Hechos 10

IV.ESUS TANTIESABO ESUS CHUIBANAID

(10.1—28.31)

1. Tauaquin dadpenshun Esus tantiabenaid

(10.1—12.25)

Codnedion Petedo chomiaid

1Adnubien shubu dadpen icquid Sesadea caid yacno Codnedio cuëmëdquid isadaidpembo nidaid Itadia caid yacnouësh choash ambo tabadpanëdash. Aidi Doma yacnocquid sondado dadpen 400tedshun chuiquid sentudion caid nepanëdash. 2Aidi aton shubun icquidobëd Nuquin Papa tantiaquid icquin isadaidbo atona nibëdquid icsho issun meniannequid nepanëdash. Adecbidi Nuquin Papa chiec onquiannequidquio nepanëdash. 3Adquid yec uëshë utsin uëshë budtsambi 3 yannuc ushquin isacbimbuen Nuquin Papabëd icquidquio abi yacno puduedsho Codnedion ispanëdash. Adec choshon: Codnedio, capanëdash.

4Adsho tantiash cumapenec dacuëdquin Nuquin Papabëd icquid bëisec: ¿Atotsi ubi chuinuec ne, Icbo? capanëdash Codnedion.

Adoaquien: Abi chiec mibi onquedednesho Nuquin Papan tantiosh. Adembidi atona nibëdquido tantiaquin menedednequid icsho Nuquin Papan bëdambuen isaid mibi neque. Tantia. Chuinu. 5Nëbi Simon cashumbic Petedo cuënaid: Ma bedtannu, quequin mimbi namiaid shubu dadpen icquid Ope yacno nidmeta. 6Aidi Simon cuëmëdquid utsi nëish iua bitsi uashun chodcashun nacnenquidën shubun tabadec. Aidën shubu acte dapa mad caid cuëman iquec, quepanëdash Nuquin Papabëd icquid Codnedio chiec.

7Aden chianec Nuquin Papabëd icquid nidambic Codnedion aton iua daëdbëta ambi tantiaidquio Nuquin Papa tantiaquidbidi icsho sondado utsi abentsëc chomeshun 8Nuquin Papabëd icquidën chuibuedtedi chuitanquin: Ma Petedo bedtannu, queshun aido Ope yacno Codnedion nidmepanëdash.

Petedon ushquin isacbimbuen isaid

9Aid badiadash uëshë cuembocnoc Ope anoentsëqui Codnedion chomiaido chonobi Petedo Nuquin Papa chiec onquenuec shubu macano padapadapambocquid yacno dectatopanëdash. 10Adec dectatoash shubu icbon iuabon codocanubi Petedo bundoash petiadquio yec tsadquin ushquin isacbimbuen isquin 11abu shëcuë yannubi abi tsadacno dabidiete dapabimbuecquid bucun dënëshbudcuenaid budsho Petedon ispanëdash. 12Aidëmbi ambi petemaiduidquio nëish utsi utsiec icnubi tacbidën capuquidbëd podon shucquequid utsi utsiec antabëdpanëdash. 13Adnubien: Aid bedshun cuessunneshun pe, Petedo, quec abucuësh onquesho tantiapanëdash. 14Adoaquien: Padi, Icbo. Umbi petemaid yec pichicaquin mibi ismetemaidquiobi nec. Adquid piambo iquembi, Icbo, quepanëdash Petedo.#10.14 Ëndenquimbo Esus choabicnuc Nuquin Papan ambi petequidbëta ambi petemaid isadaidbo chuibampampic. Aid iste bunquin D.N.Ch. 11 isbanta.

15Adoaquien padpidec abucuësh onquec: Nuquin Papan bëdambo icmiaidi icsambocquid nec, cainda, quepanëdash. 16Adotanquimbic antabëdquid abuc indouashun adenuidi 3teden budmequin Petedo chuishun abu shëcuë uaid yacno badedquio buanquin puduedmeuapanëdash.#10.16 Nuquin Papan: Nëbi isadaidbopentsen bëdambuen istsiambi, quequin aden Petedo ismequin tantiamepanëdash.

17Aden isash Petedo ambi isbued tantiec: ¿Atotsi ubi tantiametembi ispoba? quec tsadnubi Codnedion chomiaido Simonën shubu yacno choash shëcuë cuëman tabadtuidpanëdash. 18Adec tabadtuidshun: ¿Nëmboda Simon cashumbic Petedo cuënaid iquec? quequin chuipanëdash.

