Galácia 5

Jesus tỹ ẽg kygvãn ja

1Kỹ Jesus tóg ẽg kygvã, Moisés jykre si ẽn to. Hã kỹ Judeu ag jykre ẽn han sór tũg nĩ. Ũ tỹ tag to ãjag krĩn sór mũ ẽn ag kato tẽm nĩ. Ag nón mũ sór tũg nĩ, ag tỹ vẽjykre ẽn to ãjag sigse mãn tũ nĩ jé sir.

2Hã kỹ sóg ãjag mỹ kãmén mũ, inh, hã vỹ: Paulo, he mũ. Ha mẽ: ãjag tỹ Judeu jykre tugrĩn kren sór kỹ Cristo vỹ ãjag mỹ nén ũ há han ke tũ nĩ. 3Ha vé, sỹ tag tó mãn ke vẽ gé, ha mẽ. Ãjag tỹ ãjag fár kym kỹ ãjag tóg Moisés jykre si ẽn ki króm kãn ke mũ gé sir. 4Cristo tovãnh to ken hã vẽ. Topẽ vỹ ẽg jagãgtãn sór mũ. Ãjag tỹ Moisés jykre han kỹ ãjag tóg ti tỹ ẽg jagãgtãn tag to é he mũ sir. 5Ãjag jãvo ẽg tóg ẽg tỹ Jesus ki gen kỹ Topẽ mỹ tỹ ũn há nỹtĩnh mũ. Ẽg tỹ ti ki ge kỹ nỹtĩn kỹ ẽg tóg Topẽ kuprĩg tỹ jagrẽ nỹtĩ. Ẽg jagrẽ tag tugnĩn ẽg tóg Topẽ mỹ tỹ ũn há nỹtĩ. 6Ha vé, ẽg tỹ Jesus Cristo ki ge kỹ nỹtĩn kỹ tóg tỹ nén ũ tũ tĩ sir, ũ tỹ ti fár kym ja ti, ũ tỹ kym ja tũ ti ke gé. Ti ki ge kỹ ẽg tóg nỹtĩ, kỹ ẽg tóg tỹ nén ũ pir nỹtĩ ha. Jagnẽ to há ẽg nỹtĩ ha.

7Ha vé, mũ há han ja ãjag nĩgtĩ. Ãjag tỹ ne jé tovãnh sór nẽ? Ãjag tỹ ne jé vẽnh vĩ há kri nĩm sór tũ nĩ nẽ? 8Topẽ tỹ ãjag krĩn pijé'. Ti hã ne ãjag jé prẽr ja nĩgtĩ'. 9Tag to jykrén: fermento sĩ vỹ ẽg tỹ ẽmĩ kujãgja kỹ kri rũm ke tĩ, kỹ tóg tỹ sónsón ke kãn tĩ. Topẽ vĩ kujãgja vỹ ge nĩ, ha mẽ. Ke tũg nĩ. 10Ẽg Senhor tũ vỹ tỹ ãjag nỹtĩ. Hã kỹ sóg ãjag to: ag hỹn ti tovãnh ke tũ nĩ, he tĩ. Ag hỹn ti japry jagma mũ mãn ke mũ, he sóg tĩ. Ũ tỹ ãjag krĩn kónãn mũ ẽn ne vẽsỹrénh ke mũ', ti tỹ tỹ pã'i nĩ ra'.

11Inh pijé ẽg gré fár junun kym to: ke ra, he tĩ'. Isỹ ag mré tag tó ra ag hỹn inh vóg kónãn ke tũ nĩ vẽ. Ẽg tỹ ẽg fár kym tugrĩn krenkren ke nỹtĩ ra ẽg tóg Jesus tỹ ka to sa ja ẽn to krenkren ke tũ nĩ vẽ, kỹ tóg ag mỹ sér tĩ vẽ. Inh pijé tag tó tĩ'. 12Ũ tỹ tag tó mũ ag jé ag grãfy kym kãn, ũ tỹ ãjag krĩn kónãn mũ tag ag.

13Hã ra Topẽ tóg ẽg jé prẽr, ti tỹ ẽg kygvãn jé. Kỹ ẽg kygvar kỹ nỹtĩ ha. Ge ra ẽg tóg ẽg tỹ vẽsóg ki nén to jykrén mũ ẽn han sór ke tũ nĩ, ti kórég nĩn kỹ. Ẽg tỹ jagnẽ to há nỹtĩ tag hã ne há nĩ'. Jagnẽ ki rĩr to ken hã vẽ. 14Ha vé, Topẽ tỹ ẽg jyvẽn e ẽn ki króm kãn jé ẽg tóg ke mũ, ẽg tỹ nén ũ pir han kỹ, hã vỹ: “ã régre ki rĩr há han nĩ, ã tỹ vẽnh ki rĩr há ri ke han nĩ, ã régre ki,” he mũ. 15Jãvo ãjag tóg mĩg ri ke jagnẽ mãn sór mũ, jagnẽ to jũn kỹ. Jagnẽ tỹ tũ' he jé ãjag tóg ke mũ, gen kỹ, ha vem nĩ.

