Uan 18
18
2. Esus bedshun mëyanquin uënës uaid
(18.1—19.42)
Esus bedmiaid
(Mat. 26.47-56; Madc. 14.43-50; Duc. 22.47-53)
1Aden Nuquin Papa chianec Esus nidpondash. Abëd icquidobëd nidquin actempi Sededon caid potiash cute odibos nitsinaid tied yacno chopondash. 2Ambo tabadnubien Esus bedmenuen Udasën: Ubi abëd tabadtennebocno tied yacnoen nidchitash, quequin tantiapanëdash. 3Aden tantianec choquin Udasën matses dadpen bëpondash nëidtedi. Nëidic Doma yacnocquidon namiaido sondado. Nëidic Nuquin Papa tabadte shubu dapa isquido sondado. Aido Nuquin Papa ismequin nëish iua cuessunneshun pichicaquidon chuiquidobëtan padiseobon chomiaidobëd Udas chopondash. Aidotedi tabotebëta tabote utsi bëchi ancushshun taboaid sanannubi siante sanambededtsëcquiec chochopondash.
4Adec chochosho isash bëquedbanec nidquin: Nëbi uënës uamenuen ubi bedmec, quequin ambibi tantiashun Esusën: ¿Tsutsi nibënec ne? caquien: 5Nasaded yacnouësh caniquid Esus nibënec nebi, quepondash sondadon chuiquid. Adoaquien Esusën: Aidi nebi, capondash. Adosho isaquien aidobëd Esus bedmequid Udas icpondash.
6Adec Esus: Aidi nebi, quesho tantianec aucbidi nidnuequi nidaidën uebudcuededpondash: Bednu, quequidotedi. 7Adshobien padpiden Esusën: ¿Tsutsi nibënec ne? cauaquien: Nasaded yacnouësh caniquid Esus nibënec nebi, queuapondash. 8Adshobien Esusën padpiden chuiuaquin: Aidi nebi, quequin mambi mibi chuipaboc. Ubiuidtsëqui bedquin ubëd icquido nidme, capondash. 9Mimbi ubëd icmiaido bedmenquio iquembi Papa, quequin ambi chuibued tantiec: Nëido bedenda, quepondash Esus.
10Adnubien Simon Petedon abi tsiusudaid chështe chictanquin Nuquin Papa ismequin nëish iua cuessunneshun pichicaquidon chuiquid tapan iua abiucquio pateshunnepondash. Aid iua Madco cuëmëdquid nepondash. 11Aden pateshunnesho istanquimbien Esusën: Padi, Petedo. Min chështe aucbidi tsiusud. Cun Pan chiacpadec ¿natiamboshë icmiac uënësenquiodabi ique? quepondash Esus.
Anasën shubunoba Esus buanaid
(Mat. 26.57-58; Madc. 14.53-54; Duc. 22.54)
12Adshobien Doma yacnocquid sondadon aton chuiquidbëtan Nuquin Papa tabadte shubu dapa isquid sondadon Esus bedpondash. Aden bedshun: Cuidmenuen chuiquid tapa yacno mibi buannu, quetanquin podo catanepondash. 13Aden bedshun Nuquin Papa ismequin nëish iua cuessunneshun pichicaquidon chuiquid tapambo Caipasën cucu Anasën shubunoba buampondash. 14Aid setambi aton matsesën chuiquid tapambo Caipas icpondash. Aidi Esus chieshënec: Nuquin matsestedi cuessunnemenquio icnuen Esusded cuessunnemenuna, quequin iccuededsho chuiquido chuibued Caipas nepanëdash.
