Tito 2
2
Vẽnh kar jyvẽn há han nĩ
1Ag jãvo Topẽ vĩ kãmén há han nĩ, ã tỹ ag jyvẽn kỹ, Tito'. 2Kófa ag mỹ: “nén ũ há hã to jykrén nĩ,” hem nĩ. “Goj fa kron sór tũg nĩ. Nén há kar hã han sórm nĩ. Vẽso jykrén nĩ. Jagnẽ to há nỹtĩm nĩ. Ti tovãnh sór tũg nĩ,” hem nĩ.
3Kỹ kófa fag jyvẽn nĩ gé. “Vẽso jykrén nĩ,” hem nĩ fag mỹ. “Ũ to vĩ kónãn tũg nĩ. Vinho to én sór tũg nĩ. Vẽjykre há hã han nĩ, vẽnh kar tỹ ve jé. 4Kỹ ãjag tóg tytãg fag kanhrãn há han ke mũ,” hem nĩ fag mỹ. “Tytãg fag kanhrãn nĩ, fag tỹ fag mén to há nỹtĩ jé, fag krẽ to, 5fag tỹ vẽso jykrén jé, nén ũ vẽnh mỹ han sór tũ nĩ jé, fag tỹ fag ĩn ki rĩr há han jé, vẽnh kar mỹ vĩ há han jé, fag tỹ fag mén vĩ mranh sór tũ nĩ jé,” hem nĩ, kófa fag mỹ. Fag tỹ tag han kỹ ũ tóg Topẽ vĩ to é henh ke tũ nĩ.
6Kyrũ ag jyvẽn nĩ gé. Ag mỹ: “nén ũ kar to jykrén há han nĩ, ãjag tỹ ẽg tỹ nén to én tĩ ẽn han tũ nĩ jé,” hem nĩ. 7Tag han nĩ gé, Tito', vẽnh kar tỹ ã jykre há tag ve kỹ ã kóm vẽjykre há han sór jé gé. Ã tỹ ag kanhrãn kỹ ki hã tóm nĩ. Kanhir kỹ vĩ tũg nĩ. 8Topẽ vĩ tó há han nĩ, ũ tỹ ã to: “kygnẽ ti huri,” he tũ nĩ jé. Kỹ ũ tỹ ẽg kato tẽ mũ ag vỹ nén ũ tónh ke tũ nĩ. Kỹ tóg ag mỹ'a tĩnh mũ, ag tỹ ón kỹ ẽg kato vĩ ja nĩn kỹ.
9Ũ mỹ rãnhrãj tĩ ag jyvẽn nĩ gé. Ag mỹ: “ãjag patrão vĩ han nĩ,” hem nĩ. “ti tỹ ãjag mỹ vĩ há han jé. Ti vĩ kafãn tũg nĩ. 10Ti tũ péju tũg nĩ. Ti tũ ki rĩr há han nĩ, ti tỹ ã to vĩ kónãn tũ nĩ jé. Ã tỹ ti tũ ki rĩr há han kỹ tóg Topẽ vĩ to vĩ há han ke mũ, ã patrão ti, ti tỹ Topẽ vĩ mẽ kỹ,” hem nĩ, ũ mỹ rãnhrãj tĩ ag mỹ.
11Topẽ tóg ẽg jagãgtãn sór mũ, ẽprã ke kar ag. Kỹ tóg ẽg kren han sór mũ. Hã jé Jesus tóg kãtĩg ja nĩ. 12Kỹ tóg ẽg kanhrãn sór mũ gé, ẽg tỹ ti kato tẽ tũ nĩ jé, ẽg tỹ nén to én sór mũ ẽn han tũ nĩ jé gé, ẽg tỹ ga kri mũn kỹ, ẽg tỹ vẽso jykrén jé, vẽjykre kuryj han jé, Topẽ jykre ti. 13Ti kãtĩg ve sór ẽg nỹtĩ, hã kỹ tóg ẽg mỹ sér tĩ. Tỹ ti pã'i mág tãvĩ nĩ, Topẽ ti. Tar tãvĩ ti nĩ, ẽg kren han tĩ tỹ Jesus Cristo ti ke gé. Ti ve jé ẽg tóg ke mũ. Kỹ tóg sér tãvĩ tĩnh mũ. 14Ẽg jagfy tóg ter ja nĩ, ti tỹ ẽg jykre kórég ẽn tỹ tũ' he jé. Kỹ tóg ẽg kykũg mũ, ẽg jãnhkri nỹtĩ jé. Kỹ ẽg tóg tỹ ti tũ nỹtĩ sir, vyr mỹ. Ẽg pijé tỹ ũ tũ nỹtĩ ha'.
15Tag kar tóm nĩ, Tito'. Tỹ ag jyvẽn tar han nĩ gé kejẽn. Ã tũ vẽ mỹr, ã tỹ ag jyvẽn ke ti. Kỹ ũ jé ã to é he tũg.
Currently Selected:
Tito 2: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