19Aden chuinubi ambi isbued tantiec Petedo tsadsho Nuquin Papan Mayan Bëdan: Dada 3ted choshon mibi nibënec. 20Aido umbi chomiaido neque. Budash cacuidenquio yec aidobëd nidtan, capanëdash.

21Aden chiac budshun Codnedion chomiaido isash: Mimbi nibënaid nebi. ¿Atotsi quec cho? capanëdash Petedon.

22Adoaquien: Codnedio cuëmëdquidën chomiaid nebi. Aidi sondado dadpenshun chuiquid yec bëdambocquidquio nec. Adquid icquin Nuquin Papan chiacpaden nabansho issun isadaidbon bëdambuen isaidquio nec. Aidi Nuquin Papabëd icquidën naden chuipaccosh: Simon Petedo bedtan, cata. Bedtanac choshon chuibansho tantiata, quequin Nuquin Papabëd icquidën chuiposhi, quequin Codnedion ubitedi chuiuaposhi, quepanëdash Codnedion chomiaido Petedo chiec.

23Adoaquien: Puduedash nëmbo ushec cho, quepanëdash Petedo.

Adashic badiadanec Codnedion chomiaidobëd Petedo nidsho issun Esus tantiaquid Ope yacnocquidon utsin utsinquien tsibanampanëdash. 24Adec nidec ushcuidanec Sesadea yacno chopanëdash. Adnubien: Nëid uëshëmbien chochitec, quequin tantiashun Codnedion aton shubun icquidobëtan ambi tantiaidouidquio chochomeshun Petedon chuibansho tantianuen aton shubu nuntan iccuededquin caimpanëdash. 25Aden cainec tabadnubi utsibobëd choec Petedo puduedsho isash: Mibi bëdambocquid icnubi adesa nebi, quequin Petedo ismec dannëshën sebudec nidaidën bëccuësquepanëdash Codnedio.

26Adec dannëshën sebudec shuebudsho istanquin Petedon: Mibi padquid matses nebique. Nidto, Codnedio, capanëdash.

27Adtanec Codnediobëd onquetanec shubun puduedshun isadaidpembo dadpen tabadsho Petedon istuidpanëdash. 28Aden aido isec: Umbi naden tantiaid mibitedishun tantiec: Isadaidbo nebi. Adquid yec isadaidpembobëd capuesa nebi. Adecbidi min shubun puduedesa nebi. Puduedesa icbuedi Nuquin Papan: Umbi bëdambuen isaidi: Icsambo iquec, cainda, quequin ismequin tantiameboc ubi tantiec tsadnubi 29mimbi: Bedtan, caido nidshun chiac: Mibëd capuesa nebi, quenquio yec chobi. Adecbidi nëmbo choash isadaidpembon shubu nec. Nëmbo puduedtiapimbo iquebi, quenquio yec puduedobi. Nëbi: Tantianu. Chui. ¿Atotsi canuen ubi chomio? quepanëdash Petedo Codnedio chiec.

30Adoaquien Codnedio: Ënden 3tedec ushash cun matses mibi yacno nidmiabi yec cun shubu nuntan Nuquin Papa chiec onquec tsadobi. Adnubien uëshë budec 3 yannuc dada dashcute bëchamauanquiecquid dasiuidquid ubi yacno choec isadcuenash onquec: 31Codnedio, abi chiec onquiannesho Nuquin Papan mibi tantiashunosh. Adembidi atona nibëdquido mimbi meniannesho aidëmbi bëshunenquio icquin tantiec. 32Simon cashumbic Petedo cuënaid Ope yacnocquidbëd tabadquid ma bedtannu, queshun mimbi namiaido nidmeta. Aidi Simon cuëmëdquid utsi nëish iua bitsi uashun chodcashun nacnenquidën shubun tabadec. Aidën shubu acte dapa mad cuëman iquec, quequin Nuquin Papabëd icquidën chuiposhi. 33Aden chiac: Petedo bedtan, quequin umbi namiaido nidmiombi. Adoac bëdambocquid yec cacuidanenquio yec badedquio mibi choac. Adec mibi choacsho isash bëdambo iquebi. Nuquin Papan isnubi nëbi ambi tantiamiacpaden mimbi chuibansho tantiec ubitedi tabadnu, quepanëdash Codnedio Petedo chiec.

