Uan 19
19
Esus iuen cacuesaid
(Mat. 27.27-31; Madc. 15.16-20)
1Badabas chicquin puduenmeta, quesho tantiatanquimbien Pidaton: Esus cueshcanten cacuesmenun buantan, cac buanshun sondadon cueshcanten cacuespanëdash. 2Aden cacuestanquin pinchuc pinchucpambo icnuc mauete nacnenaid Esus mauemepanëdash. Adotanquimbic chuiquid tapabimbuec isadnuc dashcute dapa piu piumbocquid dasiuimpanëdash. 3Aden dasiuintanquin sondadon mamënshunquin: Mibi isash bëdambo iquebi, isadaidbon chuiquid tapa, quequin chuitanquin mëdanten Esus tancuesbannepanëdash.
Esus uënës uame, quiaid
(Mat. 27.15-26; Madc. 15.6-15; Duc. 23.13-25)
4Aden abi yacno bëuacsho istanequien Pidato padpidec puduenuash Esus bëquido chiec: Mimbi bëbued Esus icsambocquidpenquio nec. Icsamboquid icsho cuessunneta, catsiambi, quepanëdash Pidato. 5Adnubien Esus pinchuc pinchucpambo icquid mauemetanquin dashcute piumbocquid dasiuinacchobi puduempanëdash. Adsho issumbien Pidaton: Is. Mimbi bëbued në choeque, capanëdash. 6Adoac chosho istanquimbien cumapenec cuëdquin: Cueste napotiaidën dectanquin uënës uame. Cueste napotiaidën dectanquin uënës uame, cabededpanëdash nëish iua cuessunneshun pichicaquidon chuiquidobëtan Nuquin Papa tabadte shubu dapa isquido sondadon. Adoaquien Pidaton: Mimbibi cueste napotiaidën dectanquin uënës uatan. Icsambuen naquidpenquio icsho Esus uënës uametiapimbo iquebique, capanëdash.
7Adoaquien isadaidbon chuiquidon Esus bëquidon: Cun matsesën: Nuquin Papa mua uaquid cuessunnequid yendac, cacpadombuen natiadquio iquebi. Nuquin Papan Madombo nebi, quec Esus abibi mua uadoshe. Uënës uaquimbien ictiad, quecuededpanëdash. 8Nuquin Papan Madombo nebi, quiosh, quequin chuisho tantiashien Pidato dacuëdbuedi dacuëdquiec yampanëdash. 9Adash aton shubu dapan Esusbëdi padpidec pudueduashun Pidaton Esus chuiquin: ¿Mitsimbocquidquio ne? caqui Esusën ëcbedenquio icpanëdash.#19.9 Esus onquenquio icte Isayasën chuipampic. Aid iste bunquin Isa. 53.7 ista.
10Adsho issumbien Pidaton: ¿Chuitiapimboda ique? ¿Tantienquioda ique? Umbi: Cuenme, cac mibi cuenmetsiash. Umbi: Cueste napotiaidën dectanquin uënës ua, cac mibi adotsiash, capanëdash Pidaton. 11Adoaquien Esusën: ¿Mibenquiobida chuiquid yandio? Nuquin Papambien chuiquid mibi icmiac. Nuquin Papan chuiquid icmiabi adquid mibi ictiapimbo ictsiac. Ubi cueste napotiaidën dectanquin uënës uamenu, quec mibi icsambo icnubi ubi bëbuedotsen chuiquido icsamboshë icquido neuaindac, quepanëdash.
12Adsho tantiashien Pidato: Esus uënës uametiapimbo icchitebi. Nidmetiadquio iquebi, quetanquin padpiden Esus bëquido naden chuiuapanëdash: Esus nidmenu, caquien cun matses isadaidbo cumapenec cuëdcuededec: Icsambo iquec. Min matses abitedishun chuiquid tapambo Sesad caid: Ubentsëqui chuiquid tapambo nebi, quiac caosh. Aid dëniaquec Esus chuiquid tapa icte bunquiec. Esus nidmequin min chuiquid tapambo mimbi nëishmeque. Esus cueste napotiaidën dectanquin uënës uame, quecuededpanëdash.
