Han Kãme 14
14
Ẽmã tỹ Icônio tá Topẽ vĩ tó
1Ag tỹ Icônio tá junjun kỹ ag tóg sir Judeu ag tỹ vẽnh kanhrãn jafã kã ra ge mũ. Kỹ ag tóg ag mỹ Topẽ vĩ kãmén mũ. Kỹ Judeu tỹ hẽn ri ke ag tóg Jesus ki ge mũ gé, fóg tỹ hẽn ri ke ag ke gé. 2Kỹ Judeu tỹ Jesus ki ge jãvãnh ag tóg fóg ag krĩn kónãn mũ sir, Jesus mré ke ag to.
3Hã ra Paulo ag tóg tá nỹtĩg mág mũ. Kỹ ag tóg Topẽ vĩ tó mũ, ag tỹ ag kamẽg tũ nĩn kỹ, Topẽ vĩ kri fi kỹ. Kỹ Topẽ tóg ag mỹ ti jykre nĩm mũ, ag tỹ ẽg tỹ nén han vãnh hynhan jé. Hã kỹ vẽnh kar tóg Topẽ jykre ki kanhró nỹtĩ sir.
4Kỹ vẽnh kar tóg vẽnh kãpugpóv kỹ nỹtĩ nĩ. Ũ ag tóg Judeu ag to há nỹtĩ, jó ũ ag tóg Jesus tỹ ũn vin mũ ag tó há nỹtĩ. 5Kỹ Judeu ag tóg fóg ag mré jykrén mũ, fóg tỹ pã'i ag mré, ag tỹ Paulo ag vóg kónãn jé, ag tỹ pó tỹ ag pin jé. 6Hã ra Paulo ag tóg mẽg mũ, kỹ ag tóg ẽmã tỹ Listra ra mũ mũ, ẽmã tỹ Derbe ra ke gé. Ẽmã tỹ Licaônia rã hã ẽmã ag vẽ. 7Ẽmã ẽn mĩ mũn kỹ ag tóg tá Jesus vĩ tugtó mũ sir.
Ag tỹ ẽmã tỹ Listra tá Paulo vóg kónãn
8 Listra tá ke ũ tóg nĩ nĩ, ũn tĩg vãnh. Ti pẽn vỹ kãnhgrĩ nỹtĩ. Ge tóg nĩ, ti mur mũn kã.
9Ẽn tóg sir Paulo vĩ mẽg mũ. Kỹ Paulo tóg ti tugnỹm mũ. Kỹ tóg ti tỹ Jesus vĩ kri fig mũ vég mũ, Jesus tỹ ti tỹ há' he jé. 10Kỹ tóg jamã há ra ti mỹ: “jẽgnẽ ra, vẽnh ra hã jẽg,” he mũ. Kỹ tóg vãhã hũm he mũ. Kỹ tóg mĩ tĩ mũ.
11Kỹ tóg vẽnh kar ẽn mỹ e tĩ, ag tỹ Paulo tỹ nén han mũ ven kỹ. Kỹ ag tóg ag vĩ ki jagnẽ mỹ ke mũ, vĩ tỹ Licaônica he mũn ki. Jamã há ra ag tóg: “topẽ ag vỹ ẽg ki junjun,” he mũ. “Ẽg ri ke ag nỹtĩ, topẽ ag,” he ag tóg, Paulo ag to. 12Kỹ ag tóg Barnabé to: Júpiter, he mũ. Paulo to ag tóg: Mercúrio, he mũ sir, ti vĩ mág to. Ón kỹ ag topẽ jigji vẽ, hã vỹ: Júpiter mré Mercúrio, he mũ.
Hã ra Paulo ag tóg ag vĩ ki kagtĩg nỹtĩ.
13 Júpiter ĩn vỹ ẽmã fyr tá jẽ nĩ, kỹ ti tũ ki rĩr tĩ tóg tá nĩ gé. Kỹ tóg monh gé tĩ mũ, ka fej tỹ coroa ke gé. Ẽmã jy ró jãnkã mãra tóg gé tĩ mũ. Tá tóg monh kugprũn sór mũ, Barnabé mỹ, Paulo mỹ ke gé.