Ẽg tỹ ẽg tỹ nén to én mũ ẽn han ke tũ

16Hã kỹ sóg ãjag mỹ: “Topẽ kuprĩg tỹ ãjag mỹ nén tó mũ ẽn hã han nĩ,” he mũ. Kỹ ãjag tóg ãjag tỹ nén to én mũ ẽn han ke tũ nĩ. 17Ẽg tỹ nén to én mũ vỹ Topẽ kuprĩg kato tẽ nĩ. Kỹ Topẽ kuprĩg vỹ ẽg tỹ nén to én mũ ẽn kato tẽ nĩ gé. Jagnẽ to rárá ag tóg tĩ. 18Ẽg tỹ hã ra Topẽ kuprĩg tỹ ẽg mỹ nén tó mũ ẽn han kãn kỹ tóg ẽg se mãn ke tũ nĩ sir, vãsỹ Moisés jykre si ẽn ti.

19Ẽg tỹ vẽsóg ki nén to jykrén mũ ẽn vỹ kórég nĩ. Vẽnh kar vỹ ki kanhró nỹtĩ. Ẽg tỹ vẽsóg ki nén to jykrén mũn hã vẽ, hã vỹ: mén tũ mré nỹ, prũ tũ mré nỹ, nén ũ kavéj han tĩ, ẽg tỹ nén to én mũ kar han tĩ, 20ẽg tỹ vẽnh kãgrá to: Topẽ vẽ, he tĩ, kujá jykre han tĩ, jagnẽ kato vãsãn tĩ, jagnẽ to ẽg fe tỹ gỹm ke (ka)mẽ, jagnẽ tũ to jykrén kónãn tĩ, vẽsỹ ũn mág han sór mũ, vẽnh kãpãm kỹ nỹtĩ sór mũ, 21jagnẽ tũ to én tĩ, kronkron tĩ, krĩn tũ, he mũ, vẽjykre pãno han tĩ tỹ hẽn ri ke ke gé. Tag to sóg ãjag jyvẽn huri. Hã ra sóg tó mãn sór mũ. Ũ tỹ tag han mũ ag pijé Topẽ tỹ tỹ ẽg pã'i nĩ venh ke mũ'.

22Topẽ kuprĩg tỹ ẽg kanhrãn mũ vỹ kórég tũ nĩ. Há kar ti nĩ. Ti tỹ ẽg kanhrãn to ken hã vẽ, hã vỹ: jagnẽ to há, he mũ, mỹ sér tĩ, krĩ kuprã, jagnẽ to fe há nỹtĩ, komẽr hã vĩ, jagnẽ jagãgtãn tĩ, jagnẽ mỹ ón vãnh, 23vẽsỹ ũn mág han sór tũ, vẽso jykrén tĩ, he mũ. Topẽ pijé tag kato tẽ tĩ'. Ti tỹ vãsỹ ẽg jyvẽn ti vỹ tag ri ke ja nĩgtĩ gé, Moisés jykre si ẽn ti. 24Ẽg tỹ tỹ Jesus Cristo tũ nỹtĩn kỹ ẽg tóg ti tỹ ka to sa ja ẽn ri ke nỹtĩ. Hã kỹ ẽg tóg ẽg tỹ nén to én mũ ẽn han mãn sór ke tũ nĩ ha sir, ẽg tỹ nén ki vẽ'ĩ mũ ẽn.

25Ẽg tỹ Topẽ kuprĩg tỹ jagrẽ nỹtĩn kỹ ẽg tóg ti tỹ ẽg mỹ nén tó mũ ẽn han kãn ke mũ sir, ti kuprĩg tỹ ẽg mỹ nén tó mũ ẽn ti. 26Kỹ ẽg tóg sir tỹ ũn mág nỹtĩ sór ke tũ nĩ. Jagnẽ jũ han mãn sór ke tũ ẽg nĩ. Jagnẽ tũ mãn sór ke tũ ẽg nĩ gé. Vẽjykre há hã han jé ẽg tóg ke mũ.

Currently Selected:

Galácia 5: kgp

Highlight

Copy

Compare