Uan 1 5
5
Esus tantiaquid icsamenu, cac icsate bunesa chiaid
1Nuquin Papan nidaidën chomiaid Mesias caid Esuquidistu nec, quequin tantiaquid Nuquin Papan: Cun bacuëbo nec, caido nendac. Matses caic: Amë tantiaquin aton bacuëbotsen tantiaquid nec. 2Adembidi Nuquin Papa tantiaquin Aidën chiacpadombuen naquid icquin Ambi: Cun bacuëbo nec, caidotsen nuqui tantiendac, quequin abimbo nuqui tantiec. 3Adembidi Nuquin Papa tantiaquidën ambi: Naden nata, quequin chiampid tantiaquin nabanendac. Aden Ambi: Naden nata, quequin Chiampid natiapimbo ictequid nec, quenquio nuqui iquec.#5.3 Nëid bimbuen chiaid iste bunquin M.I.Ch. 30.11 ista. 4Aden Nuquin Papan: Cun bacuëbo nec, caido icsho Nuquin Papa tantiesabon: Icsambuen namenu, quequidën icsambuen chiac: Padi. Adotiapimbo iquebique. Aden ubi chienda, caindac Esus tantiaquidën Esus tantiesa dëniacquin chuiquin. 5Esuquidistu Nuquin Papan Madombo nec, quequin tantiaquidënquio Esus tantiesabon: Icsambuen namenu, caqui icsambuen nainquiocquin dëniactednendac.
Esuquidistu chuibanaid
6Esuquidistu nidaidën choacsho: Nuquin Papan Madombo nec, quequin tantiamenuen Uan acten mentoanquidën acten mentopanëdash. Adembidi tantiamenuec cueste napotiaidën dectanac intac chididiquec uënëspanëdash. Adsho issun Nuquin Papan Mayanën: Aid Nuquin Papan Madombo nec, quequin chiaid abimbo nec. 7Aid abimbo tantiamete 3ted iquec. 8Abi acten mentoaidbëta aton intac chididiquiaid abimbo tantiamete nec. Adembidi Nuquin Papan Mayanën abimbo tantiamequid nec, quequin abibidi tantiamequid aidtedi nec. 9Matsesën ambi isaid chuibansho: Abimbo chiec, nuqui capec. Adombuembidi abimbo chuibanquidquio icquin Nuquin Papan: Cun Madombo nec, quequin abimbo chiaid nec, quequin nuqui tantiec. 10Nuquin Papan Madombo Esus nec, quequin tantiaquin: Nuquin Papa abimbo chuibanquid nec, quequin nuqui tantiec. Padnuen Nuquin Papa tantiesan: Cun madombo nec, quequin abimbo chiaid chiesa yec muaquidquio Nuquin Papa nec, quequin muaquin chuiquid nec. 11Nuquin Papan Chiaid nad iquec: Cun mado tantiaquido ënëdenquio yec ubëd tabadtequido iquendac, quequin chiaid iquec. 12Adec aton Mado Esus tantiaquido ënëdenquio yec aidbëd tabadtequido nendac. Esus tantiesaboen Nuquin Papabëd tabadtequidpenquio nendac.
Ënquin chiaid
13Nuquin Papan Mado Esuquidistu nec, quequin tantiaquid Icbobëd ënëdenquio yec tabadtequid nendac, quequin tantiaquidquio ma mibitedi icpanu, quequin chuiquin dada uaic nebi. 14Aden chiaid tantiaquin: Ubi nashunec, queshun: Abi bunacpaden chiannesho tantiashun Nuquin Papan ubi nashunendac, quequin nuqui tantiec. 15Aden Abi bunacpaden chiannesho tantiaquidquio Nuquin Papa nec, quequin nuqui tantiec. Adembidi Abi chiannesho tantiashun umbi chiacpadombuen ubi nashunec, quequin nuqui tantiauaic.
16Mibëtan Esus tantiaquidën icsambuen naic uënësenquio icsho issun Nuquin Papa chuita: Mibëd tabadtequid icmeuaquin bëdambuen isuata, Papa, quequin chiac Nuquin Papan bëdambuen isuaindac. Padnuen utsi icsambuen naic uënësso issun: Mibëd tabadme, quequin Nuquin Papa chienda.#5.16 Nuquin Papan Chiaid tantiaquidombo utsin utsinquien chiaid nad iquec: Nuquin Papabëta Esus cacuidanacbimbuen tantiesa icsho Nuquin Papabëd tabadtiapimbo iquendac, capanëdash. 17Icsambuen naidtedi Nuquin Papan Chiaid niaquec icsatequid nec. Icsambuen naid utsi utsiec uënëstequid icnubi utsi utsiec uënësenquio ictequid nec.
18Nuquin Papan: Cun bacuëbo nec, caido icquin icsambuen nabanesa nec, quequin nuqui tantiec. Aden abi tantiaquido icsho Nuquin Papan Madon Esusën dayun uaid icsho Mayan Icsa Satanasën icsa uatiapimbo iquendac. 19Esus tantiaquid icquin Nuquin Papan: Cun bacuëbo nec, caido nebi, quequin nuqui tantiec. Nuquin Papa tantiesabotedi Mayan Icsa Satanasën iuaquin namiaido nec, quequimbidi nuqui tantiec. 20Nadembidi nuqui tantiec. Nuquin Papan Madombo choshon chuibanec: Nuquin Papambo nadquio iquec, quequin tantiamepondash. Adash: Esuquidistu Nuquin Papan mado Nuquin Papapadquidbëd abentsëc yacbimbuec nuquitedi iquec. Aidi Aton Papapadquid icquin abi tantiaquido icsho Nuquin Papa yacno ënëdenquiocnoc tabadmendac, quequimbidi nuqui tantiec.
21Cun bacuëbobimbuecquido mibi neque. Naden icsambuen nainda. Utsibon ambibi nacnenshun papa cain tantiaid Nuquin Papapenquio tantiec tabadenda.
Currently Selected:
Uan 1 5: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.