Uan 1 4
4
Nuquin Papa tantiaquidquio nec, quequin chiaid
1Tantia, cun utsibo. Umbi tantiaido icsho mibi chuinu. Matsesën: Nuquin Papan Mayan Bëdan tantiamiaidquio nebi, quequin chuibansho: Abimbo chiec, quequin badedquio tantienda. ¿Nuquin Papan Mayanën tantiamiaidënquiobida chuipec? quequin aidën chuibansho tantiata. Nuquin Papan oncamiaid nebi, quequin chuiquido nidaid utsi utsiec yacnoshon dadpenshunquio ambembi chuibaneque. 2Nuquin Papan Mayan Bëdan tantiamiaidënquio naden chiendac: Nidaidënshun chidon tishac matsesaid Nuquin Papan Chomiaid Esuquidistu nec, quequin chuibanendac. 3Aden chuibanesa Nuquin Papan Mayanën tantiamiacmaid nendac. Adquid icquin Mayan Icsa Satanasën namiaid icquin Esus chieshënquidquio nec. Adec chieshëmënec icsamboshëcquidquio choendac, quequin chuisho mibitedishun tantiondac. Adquid chieshëmënquido nidaidën nëbi abi iquec.
4Cun bacuëbobimbuecquido yec mibitedi Nuquin Papan namiaido nec. Muaquidon chuisho tantiashun: Muaquin chiec nec, quequin mibitedishun tantiac. Nuquin Papa nadatiambocquidën aton Mayan meniac Aidën tantiamiac muaquidën chuibansho mimbi: Muaquid nec, quequin dëniacquin tantiendac. Padnuen Nuquin Papa chieshënquido namequid Mayan Icsa Satanas bëdiactsëc nabanquid nec. 5Mibi mua uaquido yec Nuquin Papa tantiesabo nec. Adquido icquin chuibansho tantiash abipadquido: Ai abimbo chiec, quequin aidon chuibanaid tantiendac. 6Nuquien Nuquin Papan namiaido nendac. Adquid icquin: Nëid Mayan Icsa Satanasën namiaid yec muaquid nec. Nëidien Nuquin Papan Mayan Bëdan tantiamiaid yec abimbo chuiquid nec, quequin nuqui tantiendac. Umbi chuibansho Nuquin Papa tantiaquidon tantiendac. Nuquin Papa tantiesambien umbi Esuquidistu chuibansho tantiate bunenquio iquendac.
IV. DAËDEN CHUISHUN PADPIDEN CHIAID
(4.7—5.21)
Esus tantiaquido tantianante chiaid
7Tantia, cun utsibo, umbi tantiaido icsho mibitedi chuinu. Nuquin Papa tantiaquido yec utsibobëd ënëdenquio yec tantiananec tabadnuna. Aden Nuquin Papan nuqui utsibobëd tantiananmendac. Adec tantiananquid icquin nuqui naden tantiec: Ambi: Cun bacuëbo nec, caido icquin Nuquin Papa tantiaquid nebi, quequin nuqui tantiendac. 8Matses tantianquidquio Nuquin Papa nec. Adquid icnuc nuqui utsibobëd tantiananesa yec Nuquin Papa tantiaquidpenquio nec. 9Aden: Matses tantiaquidquio nec, quequin nuquitedi tantiamenuen Nuquin Papan aton Mado abentsëcquiobi nidaidën chomepanëdash. Aden chomiaid tantiaquido yec Nuquin Papabëd ënëdenquio yec tabadtequido iquendac. 10Matses tantianquidquio nadquid nec. Nuquin Papa tantiaquid nebi, quequidpenquio nec. Nuquin Papambien nuqui tantiaquioquin: Matsesën icsambuen naidtedi tantienquio yec bëshunquin cuidenquio icnu, quequin aton Mado chomiac matsesën icsambuen naidtedi bedshunash abided cuidadec Esus uënëspondash.
11Tantia, cun utsibo. Umbi tantiaido icsho mibi chuinu. Aden Nuquin Papan nuqui tantiaquiec, quequin chuisho tantiash Esus tantiaquido yec utsibobëd tantiananquionona. 12Nuquin Papa matsesën isambo iquec. Adquid icnuc aid tantiaquid yec utsibobëd tantianansho isash Nuquin Papa nuquibëd tabadquin ambi tantiacpadombuen utsibobëd tantiananquidquio nuquitedi icmendac.
13Abi tantiaquid icsho aton Mayan meniaid icquin nuquitedi naden tantiec: Nuquin Papabëd abentsëc yacbimbuec nuqui icnuc nuquibëd abentsëc yacbimbuec Nuquin Papa iquec, quequin nuqui tantiec. 14Nuquin Papan Madombo ubitedishun ispondambi. Aden isondashun: Matses abitedi abëd tabadtequid icmenuen Nuquin Papan chomiac Esus chopanëdash, quequin dacuëdenquiocquin chuibanec nebi.
15Esuquidistu Nuquin Papan Madombo nec, quequin tantiaquidbëd abentsëc yacbimbuec Nuquin Papa iquec. Adecbidi aidbëd abentsëc yacbimbuec abi tantiaquid iquec.
16Naden nuquitedi tantiec: Tantianquidquio icquin Nuquin Papan nuqui tantiec. Adecbidi aton matsesbëd tantiananquidquio yec Nuquin Papabëd cuëshëdenquiocquid nec. Adecbidi nuquibëd Nuquin Papa iquec. 17Esus tantiaquid yec utsibobëd tantiananquidquio yec nuquitedi: Esuquidistun nacpadombuen nidaidënshun naquid nebi, quequin tantiaquid icquin Nuquin Papan cuidte uëshë dacuëdënenquio nuqui iquendac. 18Nuquin Papa tantiaquid yec tantiananquidquio dacuëdenquio iquendac. Nuquin Papan abi bunacpaden tantiananquidquio icmiac aid dacuëdënesa nendac. Tantiananquidpenquio yec Abi tantiesain: Ambi icsambuen naid icnuc: Ubi cuidtsiash, quequin tantiec dacuëdendac. Adquid Nuquin Papa bëdambuen tantiabicquid nec.
19Nuqui tantiaquidquio icquin Nuquin Papan tantiamiac aid tantiaquid yec utsibobëd tantiananquidombo nuquitedi nendac. 20Utsi nadpec: Nuquin Papa tantiaquid nebi, quepec. Adquid icquimbi abëtan Esus tantiaquid utsi ambi isaidquio chieshënquid yec muaquidquio nendac. Aden ambi isaidquio tantienquiocquid iquec ambi isacmaidquio Nuquin Papa tantienquiocquidbidi nendac. 21Esuquidistun ubitedi naden chuipondash: Nuquin Papa tantiaquid nebi, quiash abi tantiaquid utsibobëd tantiananta, quequin chuipondash.
Currently Selected:
Uan 1 4: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.