Petedo Umbi isacmaid Esus nec, quiaid
(Mat. 26.69-70; Madc. 14.66-68; Duc. 22.55-57)
15Esus buansho issun Simon Petedobëtan tsibampondambi. Aden tsibananec nidec Anasën shubuno nidash daquënë uaquin tsicatiaidën puduednu, quesho chuiquid tapan isaid ubi icsho iuan ubi puduedmepondash. 16Aden ubi puduedmequimbi Petedo ambi isacmaid icsho puduedmenquio icpondash. Adsho istanquin shëcuë isquid chido chuiquin: Ubëd icquid neque. Shëcneshun. Ma puduednu, capondambi. 17Adoac puduedmeshun shëcuë isquid chidon: ¿Nëmbo bëbued dadabëd icquidta ne? capondash. Adoaquien Petedon: Padenquio. Aidbëd icquidpenquio nebi, capondash. 18Ambo iquenuanquiecsho issun shubu tsicatiacnoshon cute tsiadoshon nëdëncadoash sondadobëd ambocquido iuabo cute cuëec tabadpondash. Adsho isashien Petedotsen aidobëd cute cuëec icpondash.
Anasën Esus chuimiaid
(Mat. 26.59-66; Madc. 14.55-64; Duc. 22.66-71)
19Adec ubi puduednubien Nuquin Papa ismequin nëish iua cuessunneshun pichicaquidon chuiquid tapa Anas caidën Esus naden chuipondash: Mibëd icquido ¿tedtsi icpec? Aido ¿Mitsipaden chuibano? capondash. 20Adoaquien Esusën: ¿Ompodshondambi chuibandio? Nuquin Papa tabadte shubu dapa tsicatequin daquënë uaidën puduedshun nuquin matses isadaidbo iccuededacnoshon mambi chuibandedneboc. Nuquin Papan Chiaid chuibante shubun shubunquiec puduedcuennequin mambi ompodenquio icquin chuibenneboc. 21Ubiuidtsëqui chuimenda. Umbi chuibansho tantiabuedotsen chuime. Adoac ambi tantiabuedtedi mibi chuitsiashe. Aido chuimeta, capondash Esusën.
22Adsho tantiashun: ¿Chuiquid tapada aden chuipaic? quetanquin Nuquin Papa tabadte shubu dapa yacnoshon isquid sondadon mëdanten Esus tancuespondash. 23Adoaquien Esusën: ¿Icsambuendambi chio? ¿Atotsimbi icsambuen chioque? En chui. Mambi abimbo chuiboc. ¿Atotsi queshun ubi cuesquin nai? capondash. 24Adsho tantiashun Anasën abi podo cataniacchobi Esus nëish iua cuessunneshun pichicaquidon chuiquid tapa Caipas caidën shubuno buanmepondash.
Umbi isacmaid Esus nec, quequin Petedon padpiden chuiuaid
(Mat. 26.71-75; Madc. 14.69-72; Duc. 22.58-62)
25Adnubien Petedo abi cute cuëec nidsho abëtan cute cuëec tabadquidon: ¿Nëmbo bëbued dadabëd icquidien mibi niacbipec? capanëdash. Adoaquien Petedon muaquimbi: Mabi aidbëd icquidpenquio neyoc, capanëdash.
26Adshobien Nuquin Papa ismequin nëish iua cuessunneshun pichicaquidon chuiquid tapan iua utsin Petedon pateshunnebuedën matsesën: Odibo nitsinaid tied yacnoshon Esus bednuc mibi isacbiombi, caquien 27padpidec: Padenquio. Mabi ambo icambo icboc. Ma umbi isacmaidquio neyoc, quenubien Esusën chuibuedquio cachina cuëdampanëdash.