Codnedion shubu nuntanshun Petedon chuibanaid

34Aden Codnedion: Chuiban, cac Petedon naden chuibampanëdash: Matses utsi nec, quenquio icquin Nuquin Papan iuedtequid matses utsi utsiec iquec, quequin nëbi abimbo tantiembi. 35Nuquin Papan Chiaid tantiashun nidaid utsin utsinquiec tabadquidon chieshenquio icquin bëdambuen nabansho issun: Aidtedi Nuquin Papan bëdambuen isendac, quequin tantiembi. 36Isadaidbon tsiuecquidoba tantiamenuen Nuquin Papan Esus chomepanëdash. Esuquidistunuidtsëqui Abitedishun Icbombo icquin Nuquin Papa matses bëdambuen ismec, quequin tantiembi. 37Nidaid cuëshë Cadidea yacnoshon Uan acten mentoquidën mentoac Esusën nabanquin tauapanëdash. Nidaid cuëshë Udea yacnoshon adembidi aidën nabanaid chuisho mibitedishun tantiapanëdac. 38Ma abëd tabadnu, queshun Nuquin Papan aton Mayan Bëda meniac nadatiambocquin Esusën nabampondash. Shubu daëdpactsëcquid Nasaded yacnouësh caniquid yec capuquin bëdambuen nabanquin Mayan Icsa Satanasën mëyanaido icsho Esusën bëdanmebampondash. Aden Nuquin Papabëd icquin aidën nabanaid chuisho mimbi tantiapanëdac. 39Cun matses isadaidbon nidaid Udea yacnobëta shubu dadpen icquid Edusaden yacnoshon Esusën nabansho ispondambi. Aidi cueste napotiaidën dectanquin isadaidbon uënës uamesho ispondambi. 40Aden uënës uaqui daëdec ushash uincuenshun: Uincuenobi, quequin Esusën ismepondashi. 41Aidëmbi uincuenshun matses abitedi ismenquio icquin Nuquin Papan: Nëidon umbi naid chuibennendac, caido icquin aidbëtan peshun accondambi. 42Abëd icshobi: Ubi chuibanquin naden chuiban: Matses cuidte chuibanquid Nuquin Papan icmioshi. Uënësaidobëta uënësabicquido abitedi aden chiendambi. Bëdambocquid ubëd tabadmequimbi icsambuen naquido cuidmendambi, quequin Umbi Chiaid chuibanta, Esusën caondaid nebi. 43Adembidi Nuquin Papan oncamiaidon Esus tantiaquin: Nuquin Papan Chomiaid Quidistu Mesias iquendac, quequin chuiquin dada uapampic. Aden chiampid icnuc aid tantiashouidtsëqui ambi icsambuen naid tantienquio yec Nuquin Papa bëshunendac, quequin chiampid iquec, quepanëdash Petedo Codnedion shubun iccuededquido tantiamequin chiec.#10.43 Isa. 53.5-6 tantiaquin aden chuipanëdash. Oed 2.32 tantiaquin aden chuipanëdash.

Isadaidpembo Nuquin Papan aton Mayan meniaid

44Aden Petedon chuibansho tantiaquidotedi icsho issun Nuquin Papan: Ma aidobëd tabadnu, queshun aton Mayan Bëda menepanëdash. 45-46Aden meniacsho issun isadaidpembo abi onquiacmaidënquio matses utsin onqueten onquequi Nuquin Papa tantiec cuëdëmpanëdash. Adsho tantiash Petedobëd chochobuedo isadaidbo tantiadempambo yec aton tsusedpabon nacpaden shui dëbid dëtemequido: ¡Padtec! Dacuëdampambo icchitec. Isadaidpembotsen Nuquin Papan aton Mayan Bëda meniac, quepanëdash isadaidbo Petedobëd chochobuedo.

47Aden menesho issun Petedon: Nuquin Papan aton Mayan Bëda meniaido yec Esus tantiaquido neque. Acten mentono, cashoda ¿utsibon: Padi, capatsiash? 48Aden chuitanquin: Esuquidistu tantiaquid nebi, queshun acten mentometa, capanëdash Petedon.

Adoac acten mentomeshun: Nuquibi tabadnuna, cac Petedobëd chochobuedo acten mentoaidobëd daëdpactsëc ushec tabadpanëdash.

Currently Selected:

Hechos 10: mcfNT

Highlight

Copy

Compare