Galácia 6
6
Ẽg tỹ jagnẽ jagãgtãn ke
1Inh kanhkã', kejẽn ãjag kã mĩ ũ tóg kygnẽg tĩ, vẽnh vatánh tá. Kỹ ti mỹ: “ã mỹ kygnẽ ja tũ?“ hem nĩ, ãjag tỹ Topẽ kuprĩg tỹ jagrẽ nỹtĩn kỹ. Komẽr hã ti mỹ tóm nĩ. Kỹ vẽso jykrén há han nĩ gé, ãjag tỹ ti kóm kygnẽg tũ nĩ jé. 2Jagnẽ jagãgtãn nĩ, ãjag mré ke ũ tỹ jagtar nĩn kỹ. Cristo tỹ ẽg jyvẽn mũn hã vẽ. 3Kejẽn ũ tóg vẽsóg ki vẽsỹ ũn mág han sór mũ. Hã ra tóg tỹ nén ũ tũ nĩ. Ti tỹ kygnẽ vẽ. Vẽnh hã mỹ tóg ón mũ sir. 4Ãjag jykre tugnỹm nĩ. Ti há nĩn kỹ tóg há tĩ. Jagnẽ mỹ: “inh jykre há vỹ ã jykre há kãfór nĩ,” he tũg nĩ. 5Topẽ hã ne ẽg ki ẽg jykre há ẽn vég tĩ'. Kar kỹ tóg ẽg mré ke ag jykre ki kanhró nĩ gé.
6Kejẽn ũ tóg ãjag mỹ Topẽ vĩ kãmén mũ. Ti mỹ ãjag tỹ nén ũ vin nĩ, ti tỹ ãjag mỹ kãmén mũ kaja ti.
7Kygnẽ tũg nĩ. Ẽg tỹ Topẽ to é he kỹn pijé há nĩ'. Ẽg tỹ ón kỹ: “jykre há inh nĩ,” hen kỹ tóg ẽg kren han ke tũ nĩ. Topẽ vỹ ẽg jykre ki kanhró nĩ. 8Ẽg jykre pãno tỹ ẽg mỹ há nĩ ra ẽg tóg to ter ke mũ. Ẽg tỹ jãvo Topẽ kuprĩg tỹ ẽg mỹ nén tó mũ ẽn han kỹ ẽg tóg rĩr krỹg ja tũ ẽn venh ke mũ. 9Hã kỹ nén ũ há han to krónh ke tũg nĩ. Ve jé ẽg tóg ke mũ, Topẽ tỹ ẽg mỹ nén ũ há han ke ti. 10Hã kỹ ẽg tóg vẽnh kar jagãgtãn ke mũ, ũ tỹ ẽg mré Jesus ki ge kỹ nỹtĩ fag mré hã.
Paulo tỹ carta rán kãn mũ
11Ha vé, sỹ rá tóg éhé nỹtĩ, sỹ vãhã vẽsog ki ãjag mỹ inh nĩgé tỹ rán kỹ.
12Ũ ag tóg: “ãjag fár kym nĩ,” he tĩ. Ag tỹ vẽsỹ ũn mág han sór vẽ, ha mẽ. Judeu ũ ag tóg ẽg to jũ tĩ, ẽg tỹ fóg ag mỹ: Judeu jykre han tũg nĩ,” hen kỹ. Hã ra ag tóg inhhã ag tỹ ag vóg kónãn kamẽg mũ. Cristo tỹ krunh to sa ja ra ag tóg ag vẽsỹrénh ke kamẽg mũ. Ag vĩ jẽmẽ tũg nĩ. 13Ha vé, ag tỹ ag fár kym ja ra ag tóg Topẽ tỹ vãsỹ ẽg jyvẽn ja ẽn han kãn tũ nĩgtĩ. Ge ra ag tóg ãjag mỹ “ha ké,” he tĩ, vẽnh kar ag tỹ ag to vĩ há han jé. 14Ag jãvo sóg tỹ ũn mág nĩ sór tũ nĩ. Nén pir tóg inh mỹ sér tĩ, hã vỹ: ẽg pã'i tỹ Jesus Cristo tỹ krunh to sa ja ẽn, he mũ. Kỹ sóg ẽprã ke jykre han sór tũ nĩ ha. 15Ũ ag tóg ag fár kym tĩ, jãvo ũ ag tóg kym tũ nĩgtĩ gé. Hã ra tóg tỹ nén ũ tũ nĩ gé. Topẽ mỹ ẽg há nỹtĩ, ẽg tỹ ti ki ge kỹ nỹtĩn kỹ, ẽg kar. Topẽ vỹ ẽg han mãn, kỹ ẽg tóg tỹ ũn tãg nỹtĩ ha. Tag hã ne há nĩ'. 16Ũ tỹ vẽjykre tãg tag han mũ ag krĩ kuprãg ti tĩ, Topẽ ti. Ũ tỹ ge jagãgtãn ti tĩ, ẽg. Tỹ ẽg Topẽ tũ nỹtĩ ha, ti povo.
17Kỹ inh kutãn mãn tũg nĩ. Inh vẽsỹrénh han mãn tũg nĩ. Jesus vẽsỹrénh ja ẽn ri ke han inh mỹr. Inh kygve vỹ e nỹtĩ.
18Inh kanhkã', ẽg pã'i tỹ Jesus Cristo jé ãjag tar han, ti jé ãjag krĩ kuprãg. Hã vẽ.
Currently Selected:
Galácia 6: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