Pidato yacno Esus buanaid
(Mat. 27.1-2, 11-14; Madc. 15.1-5; Duc. 23.1-5)
28Adnubien badiadnuc Caipasën aton chuiquid utsibobëtan aton matses iuaquido Doma yacnocquidon chuiquid cobednadodën shubu yacno Esus buampondash. Buanashic: Matses utsin shubun puduedshun mishtemaid mishash tsusedpabon aton mado uënës uamenquio icquin obeca caniactsëc cuessunniampid tantiate uëshë tantiec cun matsesbëtan pebededtiapimbo icmane, quiash aidën shubun puduedenquio icpondash.#18.28 Pidato chiaid iste bunquin Mat. 27.28 istuidshun aid chiaid bëca taëmicquid isbanta. 29Adec puduedenquio icsho issun cobednadod Pidato cuëmëdquidën aton shubunuësh puduentanquin Esus bëquido naden chuipanëdash: ¿Atotsi icsambuen nasho nëid dada bëo? capanëdash. 30Adoaquien bëquidon: Bëdambocquid icsho mibi ismenuen aden bëenquio ictsenombi, quepanëdash cun matsesën chuiquido. 31Adoaquien Pidaton: Mimbibi cuidta. Min matsesën: Icsambuen naquid naden cuidquid yendac, quequin chiacpadombuen cuidta, caquien: Padi. Mabi isadaidbo yec cuessunnemetiapimbo yoc. Min matses: Cun matsesënuidtsëqui cuessunnequin cuidquid nec, quesho tantiashun natiapimbo iquebi, quepanëdash Esus bëquido Pidato chiec. 32Ënden aton matses chuiquidon bedabi icquin Esusën: Ubi cueste napotiaidën dectanquin uënës uamendac, quequin abi uënës uamete chuipanëdash.
33Adshumbic aton shubu dapan pudueduatanquin Pidaton Esus: Cho. Chuinu, catanquin: ¿Min matses isadaidbon chuiquid tapada ne? caquien 34Esusën: Mimbimbo tantiaid ¿chiecta ne? ¿Utsibon chiaid tantiashunda ubi aden chuiquin nai? capanëdash. 35Adoaquien Pidaton: ¿Isadaidbodabi nedi? Padenquio. Min matsesën chuiquid tapabobëtan nëish iua cuessunneshun pichicaquidon chuiquidon mibi nëmbo bëosh. ¿Atotsi icsambuen nasho issun nëmbo mibi bëosh? caquien 36Esusën abi bëyuc Pidaton chuibued tantiaquin: Nidaidënuësh chuiquid tapapenquio nebi. Nidaidën cun iua sondado nibëdec. Nidaidënuësh chuiquid tapa icquin cun iuabo cun matses isadaidbon ubi bedquido bedmenquio ictsemposh, quepanëdash Esus.
37Adsho tantiashun Pidaton: Chuiquid tapa nebi ¿quecta ique? caquien: Ai, ma mimbibi chuipayoc. Chuiquid tapa icnuec matsesën tishaid nebi. Adquid icquin matses uaquid tantiamenuen abimbo chuibanombi. Adoac abimbo chuisho tantiate bunquidon ubi tantiendac, quepanëdash Esus.
38Adsho tantiash Pidato: ¿Tsuntsin abimbo tantiaquin chuipatsiash? quetanec puduenshun Esus bëquido isadaidbo naden chuiuapanëdash: Mambi Esusën icsambuen naid istuidambo icpaboc, quepanëdash.
Esus cuidquin cueste napotiaidën dectanquin uënës ua, quiaid
(Mat. 27.15-31; Madc. 15.6-20; Duc. 23.13-25)
39Min tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshën setan setanquien min matses quënën tsadunaid abentsëc chictenniondambi. Aid uëshëbi nëid uëshë nec. Adembidi abentsëc chiquembi. ¿Mitsicquidimbi chicpe? Nëid: Isadaidbon chuiquid tapa nebi, quebued ¿Esustambi nidmepe? caquien 40Padpidembuec cumapenec cuëdcuededec: Padenquio. Esus chiquenquiocquin Badabas cuëmëdquid chicquin puduenmeta, quecuededpanëdash. Matses cuessunnequin ampequid yec Badabas icsambocquid icsho quënën tsadunaid icnuc adcuededpanëdash.
Currently Selected:
Uan 18: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.