Codinto 1 2

Esuquidistu cueste napotiaidën dectanaid chuibanaid

1Cun utsibo, mibi yacno nidshun Nuquin Papan ambi matses tantiamenquio icpampidi cumapenen tantiaquidquio nebi, quenquio icquin mibitedi bëdambuen chuinuec nidondabi. 2Mibëd tabadquin utsi chienquio icquin: Esuquidistu cueste napotiaidën dectanac uënëspanëdash, quequin aiduidtsëqui mibitedi chuibanondambi. 3Icsambocquid nebi, quiash mibitedi dacuëdampambo icsho isash uëdëquec dacuëdondabi. 4Adshunquio: Dadpen tantiaquidquio yec bëdambuec onquequidquio nebique. Umbimbo tantiamebennu, quenquio icquin Esus chuibanondambi. Adenquio icquin: Ma Nuquin Papan Mayanëmbi nadatiambocquin tantiamenu, queshun umbi chuibannubi Aidëmbi mibitedi tantiamiondash. 5Adec Esus tantiaquido yanash: Nadatiambocquid icquin Nuquin Papan tantiamioshi, quequin tantiec mibitedi: Matses cumapenen tantiaquid nebi, quequidëmpenquio tantiamiaid nebi, quequin tantiec tabadta.

Nuquin Papan tantiamenquio icpampidi Aton Mayanën tantiamete chiaid

6Padnuembi Esus tantiaquidquio icsho: Ma udictsëc tantiabennu, quequin bëdambuen tantiaquioquin chuibanendac. Esus tantiesabon: Umbi tantiaid dadpen tantiamenu, quequin chuibanacpadombuen chienquio iquembi. Adembidi chuiquid tapabon chiacpadombuen chienquio iquembi. Aidon chiaid nibëdanendac. 7Umbi tantiaid chienquio icquin Nuquin Papan bëdambuen tantiamiac ambi matses tantiamenquio icpampidi chuibanec nebi. Nidaid uabi yec ëndenquimboshë: Umbi tantiacpadënquio Esus tantiaquido bëdamboshë yacno ubëdi tabadmendambi, quequin chiampidquio chuibanec nebi. 8Aden chiampid Nuquin Papan Chomiaid nec, quequin chuiquid tapabon tantienquio icpanëdash. Aidon: Nuquin Papan Chomiaid Esuquidistu nec, quequin tantiaquin: Nuquin Icbo bëdamboshëcquid nec, queshun cueste napotiaidën dectanmenquio ictsempanëdash. 9Nuquin Papan chuiquin dada uamiampid nad iquec:

Nuquin Papan abi tantiaquido tabadmenun nacnenaid iquec.

Aidi matsesën tantiacmaid isquin: Nadquio iccosh, quequin chuitiapimbo iquec,#2.9 Chotaquën onqueten Isa. 64.4 isbanta.

quequin chuipampic.

10Aden Nuquin Papan Mayanënuidtsëqui tantiamiac: Nuquin Papa yacno bëdambuec tabadte nacnenaid iquec, quequin tantiendac. Adembidi Nuquin Papan Mayanën abitedi tantiaquidquio icquin Nuquin Papan utsi tantiamiabi yaidi tantiaquin tantiameuaindac.

11Utsibon tantiaid matsesën tantiatiapimbo icnubi aton mayan ëquëducquidënuidtsëqui tantiec. Adembidi Nuquin Papan Mayanën abitedi tantiaquid icquin Nuquin Papan tantiaidtedi tantiauaic. 12Nuquitedi Nuquin Papan abipadquid Aton Mayan meniaido icquin Esus tantiesabon tantiacpaden tantiatiapimbo nuqui iquec. Adquid icnuc: Matses tantiaquidquio icquin Nuquin Papan tantiamiaid nebi, quequin nuqui tantiec. 13Aden Nuquin Papan tantiamiaid icquin aton Mayanën tantiamiacpadombuen chuibanec nebi. Umbibi tantiabenshun cumapenen tantiaquid nebi, quenquio icquin chuibanec nebi. Aden chuibanenquio icquin Nuquin Papan Mayanën tantiamiaidquio icquin chuibanec nebi.

14Nuquin Papan abipadquid aton Mayan meniacmaid icquin: Aidën chiaid abimbo caic, quequin tantiatiapimbo iquec. Aden tantiatiapimbo yec: Ambembi chiec onquequid nec, quepec. Aden Nuquin Papa tantiesabo icquin Nuquin Papan Mayanën chiaid tantienquio icquido nec. 15Aton Mayanën tantiamiacpadec tabadquidombien bëdambuen naidbëta icsambuen naid tantiec. Aden tantiaquid icsho utsibon: Icsambuec tabadquido nec, catiapimbo iquendac. 16Nuquin Papan chuiquin dada uamiampid nad iquec:

¿Tsuntsin Nuquin Icbon tantiaid tantiapec?

¿Tsuntsin: Naden naban, quequin tantiamepec?

quequin chuipampic.

Adquid nibëdnuc Esuquidistun tantiamiacpadombuen tantiaquido nuquitedi nendac.#2.16 Isa. 40.13 isbanta.

Currently Selected:

Codinto 1 2: mcfNT

Highlight

Copy

Compare