi bëdanmebuedën: Mibi bëbued nandote buanec nid, cac naimbi, quepanëdash Esusën bëdanmebued.
12Adsho tantiashumbien: ¿Tsutsi: Nandote buanec nid, mibi caquid niosh? caquien: 13Tsaun. Tantienquio iquembi. Umbi isambobi badedquio nidaccosh matses dadpenquio icnuc Esus caic, quepanëdash bëdanmebued.
14Adshumbic Esusën Nuquin Papa tabadte shubu dapa tsicatiacno puduedshun ambi daicsacsho bëdanmebued istuidpondash. Istuidshumbien: Tantia. Mibi chuinu. Umbi bëdanmebuedquio mibi neque. Padpidembuen icsambuen nainquiocquin ënash bëdambo icta. Padenquio yec padpidembuec daicsabudchitomane, quiash adta, capondash Esusën.
15Adoaquien bëdanmebued abi: ¿Tsuntsin naosh? cabuedo chiec nidpanëdash. Nidshumbic: Ubi bëdanmebued Esus niosh, quequin isadaidbon chuiquido chuituidpanëdash. 16Aden chuisho tantiatanequien: Chonoadtemaid uëshëmbi bëdanmec icsambo iquec, quequin cun matsesën chuiquidon Esus chieshëmpanëdash. 17Adoac: Mibi adosh, quesho tantiashun abi chieshënquido istuidshun Esusën naden chuipondash: Ënenquio icquin matses tantiaquin nashunquidquio Cun Pa nec. Adembidi matses tantiaquin nashunquidquiobidi nebi, quepondash Esus. 18Adsho tantiatanequien: Chonoadtemaid uëshën naquid icsambo iquec, nuqui cabued: Nuquin Papa cun Pambo nec, quiosh. Aden chiec icsamboshë iquec. Nuquin Papapadquidquio nebi, quechitequien nioshe. Uënës uaquimbien ictiad, quepanëdash cun matses isadaidbon chuiquido.
Nuquin Papan Mado nebi, quiaid
19Adshumbic Esusën naden chuiuapondash: Tantia. Mibi chuinu. ¿Nuquin Papan Madombo icquin umbi tantiacpadombuen naictabi nedi? Padenquio. Cun Pan nasho issun aidën nacpadombuembidi naic nebi. Cun Pan abitedimbo nacpadombuembidi aton Madombo icquin nabanec nebi. 20Ubi tantiaquidquio icquin Cun Pan ambi naidtedimbo ubi tantiamec. Adembidi aidën tantiamiacpadombuen nadatiambocquin nabanquin nëid daicsaidquio bëdanmiombi. Adembidi Cun Pan tantiamiacpadombuen uditsëc nadatiambocquin nabanquin dadpen mibitedi ismendambi tantiadempambo yec tabadnuc. 21Cun Pa uënësaid uincuenmequidquio nec. Aid padquidquiobidi icquin matses umbi tantiaidotedi uincuenmendambi. 22¿Ubi tantiesabo cuidnuenda cun Pan chuipatsiash? Padenquio. Umbien ambi chiacpadombuen namiaid icquin naden chiendac: Nëid ubi tantiaquid neque. Nuquibëdi tabadmenuna. Nëid ubi tantiesa neque. Cuidnuna, quequin cun Pa chiendambi. 23Adquid icnuc: Matsesën: Nuquin Papa bëdambo iquec, quequin ubi tantiaquin ma cun Madotsen bëdambuen tantianu, queshun aden matses cuidte chuiquid icmiondashi. Ubi adquid icmiondaid icsho ubi tantienquio icquidon ubi chomiondaid Cun Patsen tantienquio iquec. 24Tantia. Mibi chuinu. Umbi chiaid tantiaquidën ubi chomiondaid cun Pa tantiaquid icsho cuidenquio icquin ubëdi tabadmendambi. Cuidtequid icbuedi ubi tantiabenash ubëdi tabadtequid yanendac, quepondash Esus.
25Adashic padpiden chuiuaic: Tantia. Mibi chuinu. Uënësacbimbuen ubi tantienquio icbuedombi Nuquin Papan Mado icsho ubi tantiaquid yec uënësacsho uincuenmeshun ubëdi tabadmendambi. 26Uënësaid uincuenmequidquio icquin Cun Pan ubitsen uënësaid uincuenmequidquiobidi icmiondashi. 27Adembidi Matsesën Tishaid icshobi matses icsambuen naquido cuidte chuiquid icmiondashi. 28Ubi adsho tantiash tantiadempambo yec tabadec: ¿Abimbobida capec? quequin tantienda. Cun Pan tantiacpadënquio umbi cuënac uënësaidotedi uincuenendac. 29Adec uincuenacsho ubi tantiaquido ubëdi tabadmequimbi ubi tantiesabo icsho icsambuen naquido cuidacno nidmendambi.#5.29 Adembidi Daniedën chuipampic. Dan. 12.2 ista.