13Adsho tantiashun Esus puduenmeuatanec cuënote nacnenaid abuc tsadunaidën cuidte chuinuec tsadten Pidato tsadtopanëdash. Aid cuënote nacnenaid cuënquin cun onqueten Cabata capondash. 14Cun tsusedpabon: Ma cun mado uënësmenquio icnu, queshun obeca caniactsëc cuessuniampid tantiate uëshë badiadash icnuc nepondash. Uëshë cuembocnoc aton tsadten tsadtoshon Pidaton: Në min chuiquid tapa iquec, capanëdash cun matses isadaidbon chuiquido iccuededquido chuiquin.#19.14 Uëshë cuembocnoc: Esus uënës ua, cacpadëmbidi Nuquin Papa ismequin nëish iua cuessunneshun pichicaquidon isnubi obeca bacuë icbon aton iua uënës uapadennec. Inchëshbudtsëcnubi aton matsesën obeca caniactsëc cuessunniampid tantiate uëshë icnubi aton shubun icquidën ambi cuessunnebued pebededpanëdash. (Uan 18.28 ista.) 15Adoaquien aidon: Cueste napotiaidën dectanquin uënës uame. Nëbimbobi buanshun cueste napotiaidën dectanquin uënës uame, quec cuëdcuededpanëdash. Adoaquien Pidaton: ¿Min chuiquid tapadambi cueste napotiaidën dectanquin uënës uamepe? caquien Nuquin Papa ismequin nëish iua cuessunneshun pichicaquidon chuiquidon: Min chuiquid Sesad caiduidtsëqui cun chuiquid tapa caimbi, cabededpanëdash. 16Adoaquien aidon chiacpaden: Esus buanshun cueste napotiaidën dectanquin uënës uatan, Pidaton cac sondadon buampanëdash.
Esus cueste napotiaidën dectanaid
(Mat. 27.32-56; Madc. 15.21-41; Duc. 23.26-49)
17Aden: Uënës uatan, cac buanquin: Nëidën dectannu, queshun sondadon abi dectante cueste napotiaid Esus chiadtomepondash. Aden chiadtomianec nidequi macuësh mapi canite cuënaid yacno nidpondash. Aid macuësh mapi canite cuënquin cun onquete ebedeon Codcota capondash. 18Ambo buanshun cueste napotiaidën Esus dectampondash. Aidbëd utsi dada daëd ëquë diadbudcuenec cuesten diadnuc Esus nënantanquio diadpondash.
19-20Adnubien Pidaton: Nasaded yacnouësh caniquid yec Esus isadaidbon chuiquid tapa nec, quequin cueste pada uaidën dada uapanëdash. Aton matses Doma yacnocquidon onqueten dada uaquinc ebedeon onqueten dada uaquinc quidiecon onqueten dada uaquinc catanquin Esus dectanaid cuesten Esusën mapi abuctsëc dectanmepanëdash. Aid dectanaid shubu dadpen icquid Edusaden anoentsëqui icsho cun matses dadpen aid dada uaid isec onquepondash. 21Adtanec Nuquin Papa ismequin nëish iua cuessunneshun pichicaquidon chuiquido Pidato chiec nidpanëdash: Icsambuen chuiquin ma mimbi dada uapacboc. ¿Cun matsesën chuiquid tapada Esus nedic? Aidpenquio nec. Utsi uain dada uata. Isadaidbon chuiquid tapa nebi, quequid Esus nec, quequin cueste pada uaid utsin dada uata, capanëdash. 22Adoaquien Pidaton: Padi. Umbi dada uabued utsi uain dada uatiapimbo iquebi, capanëdash.
23Adnubien Esus dectanquido sondado 4ted icpanëdash. Aidon Esusën dashcute bedshun 4ted icnuc cuëshcuëshshun abentse abentsen bedbededpanëdash dashcute dapa abentsëc abi icnuc. Aidi abucshun bedanquin abichobi daëdcaid tuscabi icquid nepondash. 24Adquid icsho issun: Canchenquio icquin ¿tsundanquio bedeque? Isnuna, queshun abi cuëmëdquidtedi dada uabanshun tëchun sandoshon cadotannequin dada uaidëmpi abia puduenmiaid issun aid dashcute bedpanëdash. Aidon nate Nuquin Papan tantiamiac cun tsusedpan naden chuiquin dada uapampic: Abentse abentsen cun dashcute bedosh. Cun dashcute utsi bednu, quequin dada uaidëmpi abia puduenmiaid isquin bedosh, quependac, quequin chuipampic.#19.24 Chotaquën onqueten Cuëd. 22.18 isbanta. Aid tantiaquin aden dada uapanëdash.
25Adnubien Esus dectanaid cueste napotiaid tayun nëidted icpondash. Nëidic Esusën tita. Nëidic Esusën tita utsi. Nëidic Madia Quedeopasën chido. Nëidic Madia Macdadena. Aidted chidobo icpondash.#19.25 Macdada yacnouësh choquid nec, quequin Madia Macdadena capanëdash. 26Ambobi chidobo tabadnuc aidën dayun nidpondabi. Adec ambi tantiaidquio ubi icsho issun Esusën aton tita naden chuipondash: Min dayun nidquid cun mado cata, tita. Ma mibi bëdambuen dayun uanu, capondash. 27Adshumbic ubitsen chuiquin: Cun ta tita, cata. Adshun: Bëdambuen cun ta ubi dayun uashunta, cac cun shubuno buampondambi.