14Hã ra Paulo ag tóg mẽg mũ, kỹ ag tóg ag kur janjãn mũ, jũgjũ kỹ. Ũ tỹ vẽnh mãn kỹ nỹtĩ ag to ag tóg pétẽ mũ. Prẽr kỹ ag tóg ag mỹ: 15“ne nẽ?” he mũ. “Tỹ ẽg ẽprã ke nỹtĩ, ãjag ri ke. Hã ra ẽg tóg ãjag mỹ kãmén sór mũ, ãjag tỹ ón kỹ topẽ tag ag tugvãnh jé. Topẽ pẽ ki gem nĩ, ũn rĩr nĩ ẽn ki. Kanhkã han tóg, ga ke gé, goj ke gé, mĩ mũ kar ke gé,” he tóg. 16“Vãsỹ Topẽ tóg nação ag mỹ nén ũ tó ja tũ nĩgtĩ, kỹ ag tóg ag jykre mĩ mũgtĩ. 17Ge ra tóg ag ki rĩr há han mũ, Topẽ ti, ag tỹ tag to vãhã ti ki kanhrãn jé. Hã jé tóg ta jẽnẽ, kỹ ãjag jakré tóg mogmog mũ. Kỹ ãjag tóg konh ke mũ. Kỹ ãjag fe tóg há' he mũ sir. Ãjag mỹ tóg sér tĩ sir, ti tỹ ãjag mỹ vẽjẽn han kỹ, Topẽ ti,” he ag tóg, Paulo ag.
18Ag vĩ ki ag tóg ag mỹ nén ũ kugprũn tovãnh mũ. Ag mỹ ag tóg nén ũ kugprũn kren ja nĩgtĩ, tá.
19Kar kỹ ẽmã tỹ Antioquia tá ke ag tóg tá junjun mũ, ẽmã tỹ Icônio tá ke ag ke gé. Judeu ag vẽ. Ẽn ag tóg vẽnh kar krĩn kónãn mũ, kỹ ag tóg Paulo pin mũ, pó tỹ. “Ter ti huri,” he ag tóg mũ sir. Kỹ ag tóg ti raran kỹ ẽmã fyr tá ti fón mũ sir. 20Kỹ Jesus mré ke ag tóg ti venh kãmũ mũ, hã ra tóg jẽgnẽ mũ. Ẽmã ẽn kã ra tóg rã mãn mũ.
Tỹ vaj kỹ tóg hã ra ẽmã tỹ Derbe ra tĩ mũ, Barnabé mré. 21Tá ag tóg Jesus kãme sér tó mũ gé. Kỹ ũ tỹ hẽn ri ke ag tóg Jesus ki ge mũ sir, fag mré hã.
Paulo ag tỹ ẽmã tỹ Antioquia ra vỹnvỹn ke
Kar kỹ ag tóg ẽmã tỹ Listra ra vỹnvỹn ke mũ, ẽmã tỹ Icônio ra ke gé, Antioquia ra ke gé, ag tỹ hẽ tá kãmũ ja ẽn ra. 22Vỹnvỹn ke kỹ ag tóg Jesus mré ke ag jyvẽn mũ sir, ag tỹ Jesus vĩ kri fi to krónh ke tũ nĩ jé, ag tỹ to fe tar nỹtĩ jé ke gé. “Ẽg tỹ Topẽ tỹ tỹ ẽg pã'i nĩ ve sór kỹ ẽg tóg vẽnh jagtar jagy venh ke mũ,” he ag tóg. 23Kỹ ag tóg ag mỹ igreja to kófa ag kuprẽg mũ, ag tỹ Jesus ki ge kỹ nỹtĩ ag ki rĩr jé. Ag to ag tóg Topẽ mré vĩ mũ gé, nén ũ ko mẽ kã. Kỹ ag tóg: “Topẽ vỹ ãjag ki rĩr há han mũ,” he mũ. Kỹ ag tóg mũ mũ sir. 24Kỹ ag tóg ga tỹ Pisídia fĩn rãm kỹ ga tỹ Panfília tá junjun mũ. 25Ẽmã tỹ Perge tá ag tóg Topẽ vĩ tó mũ gé sir. Kar kỹ ag tóg ẽmã tỹ Atália ra mũ mũ. 26Tá junjun kỹ ag tóg Antioquia ra mũ mũ gé, canoa mág kã mĩ. Ẽn hã tá ag tóg pa ja nĩ. Tá ke ag tóg ag to Topẽ mré vĩ ja nĩgtĩ, ti tỹ ag jy nĩgãn jé. Kỹ ag tóg ti rãnhrãj ẽn han kãn mũ. Kỹ ag tóg Antioquia ra vỹnvỹn ke mũ. 27Tá junjun kỹ ag tóg Jesus ki ge kỹ nỹtĩ kar jé prẽr mũ. Kỹ ag tóg ag mỹ Topẽ tỹ nén han mũ kar kãmén mũ. “Fóg ag ne tóg Jesus ki ge mũ gé, Topẽ tỹ ag krĩn kỹ,” he ag tóg mũ, ag mỹ.
28Kỹ ag tóg tá nỹtĩ, kysã tỹ hẽn ri ke ki. Jesus mré ke ag mré ag tóg nỹtĩgtĩ, Paulo ag.
Currently Selected:
Han Kãme 14: kgp
Highlight
Share
Compare
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