Utsintsen: Adquidquio nec, quequin ubi chiec, quequin Esusën chiaid
30Umbentsëqui natiapimbo iquebi. Cun Pan chiacpadombuen naquin matses cuidte chiendambi. Matsesën naidtedi tantiaquidquio icquin abimbo chiendambi. Umbi tantiacpaden nainquio icquin ubi chomiondaid Cun Pan chiacpadombuen naindambi, quepondash Esus. 31Adshumbic Esusën naden chuiuapondash: Ubiuidtsëqui: Nuquin Papan Mado nebi, quesho tantiashun: Muambo mibi nec, mibitedishun ubi capec.#5.31 Isadaidbo matsesën naden chuipadennec. Abentsëcshun issun chiaid icsambo iquec. Adecbidi: Abentsëcshun tantiashun chiaid icsambo iquec. Daëdshun issun chiaid abimbo iquec. Daëdshun tantiashun chiaid abimbo iquec, quequin chiampid tantiaquin Esusën aden chuipanëdash. 32Adnubi ubi tantiaquin abimbo chuiquid ma utsi iqueyoc. Aidëmbini: Abimbo chuibanquid nec, quequin abimbo chuipondash. 33Mibitedishun: ¿Tsutsi neque? chuimetan, quequin chochomiaidon chiac acten mentoanquid Uanën ubi tantiaquin abimbo chuipanëdash. 34-35Aidi nec, quequin ¿matsesënuidida chuipec? Aden Uanën chieshtoenquio icquin chuisho tantiash mibitedi bëdambo icuidondac. Umbi Uanën naid chuisho tantiashun: Abimbo caic, quequin ubi tantiasho bëdambuen isquin ubëdi tabadmetsiambi, quequin tantiaquin Uanën naid chiec nebi. Matses icquimbi tabote sedacbimbuen Uanën ubi bëdiactsëc tantiamequin chuibampanëdash. 36Adquid Uan icnuc ubi abimbo chuiquin tantiamequidquio abi utsi iquec. Aidëmbi: Matses ismenu, queshun nadatiambocquin nabanquidquio icmepondashi. Ambi chomiaid icquin Nuquin Papan namiacpadombuen nadatiambocquin nabanquin umbi ismesho isash: Ai, aidi nec, queshun ubi tantiatiadquidi mibitedi nec. 37Ubi chiecbidi ubi chomequidtsen Cun Pa abimbo chiec onquepondash. ¿Adembidi Cun Pa onqueshoda tantiadio? ¿Cun Pada istio? Padambo mibitedishun iquec. 38Adembidi ambi dada uamequin chiampidquio ma mibitedishun bëdambuen tantienquio yoc. Aden tantienquio icquin ambi chomiaid icsho ubitsen mibitedishun tantienquio iquec. 39Mibitedi nadpec. Nuquin Papan Chiaid nuquin tsusedpabon dada uampid tantiaquidquio nebi. Aid isbanquid yec Nuquin Papabëd ënëdenquio yec tabadtequid nebi, mibi quepec. Ma ubimbo chuiquin Nuquin Papan dada uamiampid neyoc.#5.39 Moisesën Nuquin Papan oncamiaid bëdamboshëcquid chomete Esus chuipampic. M.I.Ch. 30.15-20 isbanta. 40Aden dada uamiampid isbanquido iquequi mibitedi ubi tantiate bunenquio iquec. Ubi tantiashien mibitedi ënëdenquio yec ubëd tabadtsiandac.
41Ubi adsho tantiashun matsesën: Mibi bëdambo iquec, ma ubi canu ¿quectabi ique? Padenquio. 42Ubi tantienquio icsho issun: Nuquin Papa tantiesabo nec, quequin mibitedi tantiembi. 43Umbien Cun Pan chomiaid icquin aidën chiacpadombuen naic. Aden nasho issumbi mibitedishun ubi tantienquio iquec. Utsibic: Nuquin Papa yacnouësh choquid nebi, quec muaquidien mimbi badedi tantiatsiac. 44Matses: Mibi bëdambo iquec, cameteuidi bunquin Nuquin Papambo mibitedishun tantienquio iquec. Aden Nuquin Papa: Mibi bëdambo iquec, mimbi cametiapimbo iquec, quepondash Esus.
45Adashic padpidec: ¿Umbentsëquidambi: Ubi tantiesabo neque. Cuidnuna, quequin mimbi naid Cun Pa chuipe? Padenquio. Mimbi tantiaidënquio Moisesëntsen: Nëido icsambo iquec, mibi caindac. 46Aidën dada uaquin Chiampid bëdambuen tantiaquimbien mibitedishun ubitsen tantiatsiac. Aidën Chiampidi mabi neyoc. 47Aden Moisesën chiampid tantienquio icquin ¿Mitsipaden Umbi Chiaid mimbi bëdambuen tantiapatsia? quequin Esusën chuipondash.#5.47 Moisesën chiampid tantiaquidquio nebi, quequido chuiquin Esusën adopanëdash.
Currently Selected:
Uan 5: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.