Esus Uënësaid
(Mat. 27.45-56; Madc. 15.33-41; Duc. 23.44-49)
28Aden chuitanec uënësnushi Esus: Cun Pan chiacpadombuen nainombi. Matses tantiec ubided cuidadec uënësebi, quequin tantiec cun tsusedpan dada uaquin chiampicpadec: Acte bundobi, quepondash Esus.#19.28 Chotaquën onqueten dada uaid Cuëd. 22.15bëta Cuëd. 69.21 tantiaquin aden dada uapanëdash. 29Adsho tantiashun ambobi tëchun uba chinaid paë uaid icbuedi mucambo yambued cushtoaid nidquid shapu shapupactsëcquidën punshun cueste dëdectanshun sananquin Esus chishmenuen ëccuëscadonepondash. 30Adoac uba chinaid paë uaid mucambo icquid chishquin actanequien: Cun Pan chiacpadombuen nainquiombi, quetanequi tëdquëdbudec Esus uënëspondash.
Esus uinte masiaid
31Adnubien Esus bëquido isadaidbon: Badiadash nuquin tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë iquec. Aidi chonoadtemaid uëshë nec. Aidën cueste napotiaidën dectanquin uënës uaid chococabi icac icsambo ictsiashe. Nëbimbobi chococamenu, queshun Pidato chuiquin: Baded abitedi nidte podquëmbanquin uënës uame. Inchësheque, capanëdash. 32Aden Pidaton chiac nidshun sondadon Esusbëta dectanaid ëquë diadquidba nidte podquënshumbic utsiuc diadquidtsen podquëmpondash. 33Adotanquin isaquien Esus ënden uënësac. Adacsho nidte podquënenquio icpondash.
34Adotanquimbic: Uënësabi icnushe, queshun: Esus uënësmequiobono, quetanquin sondadon cudan podo ansequin Esus uinte masepondash. Adoac intacbëd acte nuambo chididiquepondash. 35Adsho umbimbo isondambi, caimbi. Umbi dada uaid issun ma adembidi mibitedishun Esus tantianu, queshun abimbo chuiquin nëid dada uaic nebi. 36Nuquin Papan tantiamiac cun tsusedpan: Canite podquënenquio iquendac, quequin chuiquin dada uampicpadombuen Esus canite podquënenquio icpondash.#19.36 Buan. 12.46 tantiaquin nëid dada uapanëdash. Adembidi chotaquën onqueten I.T. 9.12 isbanta. 37Adembidi: Ambi podo ansebued isec tabadendac, quequin Nuquin Papan Chiaid dada uapampic.#19.37 Sac. 12.10 tantiaquin nëid dada uapanëdash.
Esus uënësacsho chococaid
(Mat. 27.57-61; Madc. 15.42-47; Duc. 23.50-56)
38Adnubien shubu dadpen icquid Adimatea yacnocquid Ose chopondash. Aidi Esus tantiaquid nepondash. Abipadquid isadaidbon chuiquid utsibo dacuëdënquin: Esus tantiaquid nebi, quequin utsibo chienquio icbuedëmbi Pidato chuituidpanëdash: Esus chococanun buanendambi, quesho Pidaton: Ai, cac Osen Esusën dada buampanëdash. 39Adnubien inchëshën Esusbëd onquiondaid Nicodemo Ose yacno chopanëdash. Adec choquin danoshquete bëdambo nuadquid mida caid adoe caidbëta cabiunaid uënësaid dabiunte 30 quido icnuc bëpanëdash. 40Adoshon Osebëtan Nicodemon Esusën dada bëdambo nuadquidën uesquin nua icnuc dabiuntanquin aid dashcute cuëshën datanepanëdash. Aden cun matses isadaidbon uënësaid chococanun naquid. 41-42Adoshon: Badiadash chonoadtemaid uëshë iquec. Aid uëshën uënësaid chococac icsambo ictsiashe. Badedquio chococanuna, queshun Esus cueste napotiaidën dectanaid anoentsëqui tied icquid yacno Esusën dada buampanëdash. Buanshumbic cuënote dapa shëcuë uaid chucan matses chococabi icquidën Esusën dada nauedpanëdash. Aden nauedtanquin cuënote dapan bëtimpanëdash.
Currently Selected:
Uan 19: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.